Kataj Ryos iꞌ txekbil ketz
27
1 Kataj Ryos iꞌ yi txekbil wetz.Nin iꞌ yi colol wetz tzoneꞌj wi munt.
¿Mbi tzun tzinxoꞌwlej?
Na xomij iꞌ tan inqꞌuicyꞌleꞌn.
Qui tzun chinxob tetz jun.
2 Cyakil yi eꞌ mal nak scyuchꞌ yi eꞌ incontr, ja jeꞌ chimolol quib tan imbiyleꞌn kloꞌ.
Poro eꞌ teꞌn nin nchibajtz tcꞌuꞌl chitxumuꞌn.
3 Pe nink chimoleꞌn quib jun cꞌoloj sanlar tan imbiyleꞌn, quil chinxob scyetz.
Pe nink choꞌc tan joyleꞌn puntil tan welseꞌn cuꞌn swutz, quil chimbisun taꞌn.
4 Jun ntziꞌ xtxolbil na waj tetz Kataj.
Iꞌtz: na waj chinxcon xe caꞌl iꞌ sbneꞌ opon tunintz, tan takꞌleꞌn kꞌej iꞌ, nin tan tilweꞌn yi tetz balajil.
5 Na yil tzꞌul eꞌchk cꞌalaj tiemp tzinwutz, kꞌuklij incꞌuꞌl yi tzꞌocopon Wajcaw tan incolcheꞌn tan yi tetz porer xe tetz caꞌl.
Niꞌcuꞌnk yi atink xlaj iꞌ, nka yi choꞌnk atink tib jun chin wutz cꞌub yi cyaꞌl jun jepon sweꞌj.
6 Nin tan iꞌ chinxcyeweꞌt scyeꞌj incontr, nin quil chintxꞌixwij ẍchiwutz.
Tan yi xtxolbilaꞌtz tzimpateꞌ intxꞌixwatz xe caꞌl iꞌ.
Swakꞌeꞌ inkꞌajsbil tetz Wajcaw tan yi tzatzin yi atin cuꞌnt.
7 Wajcaw, elk bin kꞌajabuꞌ sweꞌj.
Tbiteꞌuꞌ yi intziꞌ inkul, na na cuꞌ inwutz teruꞌ.
8 Na nternin na el walmaꞌ tan joyleꞌnuꞌ.
Yaꞌstzun na chintzan tan banleꞌn jaluꞌ.
9 Qui bin tew tibuꞌ tzinwutz.
Nin tan paj yi ẍchiꞌchbeꞌn cꞌuꞌluꞌ, quil chin tilcyenuꞌ, na choꞌn kꞌuklij incꞌuꞌl teꞌjuꞌ.
Quil chin til cyenuꞌ inchuc, na iluꞌ inRyosil nin iluꞌ colol wetz.
10 Pe nink chin quil cyen intaj intxuꞌ, quil chimbisun, na at ninuꞌ sweꞌj.
11 Wajcaw, ẍchajeꞌuꞌ yi tajbiluꞌ swetz.
Ẍchajeꞌuꞌ yi balaj beꞌ swetz na ateꞌ wiꞌnin incontr.
12 Quil takꞌuꞌ amaꞌl tan chitxꞌaconeꞌn yi incontr sweꞌj, na wiꞌnin laꞌjil na xcon cyaꞌn tan joyleꞌn wil.
Nin na chitzan tan xtxumleꞌn wiꞌnin eꞌchk takleꞌn tan inxoꞌwseꞌn.
13 Poro elnak intxum tetz yi tzꞌocoponuꞌ tan wuchꞌeyeꞌn.
Nin stkꞌeꞌuꞌ yi banluꞌ swibaj te yi tiempeꞌj yi atin tul.
14 Chaꞌstzun te eꞌuꞌ intanum quiwit.
Quil kacabej kacꞌuꞌl.
Kꞌukek kacꞌuꞌl te Kataj, na jun cuꞌn baꞌn kꞌukeꞌ kacꞌuꞌl te iꞌ.