Yi Kataj iꞌ colol ketz
31
1 Wajcaw, choꞌn kꞌuklij incꞌuꞌl teꞌjuꞌ.Qui bin chin tilcyenuꞌ sbneꞌ opon tunintz.
Chin coleꞌuꞌ, na yi iluꞌ teruꞌ chin tzꞌaknak cuninuꞌ.
2 Ajk cuntzaj wiꞌuꞌ tan tbiteꞌn inyol.
Elk kꞌajabuꞌ sweꞌj. Chin coleꞌuꞌ.
Okuꞌ tetz jun cꞌub kalel tzincolwit wib.
Okuꞌ tetz jun amaꞌl yi jopij cuꞌn teꞌj, kalel tzincolwit wib tan inclaxeꞌn.
3 Wajcaw, ntin iluꞌ colol wetz.
Chin coleꞌuꞌ bin, tan qui inloꞌoneꞌn, bantz jaleꞌn kꞌej yi biꞌuꞌ.
4 Ma jaluꞌ Wajcaw, chin tcyꞌajlenuꞌ tzoneꞌj.
Chin coleꞌuꞌ ẍchikꞌab eꞌ incontr, na iluꞌ colol wetz.
5 ¡Taꞌ! wabnaj walmaꞌ tkꞌabuꞌ.a
Chin coleꞌuꞌ, na iluꞌ yi Ryos yi bintzinin tetz.
6 Qui na chimpekꞌ scyeꞌj yi eꞌ yi na choꞌc tan cꞌuꞌlajeꞌn yi eꞌchk ryos yi banij cuntuꞌ, na choꞌn kꞌuklij wetz incꞌuꞌl teꞌjuꞌ.
7 Taꞌ, na chintzatzin tan yi banl talmaꞌuꞌ yi at swibaj, na ja tiluꞌ yi ja chimbisun, nin ja tiluꞌ yi ja ul sotzaj cꞌuꞌlal tzinwutz.
8 Poro quinin ntakꞌuꞌ amaꞌl scyetz eꞌ incontr tan cyoqueꞌn tan imbiyleꞌn.
Ma na ja neꞌl liwr tanuꞌ ẍchikꞌab.
9 Wajcaw, elk bin kꞌajabuꞌ sweꞌj, na atin tul sotzaj cꞌuꞌlal, na ja wiꞌt loꞌon inwutz tan bis oꞌkl.
Nin nchaꞌtz cyakil inwankil ja wiꞌt loꞌon.
10 Tzan imbiꞌẍineꞌn tan yi ẍchꞌonal cyakil yi eꞌchk takleꞌnaꞌtz.
Tzan loꞌoneꞌn inwankil tan yi bis oꞌkl yi atin cuꞌnt.
11 Ja wiꞌt noꞌc tetz chitzeꞌlbeꞌtz eꞌ incontr.
Ja wiꞌt noꞌc tetz chiyolbeꞌtz eꞌ inwisin.
Nin tircuꞌn wunak na chixob swetz.
Nin na cheꞌl ojk yi na quil inwutz.
12 Ja neꞌl te chicꞌuꞌl chi jun yaj yi quimnakt.
Niꞌcuꞌn in chi jun ẍwokꞌ yi cuꞌnak much, yi quiꞌct xac.
13 Nin na wit yi mbi na chitzan wunak tan xtxumleꞌn sweꞌj.
Ja wiꞌt jeꞌ chimolol quib chicyakil tan imbiyleꞌn.
14 Poro Wajcaw, yi in wetz, choꞌn kꞌuklij incꞌuꞌl teꞌjuꞌ.
Nin na wal: “Iluꞌ inRyosil.”
15 Choꞌn atin tkꞌabuꞌ.
Chincoleꞌuꞌ bin ẍchikꞌab eꞌ incontr, yi na cyaj chinquim cyaꞌn.
16 Elk kꞌajabuꞌ sweꞌj na in ẍchakumuꞌ.
Chin ẍchꞌeyajuꞌ tan yi banl talmaꞌuꞌ.
17 Wajcaw, choꞌn na cuꞌ inwutz teruꞌ.
Quiꞌk takꞌuꞌ amaꞌl tan teleꞌn intxꞌix.
Ma na ik chitxꞌix yi eꞌ pajol caꞌwl tzꞌel tanuꞌ.
Choꞌnk chopon tanuꞌ le amaꞌl yi chin tzꞌinunin tuꞌ ẍchixoꞌl almaꞌ.
18 Nink chiquim, bantz makxeꞌn chitziꞌ yi eꞌ laꞌjaꞌtz, yi na chiyol yi eꞌchk yol yi chin cachiꞌ nin, nin yi na choꞌc tan chisubleꞌn yi eꞌ balaj wunak.
19 Chumam nin banl talmaꞌuꞌ squibaj yi eꞌ yi na cyakꞌ kꞌejuꞌ.
Nin na cheꞌ coluꞌ chi na ban jun yaj tan colcheꞌn jun cꞌoloj puꞌk yi at xe caꞌl.
Nin ẍchiwutz cuꞌn cyakil wunak, na ocuꞌ tan takꞌleꞌn yi banl talmaꞌuꞌ squibaj yi eꞌ yi choꞌn kꞌuklij chicꞌuꞌl teꞌjuꞌ.
20 Nin na cheꞌ ẍchꞌeyajuꞌ tkꞌab eꞌchk takleꞌn cachiꞌ yi na chitxum wunak scyeꞌj.
Na na choꞌc tanuꞌ xe caꞌluꞌ tan chicolol quib tkꞌab yi jisbil cyetz cyakꞌun chicontr.
21 Ntyoẍ tetz Kataj na tan tuꞌ yi banl talmaꞌ iꞌ ja bnix eꞌchk takleꞌn balajaꞌtz sweꞌj yi mmuꞌl sotzaj cꞌuꞌlal tzinwutz.
22 Wajcaw, tan paj yi il yi atin cuꞌn sajleꞌn, ja noꞌc tan xtxumleꞌn yi ja neꞌl te cꞌuꞌluꞌ.
Poro yi woqueꞌn tan jakleꞌn ẍchꞌeybil wetz teruꞌ ja tbituꞌ intziꞌ inkul.
23 Cyakil axwok yi na itek ẍchiꞌ Kataj, akꞌwok kꞌej iꞌ, na na oc iꞌ tan quichꞌeyeꞌn yi eꞌ yi skoj cuꞌn te cyalmaꞌ.
Poro na takꞌ iꞌ chicaws yi eꞌ yi na cyocsaj quib nim tu cyajtzaꞌkl.
24 Quiwit bin, nimit chicꞌuꞌluꞌ, yi eꞌuꞌ yi choꞌn kꞌuklij chicꞌuꞌluꞌ te yi Katajaꞌtz.