Yi stzeꞌtzal tajtzaꞌkl jun yaj
36
1 Iteꞌn nin yi yab ajtzaꞌkl yi at te cyalmaꞌ yi eꞌ mal nak, yaꞌstzun yi na aꞌlon scyetz, yi qui tajweꞌn tan cyakꞌol kꞌej Ryos nka yil cyek ẍchiꞌ iꞌ.2 Yi eꞌaꞌtz, na cyocsaj quib tzꞌaknak cuꞌn.
Nin le wutz cyetz cyajtzaꞌkl chumbalaj nin yi eꞌchk takleꞌn yi na chitzan tan banleꞌn.
3 Chin cachiꞌ nin chijilon. Eꞌ cuꞌn laꞌj.
Qui na chixom te yi ajtzaꞌkl balaj.
Quiꞌt na chitzan tan banleꞌn yi eꞌchk takleꞌn yi na chiban yi eꞌ yi at cyajtzaꞌkl.
4 Yi na chicoyeꞌ wi chitxꞌach, ntin na choꞌc tan xtxumleꞌn yi eꞌchk ajtzaꞌkl cachiꞌ.
Xomcheꞌ te eꞌchk ajtzaꞌkl yi nkꞌeꞌtz balaj.
Nin qui na cyaj chicyajscyen yi eꞌchk ajtzaꞌklaꞌtz.
5 Poro yi teruꞌ Wajcaw, wiꞌnin xtxaxl talmaꞌuꞌ skibaj, na icyꞌnak cuꞌn swutz yi tcyaꞌj.
Baꞌn kꞌukeꞌ kacꞌuꞌl teꞌjuꞌ, na na el kꞌabuꞌ te yoluꞌ.
6 Yi cawunuꞌ chin tzꞌaknak cunin.
Niꞌcuꞌn chi eꞌchk wutz yi qui na yucan.
Nin yi xtxumuꞌnuꞌ chumbalaj nin, nin quinin bajsbeꞌn tetz.
Niꞌcuꞌn chi taneꞌn yi aꞌ yi at xe mar.
Nin iluꞌ qꞌuicyꞌlom cyetz cyakil wunak nin cyakil txuc.
7 Chumbalaj nin yi teruꞌ balajiluꞌ skeꞌj, na iluꞌ kaRyosil.
Nin na koꞌ ẍchꞌeyajuꞌ cyakil oꞌ yi choꞌn na kacol kib teꞌjuꞌ.
Na baꞌn na kacol kib teꞌjuꞌ chi na chiban yi eꞌ neꞌẍ qꞌuitx, yi na chicol quib jakꞌ xicyꞌ yi chitxuꞌ.
8 Na noj cuꞌn kacꞌuꞌl yi na kawan tanuꞌ xe caꞌluꞌ.
Nin yi na kucꞌaꞌ te yi balaj aꞌ yi na takꞌuꞌ sketz.
9 Na choꞌn na saj yi itzꞌajbil teꞌjuꞌ.
Nin tan iluꞌ na lajluchaxeꞌt yi eꞌchk balaj ajtzaꞌkl skawutz.
10 Takꞌ tzajuꞌ bin yi teruꞌ banluꞌ yi chin tzꞌaknak cunin, skibaj yi oꞌ yi atoꞌ tkꞌabuꞌ.
Takꞌ tzajuꞌ yi balajiluꞌ skeꞌj yi oꞌ yi jicyuch te kajtzaꞌkl.
11 Quil takꞌuꞌ amaꞌl scyetz yi eꞌ, yi na cyocsaj quib nim tu cyajtzaꞌkl tan inyakꞌpeꞌn.
Ma na tkꞌeꞌuꞌ inwalor tan qui weleꞌn ojk ẍchiwutz.
12 Ma jaluꞌ, quileꞌuꞌ yi ẍeꞌn nchiloꞌon yi eꞌ mal nakaꞌtz.
Ja wiꞌt chicuꞌ trimp, nin quiꞌct rmeril tan chixcyeweꞌn cuꞌn junt tir.