Yi bis oꞌkl yi ul ẍchiwutz yi eꞌ aj Jerusalén
79
1 Iluꞌ inRyosil, ja chucuꞌl pokꞌ yi awer nak le amaꞌluꞌ.Ja choꞌc tan telseꞌn kꞌej yi caꞌluꞌ yi wiꞌnin xanil.
Nchaꞌtz ja baj chiwoqꞌuil cyakil yi tnum Jerusalén.
2 Ma chiwankil yi eꞌ tanumuꞌ, yi nchiquim, ja cyaj tetz chiwaꞌ yi eꞌ kuꞌs.
Nin chiwankil yi chimos, ja cyaj tetz chiwaꞌ yi eꞌ smaron txuc.
3 Ja el kojx chiẍchꞌel chi na el kojxuj aꞌ.
Ja noj cyakil yi tnum Jerusalén tan chichꞌ.
Tircuꞌn nchiquim. Cyaꞌl jun nclax tan chimukleꞌn.
4 Oꞌ tuꞌ chiyolbeꞌtz yi eꞌ mas tnum.
Oꞌ tuꞌ chitzeꞌlbeꞌtz, ntin na chixcyꞌaklin skeꞌj.
5 ¿Tonaꞌ tzꞌel yi ẍchiꞌchbeꞌn cꞌuꞌluꞌ skeꞌj?
¿Skꞌakꞌaxk peꞌ mas?
6 ¿Mbi tzuntz qui na chiꞌch cꞌuꞌluꞌ scyeꞌj yi eꞌ mas wunak, yi qui na choꞌc tan naꞌwseꞌn biꞌuꞌ?
7 Na ja cuꞌ chibiyol yi eꞌ tanumuꞌ.
Ja baj chipoꞌtzal cyakil yi teruꞌ amaꞌluꞌ.
8 Quil koꞌ cawsajuꞌ, tan paj yi quil yi eꞌ kamam kateꞌ.
Ma na elk kꞌajabuꞌ skeꞌj.
Sajkuꞌ tan kuchꞌeyeꞌn. Na atoꞌ wutz peꞌm.
9 Koꞌ ẍchꞌeyajuꞌ Taꞌ. Koꞌ colpeꞌuꞌ.
Cuyeꞌuꞌ kapaj, bantz jaleꞌn teruꞌ kꞌejuꞌ.
10 Na na chixcyꞌaklin yi eꞌ mal nak skeꞌj.
Nin na cyal: “¿Lok iryosil?”
Na kloꞌ kaj yil ticyꞌsajuꞌ cꞌuꞌluꞌ scyeꞌj, tan paj yi ja el kojxuj chiẍchꞌel yi eꞌ ẍchakumuꞌ.
11 Lok tzꞌel kꞌajabuꞌ scyeꞌj yi eꞌ pres yi na chitxꞌayneꞌ.
Nin tan yi poreruꞌ cheꞌ colpeꞌuꞌ, na txꞌaklij quimichil ẍchiwutz.
12 Takꞌeꞌuꞌ juk tir chicaws yi eꞌ yi na chitzan tan yolcheꞌnuꞌ.
Ej nin yil takꞌuꞌ chicaws, skakꞌeꞌ ketz kakꞌajsbil teruꞌ.
13 Na yi oꞌ ketz Taꞌ, oꞌ tanumuꞌ nin oꞌ tawunuꞌ.
Skakꞌeꞌ bin kakꞌajsbil teruꞌ tetz ben kꞌej ben sak.