Junit kaban tan takꞌleꞌn kꞌej Kataj
34
1 Cyakil nin kꞌej swakꞌeꞌ inkꞌajsbil tetz Kataj.Quil chinkꞌeꞌxij tan takꞌleꞌn inkꞌajsbil tetz.
2 Nternin na chintzatzin te iꞌ.
Bitwok tzaj bin inyol cyakil axwok yi axwok cꞌulutxum, nink cxtzatzinwok teꞌj.
3 Junit bin kaban tan takꞌleꞌn kꞌej iꞌ.
4 Ja cuꞌ inwutz tetz Wajcaw nin ja tbit iꞌ yi intziꞌ inkul.
Nin ja chin col iꞌ tkꞌab yi eꞌchk takleꞌn yi nchinxob tetz.
5 Na cyakil yi eꞌ yi ajlij chicꞌuꞌl te Kataj, ẍchitzatzink cyeraꞌtz.
Ej nin quil tzꞌel chitxꞌix.
6 Na yi in wetz, buchij chin.
Poro ja cuꞌ inwutz swutz iꞌ, nin ja tbit iꞌ intziꞌ inkul.
Nin ja chinẍchꞌeyaj tkꞌab sotzaj cꞌuꞌlal.
7 Na na oc yi tetz ángel tan quichꞌeyeꞌn nin tan chicolcheꞌn yi eꞌ yi na cyakꞌ kꞌej iꞌ.
8 Chipileꞌuꞌ bin, nin squileꞌuꞌ yi chumbalaj nin yi Kataj.
Baꞌn cyeri yi eꞌ yi choꞌn kꞌuklij chicꞌuꞌl te iꞌ.
9 Cyekeꞌuꞌ ẍchiꞌ iꞌ, yi eꞌuꞌ yi cyakꞌoꞌnt quibuꞌ tan chixconeꞌnuꞌ tetz.
Na na takꞌ iꞌ cyakil yi tajweꞌn scyetz yi eꞌ yi na choꞌc cꞌulutxum jakꞌ caꞌwl iꞌ.
10 Yi eꞌ ric na choꞌc cyetz tetz meꞌbaꞌ, nin na chitij weꞌj.
Poro yi eꞌ yi choꞌn kꞌuklij chicꞌuꞌl te Kataj, quil chitij cyeraꞌtz weꞌj, na stkꞌeꞌ iꞌ yi tajweꞌn scyetz.
11 Axwok witzꞌun or itetz. Bitwok tzaj
nin tzintxoleꞌ yi ẍeꞌn na ban takꞌleꞌn kꞌej Kataj:
12 ¿Na peꞌ itaj ben ẍkon muꞌẍt itiemp?
¿Na peꞌ itaj cxtzatzinwok coboxt kꞌej tzoneꞌj wuxtxꞌotxꞌ?
13 Makwok bin itziꞌ te eꞌchk cachiꞌ yol.
Nin quil tzijal cuꞌn jun wi itakꞌ scyetz alchok wunakil.
14 Jatxwok len itib te eꞌchk takleꞌn cachiꞌ.
Nin banwok taneꞌn yi eꞌchk takleꞌn balaj.
Joywok puntil tan qui jaleꞌn oyintziꞌ stzixoꞌlwok.
Nin ilenin banwok taneꞌn.
15 List atit Kataj tan quichꞌeyeꞌn yi eꞌ balaj nak.
Nin na tbit iꞌ, yi na cuꞌ chitziꞌ tetz.
16 Ma na contr iꞌ scyeꞌj yi eꞌ yi na chiban yi eꞌchk takleꞌn cachiꞌ.
Na chisotz taꞌn, nin junawes na cheꞌl te kacꞌuꞌl.
17 Poro na tbit Kataj yi na cuꞌ chitziꞌ yi eꞌ balaj nak tetz iꞌ.
Nin na cheꞌ ẍchꞌeyaj tkꞌab eꞌchk takleꞌn yi na ul ẍchiwutz.
18 List atit Ryos tan quichꞌeyeꞌn yi eꞌ yi ateꞌ tul bis, yi eꞌ yi quiꞌt na pujx cyaꞌn yi ẍeꞌn chiban.
19 At wiꞌnin pilbil tetz jun balaj nak.
Poro at nin Kataj tan ẍchꞌeyeꞌn.
20 At iꞌ tan qꞌuicyꞌleꞌn.
Nin quiꞌc nin jun bakil yi wankil yi nink jeꞌ wakꞌuꞌn.a
21 Ma yi eꞌ mal nak,
ẍchiquimok cyeraꞌtz tan ẍchojleꞌn yi cyetz quil.
Nin yi eꞌ yi na chiꞌch chicꞌuꞌl scyeꞌj yi eꞌ balaj nak,
ẍchicawsok cyeraꞌtz tan Ryos.
22 Poro yi oꞌ ketz yi oꞌ ẍchakum, kol kopon swutz iꞌ tan kacolol kib, tzꞌocopon tan kacolcheꞌn.