CAꞌP WEKL TE EꞌCHK SALMO
42:1—72:20
Yi tuleꞌn txꞌakx yi tnum Israel tcꞌuꞌl jun yaj yi joylaj atit
42
1 Wajcaw, nternin na cuꞌ inwutz teruꞌ, na na chintzan tan joyleꞌnuꞌ, chi na ban jun masat tan joyleꞌn aꞌ yi na quim tan saktziꞌ.2 Na nchaꞌtz in Taꞌ, wiꞌnin na joyonuꞌ swetz.
Na chinquim tan saktziꞌ taneꞌn.
Nternin na skej intziꞌ tan joyleꞌnuꞌ.
Na yi iluꞌ teruꞌ iluꞌ yi Ryos yi itzꞌ nin tetz.
¿Tonaꞌ nocopon swutzuꞌ, tan cꞌuꞌlajeꞌnuꞌ?
3 Na yi in wetz, skꞌej nin lakꞌbal na nokꞌ, tan paj yi quiꞌc rmeril tan woponeꞌn swutzuꞌ.
Nchaꞌtz wiꞌnin eꞌ yi chaꞌtz cun tunin eꞌ tan jakleꞌn swetz:
“¿Lok tzun aRyosiltzeꞌj tan awuchꞌeyeꞌn?”
4 Nin yi na noꞌc tan xtxumleꞌn yi eꞌchk yolaꞌtz, wiꞌnin bis oꞌkl na jal swetz.
Na na ul txꞌakx tincꞌuꞌl yi mbi mimban sajleꞌn, te yi bajẍchin ẍchiwutz cyakil yi eꞌ mas wunak yi xkaꞌkeꞌn tzaj le caꞌluꞌ.
Na ja kaẍchꞌin tan yi tzatzin yi atoꞌ cuꞌnt.
Chumbalaj nin cyakil, na na katzatzin.
5 Nintzun na noꞌc tan xtxumleꞌn:
¿Mbi xac tzincabej incꞌuꞌl?
¿Mbi xac na chimbisun?
Baꞌn tcuꞌn kꞌukek incꞌuꞌl te wetz inRyosil.
Swakꞌeꞌ inkꞌajsbil tetz.
Na iꞌ yi inRyosil, nin iꞌ yi colol wetz.
6 Wajcaw, yi na noꞌc tan xtxumleꞌn yi incaws yi ntakꞌuꞌ, wiꞌnin na chimbisun, na chumam nin mban.
Poro ilenin quil tzꞌeluꞌ te incꞌuꞌl mpe choꞌnk atin stzi aꞌ Jordán, nka wiꞌwtz Hermón tu Mizar.
7 Yi bis yi atin cuꞌnt, chin xoꞌwbil nin chitaneꞌn jun chin tzanlaꞌ yi na eluꞌl. Lajluch cuꞌn na kubit yi na jincan tulak eꞌchk siwun, nin yi na chitzaꞌw quib eꞌchk kotxꞌ taꞌn.
8 Poro cyakil nin kꞌej at banluꞌ swibaj.
Nin nchaꞌtz in, cyakil akaleꞌn na wakꞌ inkꞌajsbil teruꞌ.
Nin na injak ẍchꞌeybil wetz teruꞌ, na tan iluꞌ itzꞌineꞌt.
9 At na bant cuꞌnt na wal tetz yi inRyosil yi colol wetz:
“Wajcaw, ¿mbi tzuntz yi ja chincyaj cyen tiloluꞌ?
¿Mbi tzuntz yi na takꞌuꞌ amaꞌl scyetz yi eꞌ incontr tan imbuchleꞌn?”
10 Na nicyꞌ nin yi inwankil tu imbakil na chitxukneꞌ tan paj yi na chitzan yi eꞌ incontr tan imbuchleꞌn.
Nin chaꞌtz cun tunin eꞌ-tz tan jakleꞌn swetz:
“¿Lok tzun aRyosil tan awuchꞌeyeꞌntzeꞌj?”
11 Poro nin na noꞌc tan xtxumleꞌn.
¿Mbi xac tzincabej incꞌuꞌl?
¿Mbi xac na chimbisun?
Baꞌn tcuꞌn kꞌukek incꞌuꞌl te wetz inRyosil.
Swakꞌeꞌ inkꞌajsbil tetz.
Na iꞌ yi inRyosil, nin iꞌ yi colol wetz.