Yi Kataj Ryos iꞌ maysanl ketz
77
1 Choꞌn na cuꞌ inwutz tetz Ryos.Nin na chinẍchꞌin, tan tbital iꞌ yi intziꞌ inkul.
2 Na te yi na chimbisun, na noꞌc tan joyleꞌn iꞌ.
Nin cyakil akꞌbal na jeꞌ inkꞌab tan nachleꞌn iꞌ.
Na qui na jal tzatzin waꞌn.
3 Yi na noꞌc tan xtxumleꞌn Ryos, at na ban cuꞌnt na nokꞌ nin na chimbisun, tan paj i cuꞌn qui xomij iꞌ sweꞌj.
4 Wajcaw, qui na takꞌuꞌ amaꞌl tan inwiteꞌn.
Nin tan paj bis, quiꞌt na jal puntil yol waꞌn.
Na ja chin loꞌon, na innach.
5 Nkꞌeꞌtz choꞌn wutaneꞌn chi wutaneꞌn sajleꞌn.
6 Na yi sajleꞌn, na wakꞌ inkꞌajsbil teruꞌ cyakil akꞌbal.
Nin nchaꞌtz na noꞌc tan xtxumleꞌn tincꞌuꞌl cuntuꞌ, cyakil yi balajiluꞌ. Nin na waltz:
7 “¿Ja peꞌ neꞌl te cꞌuꞌl yi Wajcaw?
¿Ilenin peꞌ ẍchiꞌchok cꞌuꞌl iꞌ sweꞌj?
8 ¿Qui peꞌ tzꞌel kꞌajab iꞌ sweꞌj?
¿Quiꞌt peꞌ tzꞌel kꞌab iꞌ te yi yol yi suknak?
9 ¿Quiꞌct poloꞌ banl talmaꞌ Ryos jaluꞌ?
¿Tan paj yi sajnak colpuj wiꞌ iꞌ, quiꞌt poloꞌ tzꞌel kꞌajab te jun wunak?”
10 Poro yi mas chꞌon yi na wil iꞌtz, yi nkꞌeꞌtz niꞌcuꞌn taneꞌn Kataj skeꞌj chi bank iꞌ sajleꞌn.
11 Poro tzꞌul txꞌakx tincꞌuꞌl cyakil eꞌchk takleꞌn balaj yi banak yi wiꞌtz Ajcaw sajleꞌn.
12 Nin nocopon tan xtxumleꞌn cyakil yi eꞌchk balaj milawr yi bnixnak taꞌn. Nin tzintxoleꞌ cyakil cuꞌn.
13 Iluꞌ kaRyosil chin tzꞌaknak cuꞌn iluꞌ te cyakil eꞌchk takleꞌn yi na banuꞌ.
Quiꞌc nin junt ryos yi niꞌcuꞌn porer tu yi teruꞌ.
14 Na yi iluꞌ teruꞌ, wiꞌnin eꞌchk balaj milawr na bnix tanuꞌ.
Nin ja ẍchajuꞌ yi poreruꞌ scyetz cyakil jilwutz wunak, beneꞌn tziꞌn wi munt.
15 Na tan yi poreruꞌ, ja cheꞌl tzaj tcyꞌaluꞌ yi teruꞌ tanumuꞌ.
Ja xcyeꞌuꞌ tan chicolpeꞌn yi eꞌ xonl Jacow tu yi eꞌ xonl Ẍep.
16 Iluꞌ inRyosil, yi cawuneꞌnuꞌ tan cweꞌn cabsal tib yi mar, ja tbit yi yoluꞌ, na ja xob teruꞌ.a
17 Ja cawunuꞌ tan sajeꞌn aꞌbal, nin ja saj.
Ja jal xlitzꞌ tu kꞌancyok beneꞌn tziꞌn, nin ja saj jun chin aꞌbal tanuꞌ.
18 Ja quibit cyakil wunak beneꞌn tziꞌn yi eꞌchk kꞌancyok yi ncuꞌ.
Nchaꞌtz chin txekun nin ban beneꞌn tziꞌn tan yi eꞌchk xlitzꞌ.
Nin tircuꞌn yi wuxtxꞌotxꞌ, ja yucan tan yi eꞌchk coblajnob.
19 Ja cuꞌ cabsaluꞌ yi mar, nin ja icyꞌuꞌ tul.
Poro cyaꞌl jun na jalsan yi tkambeꞌnuꞌ.
20 Nin yi iluꞌ teruꞌ, ja bajxcuꞌnuꞌ ẍchiwutz yi teruꞌ tanumuꞌ, chi na ban jun pstor ẍchiwutz yi tawun.
Yaꞌstzun ntulejuꞌ tan Moisés tu Aarón.