Jun bitz tan takꞌleꞌn kꞌej Kataj
92
1 Chumbalaj nin yi na katyoẍin teruꞌ.Chumbalaj nin yi na kabitzij eꞌchk bitz tan takꞌleꞌn kꞌejuꞌ.
Na iluꞌ yi wiꞌtz Ajcaw tcyaꞌj tu wuxtxꞌotxꞌ.
2 Chumbalaj nin yi na koꞌc tan naꞌwseꞌn yi biꞌuꞌ lakak jalchan, nin lakak akaleꞌn.
3 Chumbalaj nin yil kakꞌ kakꞌajsbil teruꞌ tan kabitz, yil xom kawiꞌ te yi kulil yi eꞌchk
maꞌcl chi taneꞌn arpa tu salterio yi toqueꞌn cuꞌn kulil wiꞌ.
4 Na wiꞌnin na takꞌuꞌ tzatzin sketz tan tuꞌ cyakil yi eꞌchk takleꞌn balaj yi na bnix tanuꞌ Taꞌ.
5 Chin wutzileꞌn nin yi akꞌun yi na bnix tanuꞌ Taꞌ.
Quiꞌc jopbil wiꞌ yi xtxumuꞌnuꞌ.
6 Poro quiꞌc rmeril tan pujxeꞌn cyakꞌun yi eꞌ yi tzeꞌtzuj te cyajtzaꞌkl.
7 Na yi eꞌ mal nak ẍchꞌuyok tajlal chixoneꞌn chi na ban xtzeꞌ yi jalcuꞌn na jal buchil.
Poro sotzel chiwutz cyeraꞌtz sbneꞌ opon tunintz.
8 Ma yi iluꞌ teruꞌ Taꞌ, iẍnin atuꞌ-tz tziꞌn tcyaꞌj.
9 Poro at jun xtxolbil yi stzꞌelk cuꞌn teꞌj, iꞌtz yi eꞌ contruꞌ Taꞌ, ẍcheꞌlk cuꞌn tanuꞌ swutz.
Nin cyakil yi eꞌ mal nak ẍcheꞌ cawseꞌuꞌ.
10 Takꞌ tzajuꞌ mas inchamil Taꞌ, chi taneꞌn ẍchamil jun mam tor.
Nin takꞌeꞌnuꞌ muꞌẍ aceit xoꞌl inwiꞌ, tan ẍchajleꞌn yi at inkꞌej.
11 Na ja wil yi ẍeꞌn cuꞌn nchiloꞌon yi eꞌ incontr, nin ja wit yi nchibaj ẍchꞌin yi chiloꞌoneꞌn.
12 Poro yi eꞌ balaj ẍchichꞌuyok cyeraꞌtz chi na ban jun wiꞌ mop.
Nin mben ẍkon chitiemp chi na ban eꞌchk cedro yi at wiꞌwtz Líbano.
13 Choꞌn ẍchibneꞌ cyeraꞌtz chi taneꞌn yi eꞌ balaj wiꞌ tzeꞌ yi awij wutzkꞌanil yi caꞌl Ryos.
Chin xkatzkuj nin yi xak.
14 Mpe skenk tijin chicꞌuꞌl yi eꞌ balaj nakaꞌtz ilenin acꞌaj cun tunin eꞌ-tz.
Ilenin at chichamil na iẍnin at chiẍcꞌatnakil.
15 Nin scyaleꞌ yi chin jicyuch nin te yi tajtzaꞌkl yi Kataj yi qꞌuicyꞌlom ketz, na quiꞌc muꞌẍ tal paltil iꞌ.