Yi toqueꞌn jun yabiꞌẍ tan jakleꞌn ẍchꞌeybil tetz
41
1 Baꞌn cyeri eꞌ yi na el chikꞌajab scyeꞌj yi eꞌ yi at tajweꞌn scyetz.Na tzꞌocopon Ryos tan quichꞌeyeꞌn cyetz yil tzꞌul eꞌchk sotzaj cꞌuꞌlal ẍchiwutz.
2 Tzꞌocopon Kataj tan chicolcheꞌn. Nin ẍchitzatzink taꞌn, na mben ẍkon chitiemp tzoneꞌj wuxtxꞌotxꞌ.
Nin quil takꞌ iꞌ amaꞌl scyetz chicontr tan chitxꞌaconeꞌn scyeꞌj.
3 Yil chicuꞌ tan yaꞌbil tzꞌocopon Kataj tan quichꞌeyeꞌn.
Nin tzꞌocopon iꞌ tan chitzꞌaqueꞌn.
4 Nchaꞌtz in, je na wal tetz Katajeꞌj:
“Wajcaw, elk kꞌajabuꞌ sweꞌj, chintzꞌaqueꞌuꞌ.
Mpe jajk injuch wil swutzuꞌ, quiꞌk xtxumuꞌ.”
5 Elk kꞌajabuꞌ sweꞌj, na yi eꞌ incontr, yi cyajbil iꞌtz yi ẍeꞌnk tan weleꞌn cuꞌn swutz.
Na je bin chiyoleꞌj:
“Ja icyꞌ til, yi ẍeꞌnk quimx.
Quiꞌt naꞌwsij muꞌẍ tal yi biꞌ-x.”
6 Na chuꞌl yi eꞌaꞌtz tan inxajseꞌn, poro iꞌtz tan inxkꞌukeꞌn tuꞌ yi ẍeꞌn wutaneꞌn.
Ma yi na cheꞌl tbeꞌ na choꞌctz tan inyolcheꞌn, na ntin chiꞌch cꞌuꞌlal na chitxum.
7 Cyakil yi eꞌaꞌtz yi na chiꞌch chicꞌuꞌl sweꞌj, na chimol quib tan inyolcheꞌn. Nin na cyal:
“Paj ninx teꞌtz yi na tzanx tan mucꞌleꞌn yi eꞌchk qꞌuixcꞌujaꞌtz.”
8 Nchaꞌtz na cyaltz:
“Yi yaꞌbil yi at teꞌjx tetz cwent Baybaꞌn.
Nin quiꞌc rmeril tan tuleꞌn yos tuchꞌx,” cheꞌch.
9 Mpe ik yi mero wamiw, yi ja kawan tuchꞌ, yi nternin kꞌuklij incꞌuꞌl teꞌj, nin yi nternin nkeꞌl nkoꞌc tuchꞌ, nchaꞌtz iꞌ, contr sweꞌj jaluꞌ.a
10 Poro Wajcaw, elk kꞌajabuꞌ sweꞌj.
Lok tzꞌul yos swuchꞌ tan jaleꞌn junt tir inwalor, bantz inxcyeweꞌn scyeꞌj.
11 Nin kol takꞌuꞌ amaꞌl swetz tan intxꞌaconeꞌn scyeꞌj, tzꞌelepon tzun intxum tetz, yi na tzatzinuꞌ sweꞌj.
12 Na na chinnachon teꞌj yi baꞌn atineꞌt swutzuꞌ.
Chaꞌstzun te ja chinjeꞌ xtxicbaluꞌ, nin choꞌn chincyaj cyen swutzuꞌ.
13 Kakꞌeꞌ bin kakꞌajsbil tetz Kataj, yi kaRyosil yi oꞌ xonl Israel.
Kakꞌeꞌ kakꞌajsbil tetz, jaluꞌ nin sbneꞌ opon tunintz. ¡Amén!