Kakꞌeꞌ kakꞌajsbil tetz Kataj
40
1 Ja injak ẍchꞌeybil wetz tetz Kataj.Nin ja jal impasens tan ẍchꞌiweꞌn.
Ja tzun stzaꞌwej iꞌ inyol.
2 Ja tbit iꞌ yi intziꞌ yi inkul, nin ja neꞌl tzaj taꞌn tul eꞌchk sotzaj cꞌuꞌlal.
Ja chinclax taꞌn. Nin ja chimbixeꞌ junt tir taꞌn.
Nin ja ẍchaj iꞌ yi balaj beꞌ swetz.
3 Na ja takꞌ iꞌ amaꞌl swetz tan wukꞌol eꞌchk balaj kꞌajsbil tetz iꞌ.
Swakꞌeꞌ bin inkꞌajsbil tetz iꞌ tetz cuꞌn walmaꞌ.
Nin cyakil yi eꞌ yi ja quil yi mbi cuꞌn mban iꞌ sweꞌj, ja kꞌukeꞌ mas chicꞌuꞌl te iꞌ.
4 Baꞌn cyeri yi eꞌ yi choꞌn kꞌuklij chicꞌuꞌl te Wajcaw, nin yi qui kꞌuklij chicꞌuꞌl scyeꞌj yi eꞌ mal nak.
Nin baꞌn cyeri yi eꞌ yi qui na xom chiwiꞌ scyeꞌj yi eꞌ yi na choꞌc tan chicꞌuꞌlajeꞌn yi eꞌchk ryos yi banij cuntuꞌ.
5 Wajcaw, ja bnix wiꞌnin eꞌchk milawr tanuꞌ tan wuchꞌeyeꞌn.
Na wiꞌnin banl talmaꞌuꞌ swibaj.
Quil chinxcyeꞌ tan talcheꞌn cyakil yi mbi mbanuꞌ sweꞌj, na nimix cunin banl talmaꞌuꞌ swibaj.
6 Nkꞌeraꞌtz tajbiluꞌ yi eꞌchk txꞌixwatz tu eꞌchk oy yi na oyij teruꞌ, na qui na tzanuꞌ tan jakleꞌn yi eꞌ txucaꞌtz, yi na patij tetz chitxꞌixwatz wunak, nin qui na tzanuꞌ tan jakleꞌn eꞌchk txꞌixwatz yi na quim tan stzajseꞌn kloꞌ yi quil wunak.
Ma na ja jakxij inẍchin tanuꞌ tan wital yi tajbiluꞌ.
7 Chaꞌstzun te walol teruꞌ:
“Wajcaw, je ineꞌj, chi yi tzꞌibaꞌnt cyen sweꞌj le tuꞌjuꞌ.a
8 Ilenin na chimpekꞌ tan banleꞌn yi tajbiluꞌ, na qui na el yi caꞌwluꞌ te incꞌuꞌl.”
9 Sak swutzuꞌ yi na wal scyetz cyakil yi eꞌ tanumuꞌ, yi chin tzꞌaknak cuꞌn iluꞌ.
Nin quiꞌc nin jun eꞌchk takleꞌn yi jak wew, yi quiꞌk nwal scyetz.
10 Ja wal cyakil yi balajiluꞌ tan cawuꞌn.
Nin ja wal yi baꞌn kꞌukeꞌ kacꞌuꞌl teꞌjuꞌ.
Nin ja wal yi baꞌn kaclax tanuꞌ.
Quinin nwew yi balajiluꞌ tu yi lokꞌ ib yi at tuchꞌuꞌ scyetz cyakil yi eꞌ tanumuꞌ.
11 Ma jaluꞌ Wajcaw, quil cyꞌajlenuꞌ yi banl talmaꞌuꞌ swibaj.
Na yi wajbil iꞌtz yil tzꞌaꞌtij yi loꞌkluꞌ tu balajiluꞌ sweꞌj tan incolcheꞌn.
12 Wiꞌnin sotzaj cꞌuꞌlal na ul tzinwutz.
Quinin bajsbeꞌn tetz cyakil yi eꞌchk takleꞌnaꞌtz yi na ul tzinwutz.
Qui ajlbeꞌn tetz, na niꞌcuꞌn chi taneꞌn xiꞌil kawiꞌ yi qui na kaxcyeꞌ tan tajleꞌn.
I na bantz tzinwutz, yi ja wiꞌt chintxꞌamxij tan cyakil yi wil.
I cuꞌn chinloꞌonk nin taꞌn, na quiꞌct inwalor at.
13 Iluꞌ inRyosil, chin coleꞌuꞌ. Sajkchanuꞌ tan wuchꞌeyeꞌn.
14 Yi wajbil Taꞌ, iꞌtz yi nink tzꞌel chitxꞌix yi eꞌ yi na cyaj yil chinquim wetz.
Lok cheꞌl ojk tu chitxꞌix yi eꞌ yi na cyaj yil chin loꞌon.
15 Lok cheꞌl ojk yi eꞌaꞌtz yi na chitzeꞌen sweꞌj.
16 Poro takꞌ tzajuꞌ tzatzin scyetz cyakil yi eꞌ yi na chitzan tan joyleꞌn puntil tan chixomeꞌn teꞌjuꞌ.
Nin yil choꞌc tan joyleꞌn ẍchꞌeybil cyetz teruꞌ, nink cyal: “Chin cham nin yi Kataj.”
17 Ma yi in wetz Taꞌ, yi nternin na chimbisun, bneꞌuꞌ pawor, sajkchanuꞌ tan wuchꞌeyeꞌn.
Na ntin cuꞌn iluꞌ xcyekuꞌ tan wuchꞌeyeꞌn, nin tan incolpeꞌn.
Quiꞌk ẍchꞌiwuꞌ mas tiemp, sajkuꞌ tan wuchꞌeyeꞌn.