Baꞌn kajak ẍchꞌeybil ketz tetz Kataj
35
1 Wajcaw, okuꞌ tan contriꞌn scyeꞌj yi eꞌ incontr.Chibiyeꞌ quibuꞌ scyuchꞌ yi eꞌ yi na cyaj choꞌc tan imbiyleꞌn.
2 Tcyꞌaj tzajuꞌ yi maꞌcluꞌ yi makbil flech.
Nin ulkuꞌ tan wuchꞌeyeꞌn.
3 Xconken yi teruꞌ lansuꞌ tan chibiyleꞌn eꞌ incontraꞌtz.
Taleꞌuꞌ swetz, yi atuꞌ tan incolcheꞌn.
4 Lok tzꞌel chitxꞌix yi eꞌ yi na cyaj choꞌc tan imbiyleꞌn.
Lok xit yi cyajtzaꞌkl yi eꞌaꞌtz, yi na cyaj yil chiban yi eꞌchk takleꞌn cachiꞌ sweꞌj.
5 Choꞌnk chiban chi na ban tzꞌis yi na ben tan cyekꞌekꞌ.
Nink tzꞌoc yi ángeluꞌ tan chilajeꞌn len sweꞌj.
6 Ej nin choꞌnk chixon tcꞌuꞌl beꞌ yi chin tzꞌoꞌtz nin, yi chin cyakꞌpuch nin.
Nink xomnin yi teruꞌ ángeluꞌ tan chitzꞌamleꞌn.
7 Na quiꞌc nin xeꞌ cyajtzaꞌkl yi na chitzan tan xtxumleꞌn sweꞌj.
Poro ja choꞌc tan nucꞌleꞌn eꞌchk jul tan imbeneꞌn kloꞌ tul.
8 Nink tzꞌul sotzaj cꞌuꞌlal ẍchiwutz.
Eꞌ teꞌnk chicuꞌ tcꞌuꞌl eꞌchk trampaꞌtz yi ja wiꞌt bnix cyaꞌn sweꞌj.
Eꞌ teꞌnk chiben tcꞌuꞌl.
9 Chin tzatzink tzuntz teꞌjuꞌ Taꞌ, na ẍchinclaxok tanuꞌ.
10 Nin tetz cuꞌn walmaꞌ swaleꞌ:
“Wajcaw, ¿naꞌ scyetz junt yi niꞌcuꞌn tu iluꞌ?
Na atuꞌ tan kuchꞌeyeꞌn yi oꞌ tal meꞌbaꞌ yi at tajweꞌn sketz.
Nin na ocuꞌ tan kuchꞌeyeꞌn ẍchikꞌab yi eꞌ yi na cyaj choꞌc tan majleꞌn yi eꞌchk takleꞌn yi at skuchꞌ.”
11 At eꞌ stiw yi junt len cyajtzaꞌkl, yi na baj cyalol eꞌchk takleꞌn yi quiꞌc wetz na wil.
12 Ja imban wetz pawor scyetz.
Poro yi eꞌ cyetz, chin juntlen nin cyajtzaꞌkl yi na chitzan tan banleꞌn sweꞌj.
Wiꞌnin na chimbisun tan yi jun ajtzaꞌklaꞌtz.
13 Yi na chiyabtij cyetz, wiꞌnin na chimbisun scyeꞌj.
Nin na oc yi beꞌchok sweꞌj yi na ẍchaj yi na chimbisun.
Na inmucꞌ weꞌj, nin na innach Kataj squibaj.
14 Yi na ul jun sotzaj cꞌuꞌlal ẍchiwutz, wiꞌnin na chimbisun scyeꞌj.
Nin na chimbisun scyeꞌj, chi na bisun jun yaj yi na quim xtxuꞌ, nka chi yi na quim jun tamiw nka jun titzꞌun.
15 Poro yi tuleꞌn yi sotzaj cꞌuꞌlal tzinwutz wetz, tzeꞌeꞌn tuꞌ eꞌ ban sweꞌj, chi ink awer nak ẍchiwutz.
Quinin na chitaneꞌ tan injisleꞌn.
16 Ja choꞌc tan inxuxeꞌn, nin ja chitzeꞌen sweꞌj, na na chiꞌch chicꞌuꞌl sweꞌj.
Nin yi na chixmayin tzaj swetz, tech cuꞌn tib yi na chiꞌch chicꞌuꞌl sweꞌj.
17 Ma jaluꞌ Wajcaw, ¿tonaꞌ tzꞌocuꞌ tan chicawseꞌn?
Chin coleꞌuꞌ ẍchikꞌab eꞌ incontraꞌtz, yi icuꞌn cyuchꞌ balum, yi na chinarcan tan weꞌj.
18 Swakꞌeꞌ tzun inkꞌajsbil teruꞌ ẍchiwutz jun cꞌoloj wunak.
Swakꞌeꞌ kꞌejuꞌ ẍchiwutz cyakil yi tanumuꞌ.
19 Quiꞌk chitzatzin eꞌ incontr sweꞌj, quiꞌtk chiban chiwutz swetz.
20 Yi eꞌ cyetz qui na chitzan tan joyleꞌn tzatzin paz.
Ntin na chitzan tan joyleꞌn puntil tan chisubleꞌn yi eꞌ wunak, yi quiꞌc na chiban.
21 Na chicꞌabeꞌn chitziꞌ tan inyolcheꞌn.
Itzun na cyaltz: “Ilwok nin nocxeꞌj. Mbi nin tal taneꞌnx,” cheꞌch na ban.
22 Poro choꞌn at swutzuꞌ Taꞌ.
Na tbituꞌ yi mbi na cyal.
Quil sjatxlen tibuꞌ sweꞌj.
23 Wajcaw, elk bin kꞌajabuꞌ sweꞌj, na iluꞌ inRyosil.
Chin ẍchꞌeyajuꞌ.
Okuꞌ tan banleꞌn taneꞌn, nin xomok wiꞌuꞌ sweꞌj.
24 Chin maꞌlajuꞌ Taꞌ.
Xomok cyentuꞌ te caꞌwluꞌ, bantz qui chitzeꞌeneꞌn yi eꞌ incontr sweꞌj.
25 Quiꞌk chitxum nin quiꞌk cyal yi eꞌaꞌtz swetz:
“Yaꞌstzun na kajtzeꞌj. Ja el cuꞌnx kaꞌn swutz.”
26 Nink tzꞌel cyetz chitxꞌix tanuꞌ, yi eꞌ yi na chitzeꞌen sweꞌj.
Nink tzꞌel chitxꞌix junawes, yi eꞌaꞌtz yi na cyocsaj quib balaj tzinwutz wetz.
27 Poro yi eꞌ wamiw yi xomij chiwiꞌ sweꞌj, baꞌn chitzatzin nin baꞌn chiẍchꞌin tan yi tzatziꞌn yi at tetz cyalmaꞌ, yi na quil yi ja wiꞌt chintxꞌacon.
Na ilenin na cyal cyetz:
“At wiꞌnin kꞌej Kataj. Nin wiꞌnin na tzatzin iꞌ, tan tuꞌ yi baꞌn atit yi tetz ẍchakum.”
28 Nin ko yaꞌtz tulejuꞌ, swaleꞌ yi chin tzꞌaknak cunin iluꞌ.
Nin cyakil kꞌej swakꞌeꞌ inkꞌajsbil teruꞌ.