Baꞌn kajak ẍchꞌeybil ketz tetz Ryos tan keleꞌn liwr ẍchikꞌab yi eꞌ kacontr
74
1 Wajcaw, yi iluꞌ kaRyosil,¿ja peꞌ keꞌl junawes te cꞌuꞌluꞌ?
¿Mbi tzuntz yi ja koꞌ cyaj cyen tiloluꞌ?
Wech na txaꞌij choꞌt bin tanuꞌ taneꞌn.
2 Wajcaw, ulk txꞌakx yi tanumuꞌ tcꞌuꞌluꞌ.
Yi tanumuꞌ yi ja je xtxaꞌoluꞌ tenẍchan.
Yi tanumuꞌ yi ja xcyeꞌuꞌ tan colpeꞌn.
Ej nin ulk txꞌakx tcꞌuꞌluꞌ yi mbi mbajij le wiꞌwtz Sión kale nnajeweꞌtuꞌ.
3 Na yi kaꞌamaꞌl, ja el cuꞌn swutz.
Ja el cuꞌn swutz cyakꞌun kacontr.
Tircuꞌn yi caꞌluꞌ ja loꞌon.
4 Ej nin yi eꞌ contruꞌ, ateꞌ xe yi caꞌluꞌ.
Nin na chiẍchꞌin tan yi tzatzin yi ateꞌ cuꞌnt, tan tuꞌ yi ja chixcyeꞌ skeꞌj.
Ja wiꞌt jeꞌ eꞌchk chibandera swutz yi sawanil yi caꞌluꞌ.
5 Taꞌ, ja choꞌc tan xiteꞌn cyakil yi at xe yi caꞌluꞌ.
Ja baj chitzecꞌol tan xbil tu martiy, cyakil yi eꞌchk yubel yi caꞌluꞌ yi banij tan tzeꞌ.
6 Choꞌn cunin quitaneꞌn tan xiteꞌn chi na ban jun yaj tan cuꞌseꞌn eꞌchk tzeꞌ wi jun cojbil.
7 Ej nin nchaꞌtz ja oc kꞌaꞌkl tircuꞌn cyaꞌn.
Ja el kꞌej yi caꞌluꞌ cyaꞌn na ja cuꞌ chixitul tircuꞌn.
8 Nchaꞌtz Taꞌ, nkꞌeꞌtz ntinaꞌtz, ma na ja baj chixitul cyakil yi eꞌchk caꞌl kale na koqueꞌt tan cꞌuꞌlajeꞌnuꞌ.
9 Quiꞌt na jal yi eꞌchk takleꞌn yi at xeꞌ.
Ej nin quiꞌct eꞌ elsanl stziꞌuꞌ at skaxoꞌl jaluꞌ.
Ej nin qui na el katxum tetz yi tonaꞌ tzaj wiꞌ cyakil eꞌchk ilaꞌtz.
10 Ma jaluꞌ iluꞌ kaRyosil,
¿tonaꞌ nin yil keꞌl liwr ẍchikꞌab yi eꞌ kacontraꞌtz?
¿Tonaꞌ nin yi quiꞌt takꞌuꞌ amaꞌl scyetz tan cyoqueꞌn tan telseꞌn kꞌejuꞌ?
11 ¿Mbi tzuntz yi qui na ẍchajuꞌ yi poreruꞌ scyetz?
¿Mbi tzuntz yi quiꞌc na takꞌ cyenuꞌ tan takꞌleꞌn chicaws?
12 Na sajleꞌn tunintz iluꞌ yi ketz kaRyosil, nin ja xcyeꞌuꞌ scyeꞌj wiꞌnin kacontr yi ateꞌ beneꞌn tziꞌn wi munt.
13 Ej nin tan yi teruꞌ poreruꞌ, ja cuꞌ jatxoluꞌ yi mar.
Nin ja xcyeꞌuꞌ te jun yi i cuꞌn txuc taneꞌn yi at xe mar.
14 Nin ja ben joꞌliluꞌ yi wankil tul jun amaꞌl tzꞌinunin tuꞌ, tetz chiwaꞌ yi eꞌ smaron txuc.
Nin ja xcyeꞌuꞌ tan yakꞌpeꞌn eꞌchk wiꞌ yi Leviatán, yi jun chin txuc yi at xe mar.
15 Nchaꞌtz iluꞌ bnol tetz yi eꞌchk tzanlaꞌ tu eꞌchk kꞌab aꞌ, yi at beneꞌn tziꞌn.
Poro nchaꞌtz ko yaꞌtz tajbiluꞌ, iluꞌ na tzajsan cuꞌn.
16 Iluꞌ txumul tetz yi tkan skil tu yi tzꞌoꞌtz, na iluꞌ bnol tetz yi kꞌej tu yi xaw.
17 Nin iluꞌ txumul tetz yi tiemp tetz kꞌalaj tu yi tiemp tetz cresum.
Na iluꞌ bnol tetz yi munt, nin na tiluꞌ yi maꞌlbil.
18 Wajcaw, ulk txꞌakx tcꞌuꞌluꞌ, yi ilenin na tzan yi contruꞌ tan telseꞌn kꞌejuꞌ.
Nin wiꞌnin eꞌ yab na chitzan tan talcheꞌn yi quiꞌc xacuꞌ.
19 Ej nin oꞌ eliꞌch te cꞌuꞌluꞌ.
Na yi oꞌ ketz, quiꞌc ketz kawalor.
Niꞌcuꞌn oꞌ tu jun tal plomẍ.
Chaꞌstzun te quil takꞌuꞌ amaꞌl tan kaloꞌoneꞌn cyakꞌun yi eꞌ yi i cuꞌn cyuchꞌ yi smaron txuc.
20 Ulk txꞌakx tcꞌuꞌluꞌ yi yoluꞌ yi suknakuꞌ sketz, na wiꞌnin biyol nak beneꞌn tziꞌn.
21 Quil takꞌuꞌ amaꞌl tan teleꞌn chikꞌej cyakil yi eꞌ tal prow, yi eꞌ yi buchijcheꞌ.
Ma na nink choꞌc tan takꞌleꞌn kꞌejuꞌ.
22 Ma jaluꞌ iluꞌ kaRyosil, okuꞌ il teꞌj.
Na sak swutzuꞌ, yi cyakil kꞌej na chitzan yi eꞌ mal nak tan telseꞌn kꞌejuꞌ.
23 Na yi eꞌaꞌtz, nternin na chiẍchꞌin tan telseꞌn kꞌejuꞌ.
Nin cyakil kꞌej, na chitzan tan joyleꞌn puntil tan tocseꞌn chicꞌuꞌl mas wunak tan telseꞌn kꞌejuꞌ.
Baꞌn tcuꞌn takꞌuꞌ chicaws.