Yi mbi cuꞌn banak Ryos te yi tetz tanum
78
1 Axwok intanum, xomenwok te wetz inchusuꞌn.
Bitwok cyakil yi mbi na wal.
2 Xconk cobox elsawutzil waꞌn tan ichusleꞌn.
Swaleꞌ cobox xtxolbil tzitetz yi ewaꞌn cuntuꞌ sajleꞌn, yi cyaꞌl na bitan tetz.
3 Na cyakil yi eꞌchk xtxolbil yi nkubit, choꞌn nkubit scyeꞌj eꞌ kataj katxuꞌ.
4 Nchaꞌtz oꞌ ketz, tajweꞌn tan katxolil scyetz eꞌ kanitxaꞌ.
Tajweꞌn tan kukꞌol kakꞌajsbil tetz Ryos scyuchꞌ kamamaj.
Tajweꞌn tan katxolil scyetz cyakil yi mbi cuꞌn banak Ryos tan yi tetz porer.
5 Na takꞌnak Ryos jun caꞌwlaꞌtz tetz Jacow.
Nin alijt cyen taꞌn tan kaxomeꞌn yi oꞌ xonl Israel teꞌj.
Nin tal iꞌ scyetz yi eꞌ kamam kateꞌ, yi tajweꞌn tan chichusul yi chinitxaꞌ tu chimamaj sbneꞌ opon tunintz.
6 Na yi tajbil Ryos iꞌtz, tan teleꞌn chitxum yi eꞌ wunak yi xomcheꞌ tzaj, nin tan cyalol cyetz scyetz chinitxaꞌ.
7 Bantz kꞌukeweꞌn chicꞌuꞌl te Ryos, nin bantz qui teleꞌn te chicꞌuꞌl yi ẍeꞌn cuꞌn ban iꞌ sajleꞌnix tunintz.
8 Nchaꞌtz tajweꞌn tan chichusleꞌn, bantz quil tzeꞌtzax yi cyajtzaꞌkl, chi banakeꞌ yi chimam chiteꞌ, yi quinin kꞌukeꞌ chicꞌuꞌl te yi yol iꞌ, nin yi ja cabej chicꞌuꞌl teꞌj.
9 Na yaꞌstzun banakeꞌ yi eꞌ xonl Efraín.
Wech, chin cham nin eꞌ tan oyintziꞌ.
Wekij cheꞌ tan eꞌchk balaj maꞌcl tetz oyintziꞌ.
Poro ja cheꞌl ojk ẍchiwutz eꞌ chicontr.
10 Quinin nchixom te yi chiyol yi eꞌ suk tetz Ryos.
Quinin nchixom te yi tetz ẍchusuꞌn.
11 Nchaꞌtz el te chicꞌuꞌl yi porer Ryos.
El te chicꞌuꞌl yi eꞌchk takleꞌn yi bnixnak tan Ryos scyeꞌj.
12 Na wiꞌnin eꞌchk milawr bnixnak tan Ryos,
ẍchiwutz chitaj chitxuꞌ, le amaꞌl Zoán cwent Egipto.
13 Na ja cuꞌ jatxol iꞌ yi mar. Cob cuntuꞌ el taꞌn.
Nin ja chicyꞌ yi tetz tanum tcꞌuꞌl.
Na yi aꞌ, ja oc taꞌn chi jun tapij ẍchixlaj, yi quicyꞌeꞌn tzaj.a
14 Nin yi chixoneꞌn tbeꞌ, yi cyeleꞌn tzaj Egipto, bajxij jun bocꞌoj sbakꞌ ẍchiwutz chajkꞌej.
Ma lakꞌbal, ja xcon yi sbakꞌaꞌtz tetz chitxekbil yi na chixon.
15 Nin te yi ateꞌ le amaꞌl tzꞌinunin tuꞌ, ja el tzaj aꞌ tan Ryos wutz cꞌub. Nin ja chucꞌaꞌ teꞌj.
16 Na ja el tzaj jun chin wutzileꞌn tzanlaꞌ tan Ryos wutz yi jun cꞌubaꞌtz.b
17 Ja quil yi eꞌchk milawraꞌtz yi bnix tan Ryos.
Poro ilenin ja chijuch quil, na nin eꞌ oc tan contriꞌn te yi Wiꞌtz Ryos.
18 Ja choꞌc tan pileꞌn iꞌ.
Na ja choꞌc tan jakleꞌn chiwaꞌ, poro i yi cyetz cyajbil nchijak.c
19 Ja choꞌc tan telseꞌn kꞌej Ryos.
Na nin cyaltz:
“Iẍkaj at tzunk rmeril yi nink takꞌ jun balaj kawaꞌ, tzoneꞌj le amaꞌl tzꞌinunin tuꞌ.
20 Bintzinin, ja xcyeꞌ Ryos tan telseꞌneꞌl tzaj aꞌ wutz cꞌub, yi ja xcyeꞌ tan sijleꞌn wiꞌnin amaꞌl.
Poro ¿xcyek poloꞌ iꞌ tan takꞌleꞌn kawaꞌ?
Nin ¿xcyek poloꞌ iꞌ tan takꞌleꞌn kachib, tzoneꞌj le amaꞌl tzꞌinunin tuꞌ?” cheꞌch bantz.
21 Yi tbital Ryos cyakil yi xtxolbilaꞌtz, ja saj colp wiꞌ iꞌ scyeꞌj.
Nin yi sajeꞌn colp wiꞌ iꞌ, choꞌn cunin ban chi na ban jun kꞌakꞌ.
22 Ja chiquim tan paj yi quinin kꞌukeꞌ chicꞌuꞌl te Ryos, nin ja chiquim tan paj yi quinin kꞌukeꞌ chicꞌuꞌl te yi tetz porer.
23 Poro yi Kataj Ryos ilenin ja el kꞌajab iꞌ scyeꞌj, na ja cawun iꞌ, nin ja jakxij yi tcyaꞌj taꞌn.
24 Nin saj tkꞌol jun jilwutz ixiꞌn scyetz, yi maná biꞌ, yi choꞌn sajeꞌn tcyaꞌj, tan chiwaneꞌn teꞌj.
25 Ja tzun chiwan te chiwaꞌ yi eꞌ ángel.
Ja takꞌ Ryos cyakil yi chiwaꞌ, yi tajweꞌn scyetz.
26 Nchaꞌtz tan yi tetz porer ja saj jun chumam cyekꞌekꞌ taꞌn.
Choꞌn sajeꞌn teleꞌn tziꞌn tu cweꞌn tziꞌn.
27 Cyꞌaꞌn jun cꞌoloj tzꞌichin tan yi cyekꞌekꞌaꞌtz.
Nin choꞌn chicyajeꞌn quen jicy ẍchixoꞌl.
28 Choꞌn cunin ban yi tajlal chi yi samlicyꞌ tzi mar.
Choꞌn tponeꞌn tan Ryos xoꞌl chicaꞌl yi mantial tuꞌ, nin solteꞌj cyakil yi amaꞌl kale ateꞌt.
29 Ja baj cyaꞌn jalen cuꞌn micyꞌ chipaj teꞌj.
Na Ryos mmakꞌon cyakil cyajbil.
30-31 Poro tan paj yi chin xoꞌj nin eꞌ tan waꞌaꞌn, ja takꞌ Ryos chicaws.
Atit nin chichib le chitziꞌ yi takꞌleꞌn chicaws.
Na ja chiquim yi eꞌ yi mas cham yi ateꞌ ẍchixoꞌl, yi eꞌ balaj xicy cwent Israel.
32 Poro quinin chixob tetz Ryos.
Nin ilenin ja chijuch mas quil.
Wech quilnak eꞌchk milawr yi bnix tan Ryos, poro quinin kꞌukeꞌ chicꞌuꞌl teꞌj.
33 Chaꞌstzun te eꞌ cweꞌn sotzal Ryos.
Quiꞌc ntakꞌ cyakil yi qꞌuixcꞌuj nchimucꞌ, na chin xoꞌwbil nin yi quimichil eꞌ ban.
34 Ma yi toqueꞌn Ryos tan chibiyleꞌn cobox, ilenin at eꞌ yi ja cuꞌ-t chiwutz tetz.
Nin ja choꞌc tan joyleꞌn iꞌ junt tir.
35 Nin ja ul txꞌakx chicꞌuꞌl, yi iꞌtz Kataj Ryos yi colol cyetz.
Yi iꞌ yi Wiꞌtz Ryos yi colpinl cyetz.
36 Poro yi eꞌ cyetz, ilenin chiwutz tuꞌ chiplaj tuꞌ tu chiyol.
Na ja xcon eꞌchk balaj yol cyaꞌn, poro nkꞌeraꞌtz bintzi.
37 Nkꞌeꞌtz tzꞌaknak cuꞌn eꞌ tu chijilon.
Na quinin ncheꞌl cuꞌn te chiyol yi nchisuk tetz Ryos.
38 Ma Kataj Ryos, ilenin ja el kꞌajab iꞌ scyeꞌj.
Ja cuy iꞌ chipaj, nin quinin chiquim taꞌn.
Quinin takꞌ amaꞌl tetz yi chiꞌch cꞌuꞌlal yi ncyakꞌ tetz iꞌ.
Ma na ja cuy iꞌ chipaj.
39 Na ja nachon iꞌ teꞌj, yi eꞌ tuꞌ wunak, yi niꞌcuꞌn eꞌ tu cyekꞌekꞌ yi na icyꞌ, nin quiꞌt na ul junt tir.
40 Jat loꞌ tir eꞌ oc tan contriꞌn te Ryos le yi amaꞌl yi tzꞌinunin tuꞌ.
Jat loꞌ tir cyakꞌ chꞌon tetz.
41 Ilenin eꞌ oc tan pileꞌn Ryos.
Nin ja cyakꞌ bis tetz, yi jun, yi chin xan nin iꞌ.
42 Quiꞌt na ul txꞌakx yi porer iꞌ ẍchicꞌuꞌl.
Wech na eꞌ colpij taꞌn ẍchikꞌab yi eꞌ buchul cyetz.
43 Quiꞌt mmuꞌl txꞌakx ẍchicꞌuꞌl yi eꞌchk techl, yi ẍchaj iꞌ scyetz te yi ateꞌ tzaj Egipto.
Quiꞌt ul txꞌakx ẍchicꞌuꞌl, yi eꞌchk milawr, yi bnix taꞌn le ẍkꞌajlaj Zoán cwent Egipto.
44 Wech ja oc cyakil yi tzanlaꞌ tetz chichꞌ.
Nin cyaꞌl nin jun aj Egipto ucꞌaꞌ teꞌj.
45 Ej nin saj ẍchakol jun cꞌoloj neꞌẍ us tan chixuxeꞌn yi eꞌ aj Egipto.
Nin eꞌ saj ẍchakol jun cꞌoloj woꞌ tan poꞌtzeꞌn chiluwar.
46 Nin takꞌ iꞌ amaꞌl scyetz sacꞌ tan bajseꞌn yi wutz yi cyujul, nin tan poꞌtzeꞌn chitxꞌotxꞌ.
47 Nin ja saj jun chin cꞌub aꞌbal taꞌn, tan puchꞌleꞌn cyakil yi eꞌchk wiꞌ uva yi awij cyaꞌn.
Nchaꞌtz ja tzꞌeꞌ cyakil yi ibẍ tan kꞌab cheꞌw.
48 Nin ja chibaj quim cyakil cyawun.
Na ja chiquim chiwacẍ tan yi cꞌub aꞌbal.
Ma chicneꞌr, ja chiquim tan kꞌancyok.
49 Ja saj colp wiꞌ Ryos scyeꞌj yi eꞌ aj Egiptojaꞌtz.
Ja chiꞌch cꞌuꞌl, nin ja icyꞌan iꞌ scyeꞌj.
Chaꞌstzun te eꞌ cweꞌn xituꞌn, cyakꞌun yi eꞌ ángel.
50 Ja ticyꞌsaj iꞌ cꞌuꞌl scyeꞌj, na quinin cuy iꞌ chipaj.
Ja tzun chiquim wiꞌnin eꞌ tan yaꞌbil.
51 Na eꞌ baj quim len cyakil yi bajx chinitxajil yi eꞌ aj Egiptojaꞌtz taꞌn.d
52 Poro tan yi banl talmaꞌ iꞌ, ja cheꞌl tzaj tcyꞌal yi eꞌ tetz tanum.
Choꞌn cunin ncheꞌ tulej yi cyeleꞌn tzaj chi na ban jun pstor scyeꞌj cneruꞌ.
Nin ja bajx cuꞌn iꞌ ẍchiwutz le amaꞌl tzꞌinunin tuꞌ.
53 Xomij nin iꞌ tan chiqꞌuicyꞌleꞌn tan qui chixobeꞌn.
Ma yi chicontr, eꞌ bekꞌxij cyeꞌtz xe mar.
54 Nin ja chuꞌl tcyꞌal yi tetz tanum, le amaꞌl yi chin xan nin yi sukiꞌnt taꞌn scyetz.
Yi eꞌchk amaꞌlaꞌtz, yi xcyeꞌ iꞌ tan cambajeꞌn ẍchikꞌab yi eꞌ contr.
55 Nin ẍchiwutz cunin yi eꞌ tetz tanum, ja cheꞌl lajul yi eꞌ mal nakaꞌtz.
Ma yi chiꞌamaꞌl tu chicaꞌl, nintzun cuꞌ jatxol ẍchiwutz yi coblaj kꞌuꞌj xonl Israelaꞌtz.
56 Poro yi eꞌ tetz tanumaꞌtz, nintzun eꞌ oc tan pileꞌn.
Wech iꞌ yi Ryos yi cyaꞌl na xcyeꞌ quen teꞌj.
Iꞌ yi Ryos yi wiꞌnin kꞌej.
Poro ja choꞌc tan contriꞌn teꞌj, nin tan pajleꞌn yi tetz caꞌwl.
57 Ma yi eꞌ yi nchopon Canaán, niꞌcuꞌn nin nchiban chi banakeꞌ yi eꞌ chimam chiteꞌ, na ja cyaj cyen quilol Ryos, nin quinin kꞌukeꞌ chicꞌuꞌl teꞌj.
Ja jeꞌ txalpuj yi cyajtzaꞌkl chi taneꞌn jun wiꞌ tzeꞌ, yi chin ẍoꞌc nin teꞌj.
58 Nin ja cyakꞌ chiꞌch cꞌuꞌlal tetz Ryos, na ja choꞌc tan cꞌuꞌlajeꞌn eꞌchk muyc, nin ja choꞌc tan cꞌuꞌlajeꞌn eꞌchk ryos yi banij cuntuꞌ quitaneꞌn.
59 Yi tilol Ryos cyakil eꞌchk xtxolbilaꞌtz yi na katzan yi oꞌ xonl Israel tan banleꞌn, ja cheꞌl lajul iꞌ tcwent.
60 Nin ja cyaj cyen tilol iꞌ yi tetz caꞌl yi at le amaꞌl Siló.e
Wech, na yaꞌstzun najbil iꞌ ẍchixoꞌl kamam kateꞌ tentz.
61 Ej nin ja takꞌ iꞌ amaꞌl scyetz yi eꞌ contr tan chicambal yi caẍaꞌ,f
nin ja el kꞌej iꞌ tan paj, na quiꞌct ẍchamil iꞌ taneꞌn.
62 Nin yi sajeꞌn colpuj wiꞌ iꞌ scyeꞌj yi eꞌ tetz tanum, ja takꞌ iꞌ amaꞌl tan chiquimeꞌn ẍchikꞌab yi eꞌ chicontr.
63 Ja chiquim yi eꞌ xicy tkꞌakꞌ.
Chaꞌstzun te wiꞌnin xun qui moꞌc quichmil.
64 Nchaꞌtz yi eꞌ paleꞌ, ja chiquim tan spar, nin quinin eꞌ okꞌ yi quixkel nka chixonl scyeꞌj.
Na quiꞌc chamoꞌn ib bajij scyeꞌj yi chiquimeꞌn.
65 Poro yi teleꞌn kꞌajab Ryos scyeꞌj, ja jal walor chi na jal kawalor yi na el kawatl.
Nka chi na ban jun yaj yi na makꞌtij wankil tan win.
66 Na nin oc iꞌ tan oyintziꞌ scyuchꞌ chicontr.
Nin xcyeꞌ iꞌ scyeꞌj, na nin eꞌ el ojk swutz iꞌ.
Junawes teleꞌn chitxꞌix taꞌn.
67 Poro el chikꞌej yi eꞌ xonl Ẍep taꞌn, na quinin eꞌ jeꞌ xtxaꞌol yi eꞌ tu Efraín, yi xonl Ẍepaꞌtz.
68 Ma na i yi eꞌ xonl Judá, eꞌ jeꞌ xtxaꞌol tan qꞌuicyꞌleꞌn yi caẍaꞌ kale atit yi caꞌwl Ryos.
Nchaꞌtz jeꞌ xtxaꞌol Kataj yi wiꞌwtz Sión tan xconeꞌn tetz najbil iꞌ.
Na yaꞌstzun yi jun amaꞌl yi wiꞌnin na pekꞌ iꞌ teꞌj.
69 Choꞌn tzun bnixeꞌn yi tetz caꞌltz le jun amaꞌlaꞌtz.
Chin wutz tkan nin ban.
Nin ja bixeꞌ taꞌn, chi taneꞌn yi wuxtxꞌotxꞌ yi quil yucan.
70 Nchaꞌtz jeꞌ xtxaꞌol iꞌ yi Luwiy tetz ẍchakum.
Wech, na tal pstor cneꞌr tuꞌ Luwiy.
71 Ja jeꞌ xtxaꞌol, tan xconeꞌn tan chiqꞌuicyꞌleꞌn yi eꞌ tetz tanum, nin tan xconeꞌn tetz chibajxom.
72 Tetz cuꞌn talmaꞌ Luwiy yi moꞌc tan chiqꞌuicyꞌleꞌn.
Nin chin list nin ban iꞌ tan chicaweꞌn.