Katxoleꞌ kil, na scuyeꞌ Ryos
32
1 Baꞌn cyeri yi eꞌ yi ja cuy Ryos cyakil chipaj chitxꞌokꞌbeꞌn.Baꞌn cyeri yi eꞌ yi ja wiꞌt stzajsaj Ryos quil.
2 Baꞌn cyeri yi eꞌ yi nkꞌeꞌtz txumijt nin cyaꞌn tan banleꞌn eꞌchk takleꞌn cachiꞌ, na quiꞌc cyetz quilaꞌtz swutz Ryos.
3 Poro tan paj yi quinin mintxol wil tetz Ryos, jalt nin bis waꞌn cyakil kꞌej.
Nin chebeleꞌn cuntuꞌ ja chinyabtij.
4 Nchaꞌtz ja chinnachon teꞌj yi inchuc atin cyakil kꞌej, na quiꞌct Ryos xomij sweꞌj.
Na ja chinloꞌon, chi na ban jun wiꞌ xtzeꞌ le tiemp cresum, yi ẍchuc na cuꞌ mol.
5 Chaꞌstzun te tetz cuꞌn walmaꞌ mintxol cyakil yi impaj intxꞌokꞌbeꞌn teruꞌ.
Ja bixeꞌ waꞌn tan intxolil cyakil yi wil teruꞌ.
Nin ja cuyuꞌ impaj.
6 Chaꞌstzun te baꞌn yi nink choꞌc cyakil yi eꞌ yi choꞌn kꞌuklij chicꞌuꞌl teꞌjuꞌ, tan naꞌwseꞌn biꞌuꞌ yi na ul sotzaj cꞌuꞌlal ẍchiwutz.
Nin ko yaꞌtz chiban, pe nink tzꞌul jun cꞌoloj sotzaj cꞌuꞌlal ẍchiwutz, quil chiloꞌon taꞌn.
7 Wajcaw, iluꞌ colol wetz.
Wiꞌnin na chintzatzin, na na ocuꞌ tan incolcheꞌn.
Nin yi na ul eꞌchk takleꞌn tzinwutz, na chinclax tanuꞌ.
8 Na je bin yoluꞌeꞌj Taꞌ:
“Xomchin tzaweꞌj tan takꞌleꞌn awajtzaꞌkl, nin tan achusleꞌn.
List in tan ẍchajleꞌn yi balaj beꞌ tzatz.
9 Poro ploj yi awajtzaꞌkl, yi ko niꞌcuꞌn tu tetz jun chej nka jun buruꞌ yi qui na pujx taꞌn yi mbi tajweꞌn tan bnol.
Na jun chej nka jun buruꞌ tajweꞌn jun prenuꞌ le stziꞌ tan talcheꞌn tetz yi naꞌl beneꞌt,” chijuꞌ bantz Taꞌ.
10 Na ilenin tzꞌul chicaws cyakil yi eꞌ mal nak tanuꞌ.
Nin ẍchitijeꞌ wiꞌnin qꞌuixcꞌuj.
Poro yi eꞌ yi choꞌn kꞌuklij chicꞌuꞌl teꞌjuꞌ, at yi banluꞌ squibaj.
11 Kakꞌeꞌ bin kakꞌajsbil tetz Kataj, cyakil yi oꞌ yi choꞌn kꞌuklij kacꞌuꞌl teꞌj.
Baꞌn yi ko nim kawiꞌ yil koꞌc tan takꞌleꞌn kakꞌajsbil tetz iꞌ.