Katyoẍink tetz Kataj
30
1 Wajcaw, na wakꞌ inkꞌajsbil tetz teruꞌ, na ja chinclax tanuꞌ.Nin quinin ntakꞌuꞌ amaꞌl scyetz eꞌ incontr tan chitzeꞌeneꞌn sweꞌj.
2 Wajcaw, iluꞌ inRyosil.
Ja injak ẍchꞌeybil wetz teruꞌ nin ja chin ẍchꞌeyajuꞌ.
Ja tzun ul yos tanuꞌ swuchꞌ.
3 Na ja chinclax tanuꞌ tkꞌab quimichil.
Nin ja takꞌuꞌ cobox kꞌej swetz tzoneꞌj.
4 Nchaꞌtz axwok itetz yi kꞌuklij icꞌuꞌl te Kataj, akꞌwok ikꞌajsbil tetz iꞌ. Na chin xan nin yi biꞌ iꞌ.
5 Nin ko na kajuch kil, na saj colpuj wiꞌ iꞌ skeꞌj tetz jun intziꞌ tkuj.
Poro yi banl talmaꞌ iꞌ qui bajsbeꞌn tetz.
Ko na kabisun lakꞌbal, yi na ul skil na katzatzin,
na na oc iꞌ tan kamayseꞌn.
6 Yi wetz kꞌuklij incꞌuꞌl, na na noꞌc tan xtxumleꞌn yi cyaꞌl jun xcyeꞌ sweꞌj.
7 Iluꞌ Wajcaw, tan yi balajiluꞌ ja ocuꞌ tan incolcheꞌn.
Poro ilenin ja neꞌl jun rat te cꞌuꞌluꞌ, na ja kloꞌ chinloꞌon.
8 Chaꞌstzun te Wajcaw, choꞌn na cuꞌ inwutz teruꞌ tan jakleꞌn ẍchꞌeybil wetz.
9 ¿Mbi ltakꞌ yi kol chinquim?
¿Mbi ltakꞌ kol chinmukxij?
Na yil tzꞌoc inwankil tetz txꞌotxꞌ puklaj, quiꞌct rmeril tan toqueꞌn tan takꞌleꞌn kꞌejuꞌ, nin quiꞌt tzꞌoc tan talcheꞌn yi balajiluꞌ.
10 Wajcaw, tbiteꞌuꞌ intziꞌ inkul.
Elk kꞌajabuꞌ sweꞌj, nin chin ẍchꞌeyajuꞌ.
11 Quiꞌt na chimbisun jaluꞌ ma na na chin tzatzin.
Quiꞌt na xcon yi beꞌch wetz tetz bis waꞌn, ma na, na chintzꞌitpun tan yi tzatzin yi atin cuꞌnt, na ja chin ẍchꞌeyajuꞌ.
12 Chaꞌstzun te Wajcaw, yi iluꞌ inRyosil, quiꞌc rmeril yi quiꞌk wakꞌ inkꞌajsbil teruꞌ.
Tajweꞌn chintyoẍin teruꞌ.