Yi Kataj Ryos, iꞌ chꞌeyanl ketz
91
1 Alchok scyetz yi choꞌn najlij tmujil yi qꞌuicyꞌlom ketz, yi Wiꞌtz Ryos, yi jun yi wiꞌnin kꞌej,2 baꞌn tal tetz:
“Iluꞌ inRyosil, nternin kꞌuklij incꞌuꞌl teꞌjuꞌ, na iluꞌ chꞌeyanl wetz, nin choꞌn na jal inchamil teꞌjuꞌ Taꞌ.”
3 Baꞌn cyal yi jun xtxolbilaꞌtz, na xcyek Kataj Ryos tan kacolcheꞌn tan qui kabeneꞌn tul eꞌchk paꞌtx yi banijt skawutz, yi qui na kil nin.
Na ntin cuꞌn iꞌ na xcyeꞌ tan kacolcheꞌn tkꞌab eꞌchk yaꞌbil yi cyꞌaꞌn quimichil taꞌn.
4 Na kol kacol kib jakꞌ xicyꞌ iꞌ, quiꞌc lkaban, na na xcyeꞌ iꞌ tan kacolcheꞌn chi na ban jun makbil flech. Chumbalaj nin iꞌ skeꞌj, na na koꞌ col.
5 Qui tzun kaxob tetz yi taw akꞌbal, mpe ik eꞌchk flech, yi skꞌejl cunin na saj cꞌoxij tan kabiyleꞌn.
6 Nchaꞌtz quil kaxob tetz eꞌchk il yi na oc noj skeꞌj lakꞌbal nka te eꞌchk il yi na ul tan kasotzajeꞌn skꞌejl.
7 Nin quil kaxob kol chiquim jun mil le kamax, nka lajuj mil le kasbal, na quiꞌc lbajij skeꞌj ketz.
8 Ma yi oꞌ ketz ntin xmayiꞌn skabneꞌ nin scyeꞌj. Na skawutz cunin yil chicawsij yi eꞌ mal nak, yi eꞌ yi na chiban yi eꞌchk takleꞌn cachiꞌ.
9 Na yi oꞌ ketz, ja wiꞌt koꞌc tcwent Ryos, yi chꞌeyal ketz, ja wiꞌt koꞌc tcwent yi qꞌuicyꞌlom ketz, yi jun yi cyaꞌl xcyeꞌ quen teꞌj na iꞌ yi wiꞌtz Ajcaw.
10 Chaꞌstzun te quil kaben tul il. Nin quil tzꞌocopon jun chin yaꞌbil xe ketz kacaꞌl.
11 Na scawunk Ryos scyeꞌj yi eꞌ tetz ángel tan chixomeꞌn skeꞌj, tan kaqꞌuicyꞌleꞌn alchok kaꞌj nint.
12 Mben chichꞌinul yi kakꞌab tan qui kajeꞌn tzotp teꞌjak eꞌchk cꞌub.
13 Nin baꞌn kaxon ẍchixoꞌl león, nka ẍchixoꞌl alchok jilwutz smaron txuc.
14 Na je yol yi kaRyosileꞌj: “Tan tuꞌ yi na chipekꞌ sweꞌj, nin tan tuꞌ yi ja cyajskej inwutz, chelepon liwr waꞌn tkꞌab cyakil alchok takleꞌnil.
15 Yil choꞌc tan injoyleꞌn, cheꞌ intzaꞌwej. Nin ẍchin najank ẍchixoꞌl. Chelepon waꞌn tkꞌab yi sotzaj cꞌuꞌlal, nin swakꞌeꞌ chikꞌej.
16 Nchaꞌtz swakꞌeꞌ jun balaj ankꞌiꞌn scyetz, yi quinin bajsbeꞌn tetz. Ẍchitzatzink, tan tuꞌ yi ẍchiclaxok waꞌn,” stzun Ryos banak.