Wiꞌnin kꞌej Kataj tan cawuꞌn
29
1 Cyakil axwok yi atix tcyaꞌj, akꞌwok kꞌej Kataj, nin ekwok ẍchiꞌ.Na wiꞌnin ẍchamil, nin wiꞌnin kꞌej iꞌ.
2 Akꞌwok kꞌej yi biꞌ Kataj.
Akꞌwok ikꞌajsbil xe yi tetz caꞌl yi chumbalaj nin.
3 Na yi Kataj, at nin iꞌ-tz beneꞌn tziꞌn.
At yi tetz porer tibaj cyakil yi mar.
Na cyakil yi at beneꞌn tziꞌn, na quibit yi tetz caꞌwl.
4 Chin cham nin Kataj tan yol.
Nin wiꞌnin kꞌej iꞌ tan cawuꞌn.
Nin sbnixok yi tetz yi mbi na tal.
5 Yi na jilon Kataj niꞌcuꞌn na ban chi na cuꞌ jun kꞌancyok, yi na xcyeꞌ tan puchꞌleꞌn eꞌchk chin wutzileꞌn tzeꞌ cedro yi at wiꞌwtz Líbano.
6 Na yucan yi wiꞌwtz Líbano tu Sirión tan yi ẍchamil Kataj.
Na yucan chi na tzꞌitpun jun tal neꞌẍ wacẍ.
7 Yi eꞌchk yol yi na eltzaj le stziꞌ Kataj, choꞌn cuꞌn na ban chi na ban juꞌ kꞌakꞌ.
8 Nchaꞌtz yi na jilon Kataj, na yucan cyakil yi amaꞌl tzꞌinunin tuꞌ yi na biꞌaj Cades.
9 Nin na baj ẍchuquil eꞌchk wiꞌ bakch.
Quiꞌct nin tzeꞌ na ban cyen tulak eꞌchk amaꞌl kale atit wiꞌnin tzeꞌ.
Chaꞌstzun te cyakil eꞌ yi ateꞌ xe caꞌl iꞌ na cyakꞌ kꞌej iꞌ.
10 Yi Kataj iꞌ ajcaw tibaj cyakil yi eꞌchk takleꞌn.
Iꞌ na cawun te yi aꞌbal.
Nin scawunk iꞌ teꞌj tetz ben kꞌej ben sak.
11 Kataj na akꞌon chichamil yi tetz tanum.
Iꞌ na akꞌon chibanl tu tzatzin paz scyetz.