Nachleꞌn Kataj tibaj kareyil
72
1 Iluꞌ inRyosil, na waj yil tzinjak jun wajbil teruꞌ.Nin yi wajbil iꞌtz yil takꞌuꞌ yi balajil tu tajtzaꞌkl yi kareyil,
2 bantz skꞌil cunin cawun iꞌ skibaj yi oꞌ tanumuꞌ, nin squibaj cyakil yi eꞌ tal prow yi at tajweꞌn scyetz.
3 Tan tuꞌ yi chin skꞌil cunin yil cawun iꞌ, lok jal tzatzin paz beneꞌn tziꞌn.
Lok jal tzatzin paz jeꞌn tziꞌn wiꞌwtz nin xoꞌlak wutz.
4 Lok xom wiꞌ iꞌ scyeꞌj yi eꞌ tal prow meꞌbaꞌ.
Nink tzꞌel kꞌajab scyeꞌj yi eꞌ chinitxajil.
Poro nink tzꞌel chikꞌej yi eꞌ yi na chitzan tan chibuchleꞌn yi eꞌ tal prowaꞌtz.
5 Ej nin yi wajbil iꞌtz: yi nink tek ẍchiꞌ yi kareyil yi teruꞌ caꞌwluꞌ.
Nink xom te yi teruꞌ tajbiluꞌ, jalen yil sotz yi kꞌej tu yi xaw.
6 Choꞌnk tzꞌan yi cawun iꞌ, chi na ban yi aꞌbal, yi na cuꞌ beneꞌn tziꞌn, nin yi na xcyeꞌ tan tacꞌseꞌn cyakil eꞌchk amaꞌl.
Choꞌnk tzꞌan yi cawun iꞌ chi na ban yi kꞌab cheꞌw, yi na xcyeꞌ tan tacꞌseꞌn yi wuxtxꞌotxꞌ.
7 Nink jal tzatzin paz te yi tiemp yil cawun iꞌ.
Chumbalaj nink tzꞌan tircuꞌn yil cawun iꞌ, jalen cuꞌn yil sotz yi xaw yi at tcyaꞌj.
8 Nin yil cawun iꞌ, nink tzꞌopon cuꞌn yi caꞌwl jalen tzi mar, nin jalen te yi wutzileꞌn tzanlaꞌ Eufrates, nin beneꞌn tziꞌn wi munt.
9 Ej nin cyakil yi eꞌ tetz contr, yi ateꞌ le eꞌchk amaꞌl tzꞌinunin tuꞌ, nink choꞌc jakꞌ caꞌwl iꞌ.
10 Chuꞌl cyakil yi eꞌ bajxom tan toyeꞌn, nin tan ẍchojleꞌn alcawal tetz yi kareyil.
Chuꞌl cyakil, chi taneꞌn yi rey tetz Tarsis tu yi rey tetz eꞌchk isla tu yi rey tetz Sabá, tu yi rey tetz Seba.
11 Tajweꞌn chimejeꞌ yi eꞌ mas rey swutz yi ketz kareyil.
Nin tajweꞌn tan cyakꞌol cyakil wunak kꞌej iꞌ.
12 Na iꞌ tzꞌocopon tan quichꞌeyeꞌn yi tal prow yil cuꞌ chiwutz tetz.
Nin tzꞌocopon iꞌ tan quichꞌeyeꞌn yi eꞌ yi cyaꞌl na pekꞌ tan quichꞌeyeꞌn.
13 Tzꞌel pon kꞌajab scyeꞌj yi eꞌ tal prow yi quiꞌc nin ateꞌt cuꞌnt.
Nin nchaꞌtz tzꞌocopon tan chicolcheꞌn ẍchikꞌab yi chicontr.
14 Tzꞌelepon kꞌajab scyeꞌj yi eꞌ yi buchijcheꞌ.
Nin tzꞌelepon kꞌajab scyeꞌj yi eꞌ yi chin qꞌuixcꞌuj nin quitaneꞌn.
Na at len chixac cyakil wunak swutz iꞌ.
15 Kakꞌeꞌ bin kꞌej yi kareyil.
Lok cyakꞌ yi eꞌ aj Sabá oro tetz.
Lok chocopon wunak tan jakleꞌn yi banl iꞌ tetz Ryos.
16 Nin nchaꞌtz lok jal wiꞌnin ixiꞌn triw.
Lok jal jeꞌn tziꞌn wiꞌwtz.
Lok chꞌuy chi taneꞌn yi eꞌchk tzeꞌ Líbano.
Lok jal jun cꞌoloj wutz, chi na jal eꞌchk xtzeꞌ wutz wutz.
17 Nink ben ẍkon yi tiemp yi kareyil tan cawuneꞌn tzoneꞌj.
Quiꞌk sotz, chi qui na sotz yi kꞌej.
Nink jal chibanl yi eꞌchk mas nación taꞌn, bantz cyakꞌol yi baꞌn teri yi jun reyaꞌtz.
18 Kakꞌeꞌ bin kꞌej yi kaRyosil, yi ketz kaRyosil yi oꞌ xonl Israel.
Na ntin iꞌ na xcyeꞌ tan banleꞌn eꞌchk milawraꞌtz.
19 Kakꞌeꞌ bin kꞌej yi tetz biꞌ tetz ben kꞌej ben sak.
Na scyaleꞌ cyakil wunak beneꞌn tziꞌn wi munt:
“Chumbalaj nin iꞌ.” ¡Amén!
20 Choꞌn na tzaj wiꞌ yi eꞌchk oración yi rey Luwiy tzoneꞌj, yi jun Luwiyaꞌtz yi cyꞌajl Isaí.