Yi balaj pstor
23
1 Yi Wajcaw, iꞌ pstor wetz. Chaꞌstzun te quiꞌc tajweꞌn swetz.2 Choꞌn na nujeꞌ taꞌn xoꞌl balaj chꞌim.
Nin choꞌn na chincꞌaꞌchxij taꞌn tzi balaj aꞌ, yi quiꞌc mas tojkbil.
3 Yi jun pstor wetzaꞌtz, yaꞌstzun yi jun yi na oc tan quiwseꞌn walmaꞌ.
Nin iꞌ yi jun yi na oc tan ẍchajleꞌn swetz yi ẍeꞌn wulej tan imbnol taneꞌn yi eꞌchk takleꞌn balaj, bantz jaleꞌn kꞌej iꞌ.
4 Ej nin quiꞌc na ban, kol chinxon tul jun chin siwun yi chin tzꞌoꞌtz nin, kale wutz cyen quimichil sweꞌj, na xomij Wajcaw sweꞌj tan inqꞌuicyꞌleꞌn.
Quil chinxob, na cyꞌaꞌn xtxꞌamij tu ẍcharyon taꞌn tan incolcheꞌn.
Chaꞌstzun te na jal inwalor nin qui na chinxob.
5 Choꞌn na takꞌ inwaꞌ ẍchiwutz cunin yi eꞌ yi na chitzan tan inxuxeꞌn.
Nchaꞌtz na kojeꞌn balaj tzꞌacꞌbil tinwiꞌ.
Nin na noj cunin inlak taꞌn.
6 Te yi atin tzoneꞌj wi munt, ilenin na xom yi banl tu xtxaxl talmaꞌ Wajcaw sweꞌj.
Ej nin tzantzaj, ẍchin najank xe caꞌl iꞌ tetz ben kꞌej ben sak.