Qui tunin kꞌusij yi ankꞌiꞌn yi akꞌij sketz
39
1 Ja injoy puntil tan qui injuchul wil tan yi eꞌchk yol yi na wal. Nin ja inmak intziꞌ tan qui inyolol eꞌchk yab yol te yi atin ẍchixoꞌl yi eꞌ mal nak.2 Ja bin inmak wib tan yol.
Pe ik tan talcheꞌn eꞌchk balaj yol.
Choꞌn cunin mimban chitaneꞌn jun mem.
Poro quiꞌc ntakꞌ swetz, na ilenin ja chimbisun tan yi eꞌchk takleꞌn yi mbajij sweꞌj.
3 Ja chimbisun yi nnoꞌc tan xtxumleꞌn yi eꞌchk takleꞌnaꞌtz.
Ja chimbisun, nin ja sotz incꞌuꞌl tan paj.
Chaꞌstzun te chin inwiꞌ nin imban tan yol tetz Wajcaw.
Ej nin je inyoleꞌj:
4 “Ma jaluꞌ Wajcaw, na waj yil taluꞌ swetz yi tonaꞌ neꞌl cuꞌn swutz. Nin yi mbil chintzaj pont. ¿Jatnaꞌ intiemp at tanuꞌ?
5 Na na el intxum tetz yi quiꞌc mas intiemp akꞌij tanuꞌ tzoneꞌj. Na qui tunin iltz yi cobox kꞌej yi akꞌij tanuꞌ swetz. Chaꞌstzun te quiꞌc na takꞌ yi ankꞌiꞌn tetz tzoneꞌj wuxtxꞌotxꞌ.
6 Jun ntziꞌ rat atoꞌ tzoneꞌj wuxtxꞌotxꞌ. Na niꞌcuꞌn oꞌ chi taneꞌn jun muj yi jalcuꞌn na icyꞌ. At eꞌ yi na jal chikꞌej taneꞌn, poro tetz jun ntziꞌ rat. At eꞌ yi na jal wiꞌnin chimeꞌbiꞌl, poro apart taw na ban cyen yi na chiquim.
7 ¿Poro Taꞌ, naꞌ tzun kꞌukleꞌt incꞌuꞌl? Cyaꞌl. Ntin choꞌn kꞌuklij incꞌuꞌl teꞌjuꞌ.
8 Chaꞌstzun te chin coleꞌuꞌ ẍchikꞌab incontr.
Quil chin takꞌuꞌ ẍchikꞌab yi eꞌ yi na chixcyꞌaklin sweꞌj.
9 ”Poro quil wal wetz jun yol scyetz, na yi na chitzan tan banleꞌn sweꞌj, yaꞌstzun tajbiluꞌ.
10 Poro tcyꞌajlenuꞌ cyakil yi eꞌchk takleꞌn cachiꞌ yi na bajij sweꞌj.
Na ja chinkꞌeꞌxij tzakꞌ incaws, yi na tzanuꞌ tan takꞌleꞌn swetz.
11 Poro na el intxum tetz, yi na ocuꞌ tan kacawseꞌn, iꞌtz tan kanucꞌleꞌn, iꞌtz tan kanicyꞌseꞌn, na baꞌn na xituꞌ yi eꞌchk takleꞌn yi mas na kapekꞌ teꞌj.
12 ”Na qui tunin kꞌusij oꞌ swutzuꞌ Wajcaw.
Tbiteꞌuꞌ yi intziꞌ inkul, na choꞌn na cuꞌ inwutz teruꞌ.
Quil tew tibuꞌ tzinwutz.
Bintzi quiꞌc inxac swutzuꞌ, na niꞌcuꞌn in tu jun aj xmayinl tuꞌ tzoneꞌj wuxtxꞌotxꞌ.
Jun ntziꞌ rat atin. Cyaꞌl na naꞌt cuꞌnt.
Niꞌcuꞌn wutaneꞌn chi jun txuc yi jalcuꞌn na icyꞌ tcyaꞌj, chi banakeꞌ inmam inteꞌ tentz.
13 Ma jaluꞌ bin, quil chinxuxuꞌ mas, ma na takꞌuꞌ amaꞌl swetz tan jaleꞌn muꞌẍt inwalor, tan intzatzineꞌn coboxt kꞌej te yi ntaxk chinquim.”