Kakꞌeꞌ kakꞌajsbil tetz Kataj na iꞌ akꞌol kachamil
81
1 Tzatzin cuꞌn chibitzinkuꞌ swutz Ryos, na iꞌ akꞌol kachamil. Tetz cuꞌn cyalmaꞌuꞌ, cyakꞌuꞌ chikꞌajsbiluꞌ tetz kaRyosil yi iteꞌn nin Ryosil Jacowaꞌtz.2 Cyakꞌeꞌuꞌ chikꞌajsbiluꞌ tetz iꞌ tan eꞌchk maꞌcl chi taneꞌn pandero, nka chi taneꞌn yi arpa tu salterio.
3 Baꞌn tzꞌoc eꞌchk chun cyanuꞌ te yi na jal yi neꞌẍ xaw. Nchaꞌtz yil tijin yi xaw. Na yaꞌstzun yi techl yi nim kꞌej yi na icyꞌ skaxoꞌl.a
4 Na yaꞌstzun yi caꞌwl yi talnak Kataj yi Ryosil Jacow tan kabnol taneꞌn yi oꞌ xonl Israel.
5 Ej nin iteꞌn nin caꞌwlaꞌtz aꞌlchij tetz Ẍep yi cyeleꞌn tzaj tcyꞌal Ryos le amaꞌl Egipto.
6 Poro nin ben wital jun yi jiloneꞌn yi quinin el intxum tetz yi yol iꞌ. Je yol iꞌeꞌj:
“Ja xeꞌl tzaj wucyꞌal jakꞌ chicaꞌwl yi eꞌ aj Egipto.
Na nin el inkꞌajab tziteꞌjwok na chin qꞌuixcꞌuj nin itaneꞌn tan akꞌun.
7 Nin te yi tuleꞌn eꞌchk il tziwutz ja cuꞌ iwutz swetz, nin ja cxclaxwok waꞌn. Nin te yi atin tul jun bocꞌoj sbakꞌ, ja chinjilon tzitetz. Nchaꞌtz ja noꞌc tan ipileꞌnwok le amaꞌl Meriba,b kale eltzit aꞌ wutz cꞌub.
8 Nchaꞌtz wal tzitetzwok: Axwok intanum, bitwok tzaj yi incaꞌwleꞌj, nin nink cxomwok teꞌj.
9 Quil tzitakꞌ kꞌej junt ryos, ma na ntin in. Quil tzilokꞌwok chiwutz yi eꞌchk ryos yi banij cuntuꞌ quitaneꞌn.
10 Na i inaꞌtz in Ryos yi ncxeꞌlsan tzajwok Egipto. Jakwok cyakil yi tajweꞌn tzitetz nin swakꞌeꞌ.
11 ”Poro yi axwok itetz yi axwok intanum quinin mitbitwok incaꞌwl. Quinin cxomwok te wetz wajbil.
12 Chaꞌstzun te ja wakꞌ amaꞌl tzitetz tan ibnol yi itajbil. Nin ja cxomwok te yi itajbil yi chumbalaj nin taneꞌn tziwutzwok.
13 Poro yi nink mitbitwok incaꞌwl nin yi nink ncxomwok te yi wetz wajbil,
14 jalt nin kloꞌ mitilwok yi nchiloꞌon yi icontr waꞌn. Ja kloꞌ wakꞌ chicaws. Nin jalcunin kloꞌ nchiquim waꞌn, chi yi na ban yi na litꞌneꞌ kawutz,” stzun Kataj bantz.
15 Cyakil yi eꞌ yi na chiꞌch chicꞌuꞌl te Kataj chelepon cuꞌn swutz. Nin chicawsok tetz ben kꞌej ben sak.
16 Ma yi eꞌ tetz tanum tzꞌocopon iꞌ tan chicꞌaꞌcheꞌn. Na stkꞌeꞌ iꞌ eꞌchk balaj ixiꞌn triw scyetz tetz chiwaꞌ. Ma tetz quicꞌaꞌ stkꞌeꞌ iꞌ taꞌal wunak txuc.