Baꞌn kakꞌ kakꞌajsbil tan tyoẍiꞌn tetz Kataj
33
1 Cyakꞌeꞌuꞌ chikꞌajsbiluꞌ tetz Ryos, cyakil yi eꞌuꞌ yi eꞌuꞌ balaj.Na chumbalaj nin na ban swutz Ryos, yi na cyakꞌ yi eꞌ balaj chikꞌajsbil tetz.
2 Katyoẍink bin tetz Kataj.
Baꞌn kakꞌ len kakꞌajsbil tetz iꞌ tan eꞌchk jilwutz maꞌcl chi taneꞌn arpa tu salterio.a
3 Kabitzij jun acꞌaj bitz swutz iꞌ.
Nin xconken eꞌchk maꞌcl.
Poro na taj yi skꞌil cuꞌn sban eꞌchk kulil.
4 Yi yol Kataj bintzi nin tetz.
Nin yi na kil eꞌchk takleꞌn balaj yi bnixnak taꞌn, baꞌn tzun kꞌukeꞌ kacꞌuꞌl teꞌj.
5 Wiꞌnin na pekꞌ iꞌ scyeꞌj yi eꞌ tzꞌaknak cuꞌn, nin yi eꞌ yi jicyuch te cyajtzaꞌkl.
Nin yi banl talmaꞌ iꞌ, at nintz beneꞌn tziꞌn.
6 Cyakil yi tcyaꞌj tu cyakil yi at tul, iꞌ bnol tetz.
Ntin ncawun iꞌ, nin ja bnix.
7 Ja xcyeꞌ iꞌ tan jutzꞌeꞌn, nin tan colcheꞌn cyakil yi aꞌ yi at xe mar.
8 Kakꞌeꞌ bin kꞌej iꞌ cyakil oꞌ yi oꞌ wunak.
Quiꞌc na ban alchok atoꞌt beneꞌn tziꞌn wi munt.
9 Na ja tal Kataj: “Na waj bnix eꞌchk takleꞌn.”
Nin ja bnix.
Ja cawun, nin ja chibixeꞌ quen cyakil eꞌchk takleꞌn yi at jaluꞌ.
10 Qui na takꞌ Kataj amaꞌl scyetz yi eꞌ mal wunak tan bixeweꞌn yi cyetz cyajbil.
11 Poro cyakil yi eꞌchk takleꞌn yi na xtxum Kataj, cyaꞌl jun na xcyeꞌ tan xiteꞌn.
12 Baꞌn teri yi ketz kanación na yi Kataj iꞌ yi kaRyosil.
Na iꞌ nkoꞌ txaꞌoneꞌn tan koqueꞌn tetz tanum iꞌ.
13 Na cheꞌ til Kataj cyakil yi eꞌ wunak yi ateꞌ beneꞌn tziꞌn wi munt.
14 Choꞌn at iꞌ jalen tziꞌn tcyaꞌj, poro na koꞌ til naꞌ atoꞌ quent lakak eꞌchk amaꞌl.
Na na til iꞌ naꞌ najlcheꞌt cyakil wunak.
15 Na iꞌ mbnon cyakil chiwankil, nin iꞌ na iꞌlon cyakil yi na chitzan tan banleꞌn.
16 Quil clax jun ajcaw, yi ko choꞌn tuꞌ kꞌuklij cꞌuꞌl te jun cꞌoloj sanlar.
Nin quil clax jun yaj tan yi tetz ẍchamil.
17 Nin quil xcyeꞌ jun chej tan colcheꞌn jun yaj, mpe chin cham nink yi chej.
18 Poro yi Kataj, na cheꞌ qꞌuicyꞌlej yi eꞌ yi na cyakꞌ kꞌej iꞌ, nin yi eꞌ yi choꞌn kꞌuklij chicꞌuꞌl te yi tetz balajil.
19 Na na chiclax taꞌn tkꞌab quimichil.
Nin na cheꞌ ẍchꞌeyaj tcꞌuꞌl yi tiemp yi na ul weꞌj ẍchiwutz.
20 Yi oꞌ ketz, choꞌn kꞌuklij kacꞌuꞌl te Kataj, na tzꞌocopon iꞌ tan kacolcheꞌn nin tan kuchꞌeyeꞌn.
21 Yi oꞌ ketz na katzatzin teꞌj.
Nin choꞌn kꞌuklij kacꞌuꞌl teꞌj, na chin xan nin yi tetz biꞌ.
22 Kataj lok ltakꞌuꞌ yi xtxaxl talmaꞌuꞌ sketz, na ntin at kachꞌiw teꞌjuꞌ.