Yi taw cyakil yi at beneꞌn tziꞌn
24
1 Tetz Kataj cyakil yi at beneꞌn tziꞌn wi munt.Tetz iꞌ cyakil yi wuxtxꞌotxꞌ.
Tetz iꞌ cyakil yi eꞌchk takleꞌn yi at.
2 Iꞌ bnol tetz cyakil.
Iꞌ jatxon cuꞌn yi aꞌ tan jaleꞌn yi wuxtxꞌotxꞌ.
3 ¿Naꞌ scyetz eꞌ yi baꞌn chopon wi juꞌwtz kale najleꞌt Kataj?
¿Naꞌ scyetz eꞌ yi baꞌn chinajeꞌ le najbil, yi jun yi wiꞌnin xanil?
4 Ntin cuꞌn yi eꞌ yi quinin chixconsaj chikꞌab tan banleꞌn takleꞌn cachiꞌ.
Ntin cuꞌn yi eꞌ yi skoj cuꞌn te cyajtzaꞌkl.
Ntin cuꞌn yi eꞌ yi qui na chilokꞌ yi eꞌchk takleꞌn yi banij tuꞌ taneꞌn.
Ntin cuꞌn yi eꞌ yi na cheꞌl cuꞌn te chiyol.
5 Yaꞌstzun yi eꞌaꞌtz yi stkꞌeꞌ Kataj banl squibaj.
Stkꞌeꞌ iꞌ chibalajil, na iꞌ colpinl ketz.
Ej nin yaꞌstzun quitaneꞌn yi eꞌ yi na el cyalmaꞌ tan chixomeꞌn te Ryos.
6 Ej nin yaꞌtz quitaneꞌn yi eꞌ yi na cyaj chopon kale atiteꞌt yi Ryosil kꞌajtzun kamam Jacow.
7 Chꞌuysoken yi wutz tkan yi sawan, yi jun sawanaꞌtz yi at nintz sajleꞌn tunintz.
Chꞌuysoken yi wutz tkan, bantz toqueꞌn yi kaReyil tcꞌuꞌl, yi kaReyil yi wiꞌnin kꞌej.
8 ¿Naꞌ tzun scyetz iꞌ yi jun Reyaꞌtz, yi wiꞌnin kꞌej?
Iꞌtz yi Kataj yi wiꞌnin porer.
Iꞌtz yi Kataj yi at ẍchamil tan oyintziꞌ.
9 Chꞌuysoken yi wutz tkan yi sawan.
Chꞌuysoken yi wutz tkan yi jun sawanaꞌtz, yi at nintz sajleꞌn tunintz, bantz toqueꞌn yi kaReyil, yi kaReyil yi wiꞌnin kꞌej.
10 ¿Naꞌ tzun scyetz iꞌ yi jun Reyaꞌtz, yi wiꞌnin kꞌej?
Iꞌtz yi Kataj yi cyaꞌl na xcyeꞌ quen teꞌj.
Iꞌtz yi wiꞌtz Ajcaw yi taw yi tcyaꞌj tu yi wuxtxꞌotxꞌ.