Ẍchꞌeybil ketz tan keleꞌn liwr tkꞌab yi qꞌuixcꞌuj yi atoꞌ cuꞌnt
25
1 Wajcaw, choꞌn na chinjilon teruꞌ.2 Choꞌn kꞌuklij incꞌuꞌl teꞌjuꞌ na iluꞌ inRyosil.
Quil takꞌuꞌ amaꞌl tan teleꞌn intxꞌix.
Quil takꞌuꞌ amaꞌl tan chitzeꞌeneꞌn yi eꞌ incontr sweꞌj.
3 Na quil tzꞌel xtxꞌix jun yi ko kꞌuklij cꞌuꞌl teꞌjuꞌ.
Ma yi eꞌ yi na choꞌc tan contriꞌn teꞌjuꞌ yi eꞌ yi quiꞌc xeꞌ chitxumuꞌn, tzꞌelepon chitxꞌix.
4 Wajcaw, ẍchajeꞌuꞌ yi beꞌuꞌ swetz.
Chin tcyꞌaj ninuꞌ le yi beꞌuꞌ.
5 Ẍchajeꞌuꞌ yi mero bintzi swetz.
Na yi iluꞌ teruꞌ iluꞌ inRyosil, nin iluꞌ colpinl wetz.
Choꞌn kꞌuklij incꞌuꞌl teꞌjuꞌ cyakil kꞌej.
6 Wajcaw, quiꞌk tzꞌel yi banl talmaꞌuꞌ te cꞌuꞌluꞌ.
Nin ulk txꞌakx tcꞌuꞌluꞌ yi ilenin ja ẍchajuꞌ banluꞌ sketz.
7 Quiꞌk tzꞌocuꞌ tan xtxumleꞌn cyakil yi wil.
Quiꞌk tzꞌocuꞌ tan xtxumleꞌn yi eꞌchk takleꞌn yi mbnix cyen waꞌn te yi inxiquil tzaj.
Elk kꞌajabuꞌ sweꞌj tan yi banl talmaꞌuꞌ.
8 Yi Kataj chumbalaj nin iꞌ.
Nin chin jicyuch nin teꞌj tajtzaꞌkl.
Na na oc iꞌ tan makleꞌn chiwutz yi eꞌ juchul il.
9 Nin na ẍchaj iꞌ yi balaj beꞌ scyetz yi eꞌ cꞌulutxum.
Na oc iꞌ tan chichusleꞌn, tan chixomeꞌn te yi balaj ajtzaꞌkl.
10 Cyakil yi na ban Kataj skeꞌj na ẍchaj yi na peꞌk iꞌ skeꞌj, na list iꞌ tan teleꞌn cuꞌn te yi tetz yol yi sukiꞌnt taꞌn.
Nin ko na katzan tan banleꞌn taneꞌn yi tetz caꞌwl, at tzun kachꞌiw teꞌj yi tzꞌelepon kꞌab iꞌ te yi tetz yol.
11 Wajcaw, nimix cunin wil ja injuch swutzuꞌ.
Poro cuyuꞌ impaj tan jaleꞌn kꞌejuꞌ.
12 Cyakil yi eꞌ yi na cyek ẍchiꞌ Kataj, iꞌ na chajon yi mbiꞌtz tajweꞌn tan chibnol, bantz chixomeꞌn teꞌj.
13 Nin stkꞌeꞌ iꞌ yi banl squibaj.
Nin yi eꞌ chixonl, scyetzajeꞌ yi amaꞌl yi sukiꞌnt taꞌn.
14 Nternin na choꞌc nin na cheꞌl Kataj scyuchꞌ yi eꞌ yi na cyek ẍchiꞌ iꞌ.
Nin na oc iꞌ tan quichꞌeyeꞌn tan teleꞌn chitxum te yi trat yi bixbaꞌnt taꞌn.
15 Ilenin choꞌn na chinxmayin nin te Wajcaw.
Na iꞌ tzꞌocopon tan incolpeꞌn, tkꞌab yi eꞌchk il yi tzꞌul tzinwutz.
16 Wajcaw, elk kꞌajabuꞌ sweꞌj.
Xmayink tzajuꞌ swetz, na inchuc atin, nin buchij chin.
17 Chin coleꞌuꞌ tkꞌab yi bis oꞌkl yi atin cuꞌnt.
Na wiꞌnin na chimbisun.
18 Wajcaw, na tiluꞌ yi oꞌkl yi atin cuꞌnt, tu yi qꞌuixcꞌuj yi atin cuꞌnt.
Elk bin kꞌajabuꞌ sweꞌj, nin cuyuꞌ impaj.
19 Sak cuꞌn swutzuꞌ yi wiꞌnin chijaleꞌn mas incontr.
Sak cuꞌn swutzuꞌ yi nternin na chiꞌch chicꞌuꞌl sweꞌj.
Nin sak cuꞌn swutzuꞌ yi cyajbil iꞌtz yi ẍeꞌnk neꞌl cuꞌn swutz.
20 Chin qꞌuicyꞌlejuꞌ bin, nin chin colpeꞌuꞌ ẍchikꞌab eꞌ incontraꞌtz.
Quil takꞌuꞌ amaꞌl tan teleꞌn intxꞌix.
Na choꞌn kꞌuklij incꞌuꞌl teꞌjuꞌ.
21 Nink xcyeꞌ yi incꞌulutxumil tu yi imbalajil tan incolcheꞌn.
Na nternin kꞌuklij incꞌuꞌl teꞌjuꞌ.
22 Kataj, koꞌ colpeꞌuꞌ tkꞌab cyakil yi qꞌuixcꞌuj yi atoꞌ cuꞌnt, yi oꞌ xonl Israel.