TOXIꞌN WEKL TE EꞌCHK SALMO
73:1—89:52
Yi banl talmaꞌ Ryos
73
1 Chumbalaj nin yi ketz kaRyosil skeꞌj, yi oꞌ xonl Israel, yi oꞌ yi skoj cuꞌn te kalmaꞌ.2 Muꞌẍt qui nchincuꞌ wuxtxꞌotxꞌ.
Muꞌẍt qui nchinjeꞌ jiẍp,
3 tan paj yi ja chiꞌch incꞌuꞌl scyeꞌj yi eꞌ mal nak, yi eꞌ yi wiꞌnin jaleꞌn chipuꞌk, yi eꞌ yi na cyocsaj quib nim tu cyajtzaꞌkl.
4 Qui na chitxum yi nink chiquim, na quiꞌc yaꞌbil scyetz.
5 Qui na sotz chicꞌuꞌl.
Quiꞌc na chibislej, na at tircuꞌn scyuchꞌ.
6 Chaꞌstzun te na cyocsaj quib nim tu cyajtzaꞌkl.
Ej nin ntin chibuchleꞌn yi eꞌ mas wunak cyakꞌun.
7 Chin xoꞌwbil nin chiwutz, na ja saj chin chicꞌatzaj.
Nin ntin xtxumleꞌn eꞌchk yab ajtzaꞌkl cyaꞌn.
8 Na na chitzeꞌen skeꞌj. Nin na cyocsaj quib nim.
Nin na chitzol kayol, yi na choꞌc tan kaxoꞌwseꞌn.
Nin na cyal yi chocopon tan kabiyleꞌn.
9 Na choꞌc tan telseꞌn kꞌej cyakil yi at tcyaꞌj.
Nin na choꞌc tan yolcheꞌn cyakil yi at beneꞌn tziꞌn wi munt.
10 Chaꞌstzun te at wiꞌnin tanum Ryos yi na xom chiwiꞌ scyeꞌj, na quiꞌc chipaltil na quil nin.
11 Nin je na cyal yi eꞌ mal nakaꞌtz:
“¿Tzꞌelepon peꞌ xtxum yi wiꞌtz Ajcaw sketz? ¡Quiꞌ bin!
¿Stileꞌ peꞌ yi mbil kaban? ¡Quiꞌ bin!” cheꞌch.
12 Yaꞌstzun quitaneꞌn yi eꞌ mal nakaꞌtz.
At cyakil yi tajweꞌn scyetz, poro ilenin ẍkan tzaj nink na cyaj.
13 Chaꞌstzun te na noꞌc tan xtxumleꞌn, yi quiꞌc na takꞌ swetz yi na injoy puntil tan qui injuchul wil.
14 Na quiꞌc nin jun tkuj yi quiꞌk bis oꞌkl tzinwutz.
Nin quiꞌc nin jun kꞌej yi quiꞌk na ul incaws.
15 Poro Taꞌ, yi nink nchinxom te chitxumuꞌn yi eꞌ mal nakaꞌtz, ja kloꞌ el chikꞌej yi eꞌ nitxajiluꞌ waꞌn.
16 Ja noꞌc tan xtxumleꞌn, yi mbi tzuntz na chiriquin yi eꞌ wunakaꞌtz.
Poro qui nin meꞌl intxum tetz.
17 Ja el intxum tetz, poro jalen yi woponeꞌn xe caꞌluꞌ Taꞌ.
Ja el intxum tetz yi naꞌl choponeꞌt yi eꞌaꞌtz.
18 Na ntin at pasensuꞌ scyeꞌj.
Na tzꞌopon jun kꞌej yi ẍchijepon trimp nin ẍchitzajk junawes.
19 Yi eꞌaꞌtz, ẍchitzajk junawes.
Na yil tzꞌopon yi chiꞌoril ẍchixitok cyeraꞌtz tan xoꞌw.
20 Yaꞌstzun sbajok scyeꞌj yil cawunuꞌ.
Na choꞌn cunin ẍchibneꞌ yi eꞌ mal nakaꞌtz chi na ban yi na wit jun.
Na quil tzꞌicyꞌ scyetz yil tzꞌocuꞌ tan takꞌleꞌn chicaws.
Tzꞌakꞌlok chicaws, na qui na pekꞌuꞌ te chitxumuꞌn.
21 Poro yi in wetz, ja chimbisun, nin ja skej intziꞌ, tan paj yi sotzaj cꞌuꞌlal yi atin cuꞌnt.
22 Poro iꞌtz tan paj yi quinin el intxum tetz yi tajbiluꞌ Wajcaw.
Na niꞌcuꞌn mimban swutzuꞌ chi taneꞌn jun txuc yi quiꞌc tajtzaꞌkl.
23 Ma jaluꞌ ntyoẍtuꞌ yi ja el intxum tetz, yi baꞌn yi xomchin teꞌjuꞌ, na chꞌinuꞌn chin tanuꞌ.
24 Nin na tzanuꞌ tan ẍchajleꞌn yi eꞌchk balaj ajtzaꞌkl swetz.
Ej nin sjalok inkꞌej yil nopon swutzuꞌ.
25 Cyaꞌl jun at tcyaꞌj yi list tan wuchꞌeyeꞌn, ntin cuꞌn iluꞌ.
Yi ko yaꞌtz, quiꞌc bin na takꞌ yi eꞌchk takleꞌn tetz tzoneꞌj wuxtxꞌotxꞌ.
26 Or chin tzaj, na innach.
Poro xomijuꞌ sweꞌj Wajcaw. Nin at ninuꞌ tan wuchꞌeyeꞌn.
27 Poro cyakil yi eꞌ yi quil chixom te tajbiluꞌ, chisotzok cyeraꞌtz.
Nchaꞌtz cyakil yi eꞌ yi quil kꞌukeꞌ chicꞌuꞌl teꞌjuꞌ, ẍchitzajk tanuꞌ.
28 Poro yi in wetz, chinxomok teꞌjuꞌ.
Na yaꞌstzun yi mas balaj.
Na iluꞌ Wajcaw, iluꞌ inRyosil, nin iluꞌ colol wetz.
Chaꞌstzun te tajweꞌn tan intxolil cyakil yi eꞌchk takleꞌn balaj yi ja bnix tanuꞌ.