Qui na chibisun yi eꞌ yi quiꞌc quil juchij cyaꞌn
26
1 Wajcaw, chin maꞌlajuꞌ.Na na chinnachon teꞌj yi quiꞌc na imban.
Nin qui na cabej muꞌẍ incꞌuꞌl teꞌjuꞌ.
2 Chaꞌstzun te baꞌn tzꞌocuꞌ tan maꞌleꞌn wajtzaꞌkl.
Maꞌlajuꞌ cyakil intxumuꞌn.
Maꞌlajuꞌ yi mbi na icyꞌ tincꞌuꞌl.
3 Na na wil cyakil yi banl talmaꞌuꞌ yi at sweꞌj.
Nin na chinxom te yi teruꞌ tajbiluꞌ.
4 Ej nin quiꞌc nin jun tir jak chinxom te cyajtzaꞌkl yi eꞌ laꞌj, scyuchꞌ yi eꞌ yi chiwutz tuꞌ chiplaj tuꞌ na cyocsaj quib tetz balaj.
5 Na chiꞌch incꞌuꞌl scyeꞌj yi eꞌ mal nak yi na chimol cuꞌn quib tan txumuꞌn.
Chaꞌstzun te quiꞌc nin jun tir yi jak naꞌtij ẍchixoꞌl.
6 Wajcaw, na waj nopon swutzuꞌ tan takꞌleꞌn kꞌejuꞌ.
Na na chinnachon te yi quiꞌc wil swutzuꞌ.
7 Nin na waj wakꞌ inkꞌajsbil teruꞌ.
Nin tzintxoleꞌ cyakil yi balajiluꞌ.
8 Na waj lwakꞌ kꞌej yi caꞌluꞌ, na choꞌn najlijuꞌ tul, nin choꞌn at yi pakꞌpuchaluꞌ tul.
9 Yil takꞌuꞌ chicaws yi eꞌ juchul il, quiꞌk takꞌuꞌ wetz incaws.
Nin nchaꞌtz, yil chiquim yi eꞌ biyol nak tanuꞌ, quiꞌk chinquim wetz scyeꞌj.
10 Na yi eꞌaꞌtz jalt nin juchleꞌn il cyaꞌn, na ntin xoꞌquiꞌn cyaꞌn scyeꞌj wunak.
Na ẍkan tzaj nin na cyaj.
11 Poro yi in wetz, na chinnachon teꞌj yi quiꞌc na imban.
Chaꞌstzun te elk kꞌajabuꞌ sweꞌj, nin chin coleꞌuꞌ Taꞌ.
12 Na ja ben wukan ttxꞌotxꞌ, nin baꞌn atineꞌt.
Chaꞌstzun te na wakꞌ kꞌejuꞌ
ẍchiwutz cyakil yi eꞌ nim juy, na iluꞌ Wajcaw.