Yi cyoqueꞌn yi eꞌ xonl Israel tan cuꞌswutzil tan cyoqueꞌn junt tir chi chisajleꞌn
80
1 Wajcaw, yi iluꞌ pstor ketz yi oꞌ xonl Israel, tbitzajuꞌ yi cobox inyoleꞌj:Yi iluꞌ teruꞌ, niꞌcuꞌn iluꞌ tu jun pstor cneꞌr, yi na tzan tan kapstoreꞌn yi oꞌ xonl Ẍep.
Nin choꞌn cꞌolchijuꞌ ẍchixoꞌl yi eꞌ querubima tan cawuꞌn.
2 Je wajbileꞌj Taꞌ:
Takꞌeꞌuꞌ banluꞌ skibaj yi oꞌ xonl Efraín, scyuchꞌ yi eꞌ xonl Benjamín tu Manasés.
Elk kꞌajabuꞌ skeꞌj. Sajkuꞌ tan kacolpeꞌn tan yi teruꞌ poreruꞌ.
3 Iluꞌ kaRyosil, lok takꞌuꞌ amaꞌl tan koqueꞌn junt tir chi kasajleꞌn.
Elk kꞌajabuꞌ skeꞌj, bantz keleꞌn liwr.
4 Kataj, cyaꞌl na xcyeꞌ quen teꞌjuꞌ.
¿Tonaꞌ tzꞌel ẍchiꞌchbeꞌn cꞌuꞌluꞌ skeꞌj?
¿Tonaꞌ ltzatzinuꞌ te yi kaꞌoracion? na oꞌ tanumuꞌ.
5 Jatix nin loꞌ bis oꞌkl takꞌuꞌ sketz.
Bis oꞌkl cuntunin na baj jun waj kaꞌn.
6 Ja koꞌc tetz chiyolbeꞌtz yi eꞌ kawisin.
Ja koꞌc tetz chitzeꞌlbeꞌtz yi eꞌ kacontr.
7 Iluꞌ kaRyosil. Cyaꞌl na xcyeꞌ quen teꞌjuꞌ, na wiꞌnin ẍchamiluꞌ.
Lok takꞌuꞌ amaꞌl tan koqueꞌn junt tir chi kasajleꞌn.
Elk kꞌajabuꞌ skeꞌj, bantz keleꞌn liwr.
8 Tan yi poreruꞌ, eꞌ eltzaj tcyꞌaluꞌ yi eꞌ kamam kateꞌ le amaꞌl Egipto.
Ja cheꞌl tzaj tcyꞌaluꞌ, chi na saj bukꞌij jun wiꞌ uva tan tawleꞌn le junt amaꞌl.
Nin yi cyuleꞌn Canaán, ja cheꞌl lajuluꞌ cyakil yi eꞌ awer nak, nin ja takꞌuꞌ yi chiꞌamaꞌl scyetz kamam kateꞌaꞌtz tan chinajeweꞌn swutz.
9 Ja chicuꞌ tawaluꞌ chi jun wiꞌ uva.
Ja ocuꞌ tan banleꞌn baꞌn te eꞌchk amaꞌlaꞌtz nin ja chicuꞌ tawaluꞌ.
Ja chinajeꞌ swutz, nin ja pucꞌun chiwutz.
Choꞌn cunin nchiban yi pucꞌun chiwutz chi na ban jun wiꞌ uva yi na ben loꞌon.
10 Yi jun wiꞌ uvajaꞌtz ja chꞌuy, nin ja icyꞌ cuꞌn swutz cyakil jilwutz tzeꞌ.
Nin tan yi eꞌchk kꞌab, ja xcyeꞌ tan jopleꞌn cyakil eꞌchk tzeꞌ.
11 Nin ja opon cuꞌn yi eꞌchk kꞌab jalen tzi mar.
Nin ja opon yi eꞌchk xlumil jalen tzi tzanlaꞌ yi na biꞌaj Eufrates.
12 Taꞌ ¿mbi xac ntakꞌuꞌ amaꞌl tan cweꞌn xit yi peꞌm?
Na ja choꞌc pokꞌ yi eꞌ wunak yi na chixon tbeꞌ tan talkꞌeꞌn yi wutz yi jun wiꞌ uvajaꞌtz.
13 Nchaꞌtz yi smaron txuc, chi taneꞌn stzeꞌlaj boch, na chitzan tan bajseꞌn yi jun wiꞌ uvajaꞌtz.
14 Iluꞌ kaRyosil yi cyaꞌl na xcyeꞌ quen teꞌjuꞌ, nin yi atuꞌ tziꞌn tcyaꞌj, elk tzaj toꞌkl cꞌuꞌluꞌ te yi jun wiꞌ uvajaꞌtz yi tzan teleꞌn cuꞌn swutz.
15 Na iluꞌ bin awal tetz.
Nin ja takꞌuꞌ amaꞌl tan ẍchꞌuyeꞌn yi xlumil.
16 Chaꞌstzun te, cheꞌlk cuꞌn tanuꞌ swutz, cyakil yi eꞌ yi na chitzan tan tamleꞌn nin tan stzꞌeꞌseꞌn yi jun wiꞌ uvajaꞌtz.
17 Poro ẍchꞌeyajuꞌ yi jun yi jeꞌnak xtxaꞌoluꞌ, yi jun yi ja xlumin tanuꞌ, nin yi iluꞌ mbixban.
18 Quiꞌt kajatxlen kib teꞌjuꞌ, ma na takꞌ tzajuꞌ kabanl.
Na ntin cuꞌn teruꞌ na kajak wit ẍchꞌeybil ketz.
19 Iluꞌ Kataj, iluꞌ kaRyosil yi cyaꞌl na xcyeꞌ quen teꞌjuꞌ.
Lok takꞌuꞌ amaꞌl tan koqueꞌn junt tir chi kasajleꞌn.
Elk kꞌajabuꞌ skeꞌj, bantz keleꞌn liwr.