Kajoyeꞌ yi tzatzin yi na jal te Kataj
37
1 Quil cxbisunwok tan yi eꞌchk takleꞌn cachiꞌ yi na chiban yi eꞌ mal nak.Quil tzꞌel nin italmaꞌ te yi eꞌchk takleꞌn yi na chicambaj yi eꞌ mal nakaꞌtz.
2 Quil cxbisunwok tan paj, na niꞌcuꞌn sbajok scyeꞌj chi na ban jun buch yi jalcuꞌn na skej tan kꞌej.
Niꞌcuꞌn sbajok scyeꞌj chi na chiban eꞌchk wiꞌ ujul yi na saj num tan kꞌej.
3 Ma na kꞌukek itetz icꞌuꞌl te Kataj.
Banwok yi balaj.
Cxnajank tzunwok le teri iluwar. Nin xclaxokwok taꞌn.
4 Joywok yi tzatzin yi na jal te Kataj.
Stkꞌeꞌ tzun iꞌ cyakil yi na el italmaꞌ teꞌj.
5 Cꞌoxwok itib junawes tkꞌab iꞌ.
Kꞌukek icꞌuꞌl teꞌj, nin tzꞌocopon tan ichꞌeyeꞌnwok.
6 Slajluchaxk tzun yi jicyuch te itajtzaꞌkl.
Na sclarink yi ibalajil ẍchiwutz wunak chi taneꞌn yi tkan skil.
7 Pasens na taj tan ẍchꞌiweꞌn yi tajbil Kataj.
Chꞌiwwok jalen yil tzꞌoc Kataj tan ichꞌeyeꞌn.
Quil chiꞌch icꞌuꞌl scyeꞌj yi eꞌ yi na jal chimeꞌbiꞌl, yi eꞌ yi na chiriquin tan yi eꞌchk cyajtzaꞌkl cachiꞌ yi na chiban.
8 Quil tzitakꞌwok amaꞌl tetz jun bis, nka jun chiꞌch cꞌuꞌlal, tan waneꞌn tziteꞌj.
Na quiꞌc na takꞌ, nin na xcyeꞌ tan ipitleꞌn nin tul il.
9 Quil tzibanwok eꞌchk takleꞌnaꞌtzeꞌj.
Ma na choꞌn kꞌukek icꞌuꞌl te Kataj.
Tzitetzaj tzun yi itanum.
Ma yi eꞌ mal nak chelepon lajuꞌn swutz.
10 Txant tan chisotzeꞌn yi eꞌ mal nakaꞌtz.
Pe nink cxoꞌcwok tan chijoyleꞌn quiꞌt chijal itaꞌn.
11 Poro yi eꞌ cꞌulutxum, ẍchinajank cyeraꞌtz tul chiꞌamaꞌl.
Sjalok cyakil yi tajweꞌn scyetz. Nin ẍchitzatzink.
12 Ma yi eꞌ mal nak, ilenin na choꞌc tan xtxumleꞌn yi mbil chiban scyeꞌj yi eꞌ balaj.
Nin chin chiwutz nin na chiban scyeꞌj.
13 Poro yi Kataj tzeꞌeꞌn tuꞌ na ban iꞌ scyeꞌj yi eꞌ mal nakaꞌtz, na na el xtxum tetz yi ẍchisotzok cyeraꞌtz.
14 Yi eꞌ mal nakaꞌtz list quitaneꞌn tu chispar tu cꞌoxbil chiflech tan chibiyleꞌn yi eꞌ prow, yi eꞌ yi at tajweꞌn scyetz.
List eꞌ tan chisotzajeꞌn yi eꞌ yi jicyuch te cyajtzaꞌkl.
15 Poro iteꞌn nin chispar xconk tan chibiyleꞌn cuꞌn.
Nin wakꞌuꞌn cuꞌn sbneꞌ yi cꞌoxbil chiflech.
16 Yi muꞌẍ tal chimeꞌbiꞌl yi eꞌ meꞌbaꞌ, mas baꞌn tcuꞌn swutz cyakil chimeꞌbiꞌl yi eꞌ ric.
17 Na tzꞌocopon Kataj tan chixiteꞌn yi eꞌ mal nak.
Poro ilenin tzꞌocopon tan quichꞌeyeꞌn yi eꞌ balaj.
18 Na na oc iꞌ tan chicolcheꞌn yi eꞌ yi qui na chijuch quil.
Nin cyetz sbneꞌ yi chiꞌamaꞌl tetz ben kꞌej ben sak.
19 Ej nin yil tzꞌul cꞌaꞌlaj tiemp ẍchiwutz, quil chitij qꞌuixcꞌuj.
Nin yil tzꞌul weꞌj, quil chiquim tan paj.
20 Poro yi eꞌ mal nak ẍchiquimok cyeraꞌtz.
Ẍchisotzok chi na ban tzꞌis yi na oc kꞌaꞌkl.
Chelepon xit chi na ban sibel kꞌakꞌ.
21 Eꞌ cꞌamol pwok poro quiꞌt na chichoj.
Ma yi eꞌ balaj nak, na cyakꞌ cyetz chipuꞌk, tan quichꞌeyeꞌn yi eꞌ yi at tajweꞌn scyetz.
22 Yi eꞌ yi at banl Kataj squibaj,
ẍchicambok cyeraꞌtz te yi cyetz chiꞌamaꞌl.
Ma yi eꞌ yi quiꞌc banl Kataj squibaj, chelepon lajuꞌn taꞌn.
23 Iꞌ na chajon chibeꞌ yi eꞌ balaj.
Nin na cheꞌ col yi eꞌ yi na tzatzin iꞌ scyeꞌj.
24 Kol chisaj trimp, quil chicuꞌ trimp junawes, na at nin Kataj tan chixicyleꞌn.
25 Yi in wetz ja chintijin.
Nimix tiemp waꞌn tzoneꞌj wuxtxꞌotxꞌ.
Poro quiꞌc jun tir yi jajk wil, yi jajk el jun balaj wunak te cꞌuꞌl Ryos.
Nin cyaꞌl nwilwit yi jajk choꞌc yi eꞌ tetz nitxajil tan rmosumiꞌn.
26 Yi eꞌ balaj nakaꞌtz, ilenin na el chikꞌajab scyeꞌj yi eꞌ mas wunak, nin tzatzin cuꞌn na cyakꞌ cꞌmoꞌn scyetz.
Nin yi cyetz chinitxajil chumbalaj nin eꞌ ẍchiwutz yi eꞌ mas wunak.
27 Cyajswok cyen eꞌchk yab ajtzaꞌkl.
Nin banwok taneꞌn yi eꞌchk takleꞌn balaj.
Cxtzatzink tzunwok cyakil tiemp.
28 Na yi Kataj na pekꞌ te eꞌchk balaj ajtzaꞌkl.
Nin qui na cheꞌ tilcyen yi eꞌ yi choꞌn kꞌuklij chicꞌuꞌl te i.
Poro na chisotz yi eꞌ mal nak taꞌn, tuml chinitxajil.
29 Ma yi eꞌ balaj nak, scyetzajeꞌ yi amaꞌl.
Cyetz sbneꞌ tetz ben kꞌej ben sak.
30 At xtxolbil chiyol yi eꞌ balaj.
Nin tzꞌaknak cuꞌn yi eꞌchk xtxolbil yi na cyal.
31 At nin yi caꞌwl Kataj te cyalmaꞌ.
Nin qui na quil cyen.
Qui tzun na chijeꞌ trimp.
32 Ma yi eꞌ mal nak na choꞌc tan chixkꞌukeꞌn yi eꞌ balaj, nin na chijoy puntiltz tan chibiyleꞌn cuꞌn.
33 Poro quil takꞌ Kataj amaꞌl scyetz.
Quil cheꞌ takꞌ yi eꞌ balaj ẍchikꞌab yi eꞌ mal nakaꞌtz.
Nin quil takꞌ iꞌ amaꞌl tetz jun juez tan tlol, yi eꞌ aj paj, yi eꞌ balaj nak.
34 Kꞌukek bin icꞌuꞌl te Kataj.
Banwok taneꞌn yi tetz caꞌwl.
Sjalok tzun ikꞌej swutz iꞌ, nin stkꞌeꞌ iꞌ yi amaꞌl tzitetz.
Nin tziwutz cuꞌn yil cheꞌl lajuꞌn yi eꞌ mal nak taꞌn.
35 Wilnak jun yaj yi chin juntlen nin yi tajtzaꞌkl.
Quiꞌc nin muꞌẍ pitzꞌpal yi jilon.
Ja tocsaj tib iꞌ nim ẍchiwutz cyakil wunak.
Niꞌcuꞌn ban tu jun chin wutzileꞌn wiꞌ tzeꞌ yi wiꞌnin kꞌab.
36 Poro yi xoneꞌn tiemp ja nicyꞌak tan tilweꞌn, poro quiꞌct iꞌ at.
Ja injoy, poro quiꞌt njal waꞌn. Na nsken sotz.
37 Poro ilwok nin yi eꞌ balaj.
Txumwok yi eꞌ yi putzpuj chijilon.
Ateꞌ nin cyeraꞌtz, nin ilenin chitzatzink cyeraꞌtz.
38 Ma yi eꞌ pajol caꞌwl, chixitok cyeraꞌtz.
Nin quil chitzatzin sbneꞌ opon tunintz.
39 Na yi Kataj at iꞌ tan quichꞌeyeꞌn yi eꞌ balaj.
Na oc iꞌ tan chiqꞌuicyꞌleꞌn yi na ul pilbil cyetz.
40 Na oc iꞌ tan quichꞌeyeꞌn, tan cyeleꞌn liwr ẍchikꞌab yi eꞌ mal nak, na choꞌn na cuꞌ chiwutz tetz iꞌ tan chiclaxeꞌn.