Na tbit Kataj yi katziꞌ kakul
28
1 Wajcaw, choꞌn na cuꞌ inwutz teruꞌ, na iluꞌ colol wetz.Quil stew tibuꞌ tzinwutz.
Stzaꞌwejuꞌ yi mbi na chintzan tan jakleꞌn teruꞌ, na ko quil stzaꞌwejuꞌ, ja tzun wiꞌt chinquim taneꞌn.
2 Chaꞌstzun te tbiteꞌuꞌ, na choꞌn na chinẍchꞌinin teruꞌ.
Nin choꞌn na inchaj nin inkꞌab kale atit yi caꞌluꞌ tan jakleꞌn ẍchꞌeybil wetz.
3 Yil tzꞌocuꞌ tan takꞌleꞌn chicaws yi eꞌ incontr, quiꞌk takꞌuꞌ yi wetz incaws.
Na yi eꞌ cyetz, chiwutz tuꞌ chiplaj tuꞌ, yi chin balaj nin eꞌ.
Poro chin juntlen nin eꞌ tu cyajtzaꞌkl.
4 Cheꞌ cawseꞌuꞌ.
Tuꞌk xom cyen tuꞌ te quil yi nchijuch, na wiꞌnin eꞌchk il ja baj chibnol.
5 Na siquier nak ul txꞌakx ẍchicꞌuꞌl yi iluꞌ bnol tetz cyakil yi eꞌchk takleꞌn yi at beneꞌn tziꞌn.
Na yi iluꞌ teruꞌ, baꞌn sbanuꞌ jun eꞌchk takleꞌn, nin baꞌn xit tanuꞌ, nin quiꞌt jal junt tir.
6 Ntyoẍ tetz Kataj na ja tbit iꞌ yi intziꞌ inkul.
7 Na at wiꞌnin ẍchamil, nin iꞌ yi colol wetz.
Choꞌn kꞌuklij incꞌuꞌl te iꞌ, na ja oc tan wuchꞌeyeꞌn.
Swakꞌeꞌ bin inkꞌajsbil tetz, nin chintyoẍink tetz, na na chintzatzin.
8 At iꞌ tan kuchꞌeyeꞌn yi oꞌ tetz tanum.
Nin at iꞌ tan ẍchꞌeyeꞌn nin tan colcheꞌn, yi rey yi txaꞌijt taꞌn.
9 Taꞌ, cheꞌ coleꞌuꞌ yi eꞌ teruꞌ tanumuꞌ.
Nin takꞌuꞌ banluꞌ squibaj yi eꞌ teruꞌ nitxajiluꞌ.
Cheꞌ qꞌuicyꞌlejuꞌ, chi na ban jun pstor tan chiqꞌuicyꞌleꞌn yi eꞌ tawun.
Ilenin cheꞌ qꞌuicyꞌlejuꞌ tan poreruꞌ sbneꞌ opon tunintz.