Kataj Ryos iꞌ yi wiꞌtz ajtxꞌaconl
76
1 Ja el chitxum cyakil yi eꞌ aj Judá tetz yi naꞌ scyetz iꞌ Ryos.Na yi tetz biꞌ, ilenin na tzan naꞌwseꞌn ẍchixoꞌl cyakil yi eꞌ xonl Israel.
2 Nin yi tetz caꞌl, choꞌn at le tnum Jerusalén, yi choꞌn at wiꞌwtz Sión.
3 Choꞌn chiloꞌoneꞌn yi eꞌ tetz contr taꞌn le yi jun wiꞌwtzaꞌtz.
Choꞌn xcyeweꞌn iꞌ tan xiteꞌn chimaꞌcl tetz oyintziꞌ, chi taneꞌn yi makbil flech tu yi eꞌchk spar nin yi cꞌoxbil flech.
Tircuꞌn loꞌoneꞌn taꞌn.
4 Wajcaw, chumbalaj nin banl talmaꞌuꞌ.
Icyꞌnakt cuꞌn yi balajiluꞌ swutz yi eꞌchk wiꞌwtz yi chumbalaj nin.
5 Poro ja el chikꞌej yi eꞌ yi na cyocsaj quib chin cham nin eꞌ.
Ja el chiwalor cyakil yi eꞌ contruꞌ tanuꞌ. Tircuꞌn nchiloꞌon.
6 Nin yi na cawunuꞌ Taꞌ, yi iluꞌ Ryosil kꞌajtzun Jacow, quiꞌc jun yi quiꞌk na xob teruꞌ, na nicyꞌ nin yi eꞌchk careꞌt tu eꞌchk chej, quiꞌt na chixon yi na jilonuꞌ.
7 Wajcaw, chin xoꞌwbil nin wutzuꞌ.
¿Naꞌ scyetz jun yi at rmeril tan toponeꞌn swutzuꞌ, te yi na saj colp wiꞌuꞌ? Cyaꞌl.
8 Na choꞌn na cawun tzajuꞌ jalen tziꞌn tcyaꞌj, nin cyakil yi eꞌ yi ateꞌ wuxtxꞌotxꞌ na chixob, nin quiꞌc na chibaneꞌn swutzuꞌ.
9 Poro Taꞌ, ¿tonaꞌ tzꞌocuꞌ tan chicolcheꞌn, yi eꞌ tal prow yi buchijcheꞌ, yi ateꞌ beneꞌn tziꞌn wi munt?
10 Yi na chiꞌch chicꞌuꞌl wunak teꞌjuꞌ, ilenin na jal kꞌejuꞌ taꞌn.
Quiꞌc na ban mpe muꞌẍeꞌnk na chiꞌch chicꞌuꞌl teꞌjuꞌ, mast cunin na jal kꞌejuꞌ taꞌn.
11 Ma jaluꞌ, baꞌn yi kol chisukuꞌ jun chiyoluꞌ tetz Kataj yi kaRyosil, poro tajweꞌn yil cheꞌl cuꞌnuꞌ teꞌj.
Nchaꞌtz cyakil yi eꞌuꞌ yi na chixobuꞌ tetz kaRyosil, ulk eꞌchk oy cyanuꞌ swutz iꞌ.
12 Na yi Kataj iꞌ yi wiꞌtz Ajcaw.
Na ko na taj iꞌ, baꞌn chiquim yi eꞌ wiꞌtz ajcaw taꞌn.
Nin ko na taj iꞌ, baꞌn tzꞌoc tan chixoꞌwseꞌn cyakil yi eꞌ rey yi ateꞌ beneꞌn tziꞌn wi munt.