Kataj Ryos iꞌ yi wiꞌtz pujul xtisyaꞌ
75
1 Iluꞌ kaRyosil, nternin na katyoẍin teruꞌ.Na katyoẍin teruꞌ, nin na kanaꞌwsaj yi biꞌuꞌ, nin na kakꞌ kakꞌajsbil teruꞌ, na wiꞌnin eꞌchk takleꞌn balaj yi bnixnak tanuꞌ skeꞌj.
2 Ej nin je yol Katajeꞌj: “Yil bixeꞌ yi tiemp waꞌn tan woqueꞌn tan pujleꞌn xtisyaꞌ quil jeꞌ inkꞌab twiꞌ jun.
3 Na yil bajij wiꞌnin eꞌchk takleꞌn beneꞌn tziꞌn, yi quiꞌt pujx cyakꞌun wunak yi mbil chiban, tzinchajeꞌ yi i inaꞌtz yi jun yi na chincawun tibaj cyakil.”
4 Poro swaleꞌ nin tzitetz yi axwok, yi na itocsaj itib nim, tu yi axwok mal nak:
“Quil tzitocsaj itib nim tu itajtzaꞌkl.
5 Nin quil tzitocsaj itib nim tu yi caꞌwl yi at tikꞌab.
Nin qui tzitelsaj kꞌej jun tu cxjilon,” chij Kataj ban scyetz.
6 Na nkꞌeꞌtz choꞌn na saj yi ẍchꞌeybil ketz teleꞌn tziꞌn, nka toqueꞌn tziꞌn.
Nin nkꞌeꞌtz choꞌn na saj le eꞌchk amaꞌl yi at cweꞌn tziꞌn.
7 Ma na choꞌn na saj teꞌtz tu Ryos, yi wiꞌtz pujul xtisyaꞌ.
Na ko na taj iꞌ, baꞌn takꞌ chikꞌej cobox.
Nin ko na taj iꞌ, baꞌn tzꞌel chikꞌej cobox taꞌn.
8 List atit Kataj tan takꞌleꞌn chicaws yi eꞌ juchul il.
Chin xkolum nin sbneꞌ yi chicaws.
Na niꞌcuꞌn sbneꞌ chi na cuꞌ yujij wenen tul win.
Nin cyakil wunak yi ateꞌ beneꞌn tziꞌn, ẍchitijeꞌ yi jun cawsaꞌtz.
9 Poro yi in wetz, ilenin tzintxoleꞌ yi balajil yi Ryosil kꞌajtzun Jacow.
Nin ilenin swakꞌeꞌ inkꞌajsbil tetz iꞌ.
10 Na iꞌ tzꞌocopon tan chisotzajeꞌn yi eꞌ mal nak, scyuchꞌ yi eꞌ yi na cyocsaj quib nim tu cyajtzaꞌkl.
Poro tzꞌocopon iꞌ tan takꞌleꞌn mas kakꞌej, yi oꞌ yi na kaban yi eꞌchk takleꞌn balaj.