Yi cweꞌn wutz Luwiy swutz Ryos tan jakleꞌn ẍchꞌeybil tetz
38
1 Wajcaw, quil chin cawsajuꞌ te yi sajnak colp wiꞌuꞌ.Quil takꞌuꞌ intzꞌuꞌm te yi jeꞌnak lajp wiꞌuꞌ.
2 Na ja wiꞌt ocuꞌ tan incawseꞌn. Nin na tzanuꞌ tan imbiyleꞌn.
3 Poro na el intxum tetz yi ja saj colp wiꞌuꞌ sweꞌj tan paj yi ja injuch wil swutzuꞌ.
Nin ja wiꞌt loꞌon cyakil yi inwankil nin cyakil imbakil na chitxukneꞌ tan paj.
4 Taꞌ, na chinnachon te yi nimix cunin wil injuch swutzuꞌ. Quiꞌt na chinxcyeꞌ tzakꞌ. Quiꞌt na pujx waꞌn yi mbil tzimban.
5 Nin tan paj yi inyaꞌbl, cyakil yi inwankil ja kꞌay nin ja xewan.
6 Cyakil nin kꞌej tu na chimbisun tunintz. Tu na sotz tuꞌ incꞌuꞌltz.
7 In yabiꞌẍ, na cyakil yi inwankil na lamcan tan inkꞌaꞌkl.
8 Quiꞌc muꞌẍ inxac, na quiꞌct muꞌẍ inwalor at.
Or nin chinquim, na tzaj nin walmaꞌ tkꞌab ẍchꞌonal.
9 Ma jaluꞌ Wajcaw, na tiluꞌ tircuꞌn yi mbi na icyꞌ tincꞌuꞌl, quiꞌc nin jun eꞌchk takleꞌn yi ewuꞌnk waꞌn swutzuꞌ.
10 Yi walmaꞌ nternin na molneꞌ. Quiꞌct inwalor at, nin yi inwutz ja wiꞌt oc muj teꞌj.
11 Ej nin cyakil yi eꞌ wamiw, scyuchꞌ yi eꞌ inxonl, ja chincyaj cyen quilol.
Kajpeꞌn nin na chixcyeꞌ tzit tan inxmayeꞌn tan paj yi yaꞌbil yi at sweꞌj.
12 Nchaꞌtz yi eꞌ yi na chiꞌch chicꞌuꞌl sweꞌj, nternin na chitzan tan joyleꞌn puntil yi ẍeꞌnk tan inquimeꞌn. Nchaꞌtz quitaneꞌn yi eꞌ yi na cyaj tan inloꞌoneꞌn junawes. Cyakil nin kꞌej na chitzan tan joyleꞌn puntil ẍeꞌnk tan inloꞌoneꞌn.
13 Poro tu na imbit cyꞌen tuꞌ chiyol, qui na noꞌc tan xtxumleꞌn. Nchaꞌtz quiꞌc nin jun yol na wal nin scyetz. Niꞌcuꞌn na imban ẍchiwutz chi na ban jun mem.
14 Niꞌcuꞌn na imban chi na ban jun chcan, nin quiꞌc nin jun yol na wal nin tan incolol wib chi na ban jun mem.
15 Na choꞌn kꞌuklij incꞌuꞌl teꞌjuꞌ Wajcaw, na iluꞌ inRyosil. Choꞌn wakꞌeꞌ cyen swutzuꞌ. Ilu-ꞌk tzꞌakꞌon chicaws yi eꞌ incontraꞌtz.
16 Ntinaꞌtz wetz wajbil iꞌtz:
Yi quiꞌk chitzeꞌen yi eꞌ incontraꞌtz sweꞌj.
Yi quiꞌk cyal yi ja chitxꞌacon yil chinloꞌon wetz.
17 Bintzi, txant tan inloꞌoneꞌn wetz, na quiꞌc nin jun tkuj yi quiꞌck chꞌon swetz.
18 Ma jaluꞌ Wajcaw, na waj yil tzintxol yi wil teruꞌ, na na chimbisun taꞌn.
19 Ja wiꞌt chijal wiꞌnin incontr. Na wiꞌnin eꞌ yi na chiꞌch chicꞌuꞌl sweꞌj. Nin qui na pujx waꞌn yi mbi tzuntz. Na quiꞌc xeꞌ chitxumuꞌn. Taꞌ ¿mbi tzuntz na chiꞌch chicꞌuꞌl sweꞌj?
20 Na chiꞌch chicꞌuꞌl sweꞌj yi na imban eꞌchk takleꞌn balaj scyetz. Qui na chipekꞌ te yi eꞌchk takleꞌn balaj yi na imban.
21 Wajcaw, qui bin chin tilcyenuꞌ inchuc. Quil sjatx len tibuꞌ sweꞌj, na iluꞌ inRyosil.
22 Iluꞌ yi colol wetz. Sajk binuꞌ tan wuchꞌeyeꞌn jalcuꞌn.