Yi mbi tal jun tijlcꞌuꞌlal yi toqueꞌn tan nachleꞌn Kataj
71
1 Wajcaw, ntin teꞌjuꞌ na incolwit wib.Chaꞌstzun te bneꞌuꞌ pawor, quil chin tilcyenuꞌ.
2 Chin coleꞌuꞌ, na na waj neꞌl liwr ẍchikꞌab incontr.
Chin coleꞌuꞌ, na yi iluꞌ teruꞌ chin tzꞌaknak cuꞌn iluꞌ.
Tbiteꞌuꞌ yi intziꞌ inkul, na na cuꞌ inwutz teruꞌ tan toqueꞌnuꞌ tan incolcheꞌn.
3 Okuꞌ tetz colol wetz chi na ban jun amaꞌl kale na chicolwit quib yi eꞌ wunak ẍchikꞌab chicontr.
Okuꞌ tetz jun amaꞌl kale tzincolwit wib wetz.
4 Iluꞌ inRyosil, chin coleꞌuꞌ ẍchikꞌab yi eꞌ mal nak.
Chin coleꞌuꞌ ẍchikꞌab yi eꞌ biyol nak, yi eꞌ yi jalcuꞌn na choꞌc tan kabiyleꞌn.
5 Chin coleꞌuꞌ Taꞌ, iluꞌ Wajcaw. Na jetz yi inxiquil tzaj, choꞌn kꞌuklij incꞌuꞌl teꞌjuꞌ yi tzꞌocoponuꞌ tan wuchꞌeyeꞌn.
Nin yaꞌtz nin ntulejuꞌ-tz.
6 Wajcaw, te yi ntaxk nitzꞌij, te yi atin twankil intxuꞌ, sken ocuꞌ tan wuchꞌeyeꞌn.
Na ntin tan yi teruꞌ poreruꞌ ja nitzꞌij.
Swakꞌeꞌ tzun inkꞌajsbil teruꞌ.
7 Yi nchintxꞌacon, ja cheꞌl yab wunak sweꞌj.
Poro iꞌtz tan tuꞌ yi mmoꞌcuꞌ tan wuchꞌeyeꞌn.
8 Chaꞌstzun te cyakil nin kꞌej, na chintzan tan takꞌleꞌn inkꞌajsbil teruꞌ, nin na chintzan tan takꞌleꞌn kꞌejuꞌ.
9 Quiꞌk chin tilcyenuꞌ yil tijin incꞌuꞌl.
Quiꞌk tzꞌel inkꞌej.
Quiꞌk chin takꞌ cyenuꞌ inchuc, yil baj inwalor.
10 Na cyakil yi eꞌ incontr, nternin na chitzan tan joyleꞌn puntil tan imbiyleꞌn cuꞌn.
Nin junit mban chitxumuꞌn tan imbiyleꞌn cuꞌn.
Je chiyoleꞌj:
11 “Or, kajoyeꞌ puntil tan stzꞌamleꞌn cuꞌn.
Nin yil txꞌamxij kaꞌn, baꞌn kabiy cuꞌn, na quiꞌct Ryos at tan colcheꞌn iꞌ,” cheꞌch.
12 Iluꞌ inRyosil, qui bin chin tilcyenuꞌ.
Sajkuꞌ lajkeꞌl tan wuchꞌeyeꞌn. Chin coleꞌuꞌ.
13 Ma yi eꞌ incontraꞌtz, lok tzꞌel cyetz chitxꞌix, lok cheꞌl cuꞌn tanuꞌ swutz.
Bneꞌuꞌ pawor, cheꞌ xit cunuꞌ.
Na yi cyetz cyajbil, iꞌtz yil chinquim cyaꞌn.
14 Poro yi in wetz, quil chinquim.
Nin ilenin kꞌuklij incꞌuꞌl yi tzꞌocoponuꞌ tan incolcheꞌn.
Chaꞌstzun te ilenin swakꞌeꞌ inkꞌajsbil teruꞌ.
15 Cyakil nin kꞌej, swaleꞌ yi ja ocuꞌ tan incolcheꞌn ẍchikꞌab yi eꞌ incontr.
Swaleꞌ yi balajiluꞌ.
Qui na pujx waꞌn yi mbi tzuntz yi ja chinclax tanuꞌ.
Poro ilenin swakꞌeꞌ inkꞌajsbil teruꞌ.
16 Nchaꞌtz tzintxoleꞌ cyakil yi eꞌchk takleꞌn balaj yi na banuꞌ.
Swaleꞌ cyakil yi xtxolbilaꞌtz, na ntin iluꞌ teruꞌ, chin tzꞌaknak cuꞌn iluꞌ.
17 Iluꞌ inRyosil, jetz yi injuyil tzaj, ja ẍchajuꞌ yi balaj ajtzaꞌkl swetz.
Nin quinin chinkꞌeꞌxij tan talcheꞌn yi mbi mbanuꞌ sweꞌj.
18 Qui bin chin tilcyenuꞌ.
Ja nin chimbiꞌẍin, nin ja nin sakin xiꞌil inwiꞌ, poro qui nin nchin tilcyenuꞌ.
Tajweꞌn bin tan intxolil yi balajiluꞌ tu yi poreruꞌ, scyetz cyakil yi wunakeꞌj, scyuchꞌ yi eꞌ yi txeꞌn chitzꞌij.
19 Na yi balajiluꞌ, chumam nin, na na jepon cuꞌn jalen tcyaꞌj.
Quiꞌc junt yi choꞌnk chi iluꞌ teruꞌ Taꞌ.
Na wiꞌnin eꞌchk takleꞌn balaj na bnix tanuꞌ.
20 Ilenin ja ul sotzaj cꞌuꞌlal tzinwutz.
Ja takꞌuꞌ amaꞌl tan imbisuneꞌn.
Poro tyoẍtuꞌ teruꞌ, itzꞌineꞌt jaluꞌ.
Ej nin mpe nink chinquim, nitzꞌok junt tir tanuꞌ.
21 Poro jaluꞌ, ja jal junt tir inkꞌej tanuꞌ, na ja ocuꞌ tan inmayseꞌn tkꞌab sotzaj cꞌuꞌlal.
22 Chaꞌstzun te ilenin swakꞌeꞌ inkꞌajsbil teruꞌ.
Swakꞌeꞌ kꞌejuꞌ. Chimbitzink tu inarpa tu insalterio, na iluꞌ kaRyosil yi oꞌ xonl Israel.
23 Chintzatzink, yil wakꞌ inkꞌajsbil teruꞌ.
Tetz cuꞌn walmaꞌ yil wakꞌ, na ja chinclax tanuꞌ.
24 Ej nin cyakil tkuj swaleꞌ, yi chumbalaj ninuꞌ, nin yi chin tzꞌaknak cuninuꞌ, na yi eꞌ, yi ja choꞌc tan joyleꞌn puntil tan inquimeꞌn, eꞌ teꞌn meꞌl chitxꞌix.
Na eꞌ teꞌn nchibaj tul yi cyajtzaꞌkl yi nchitxum sweꞌj.