Oꞌkl swutz Ryos nin kꞌajsbil tetz iꞌ
22
1 Ay Taꞌ, iluꞌ inRyosil.¿Mbi tzuntz yi nchincyaj tiloluꞌ?
¿Mbi tzuntz yi qui na uꞌluꞌ tan incolcheꞌn?
¿Mbi tzuntz yi qui na tbituꞌ yi intziꞌ yi inkul?
2 ¡Ay Taꞌ!
Skꞌejl nin lakꞌbal na chintzan tan jakleꞌn ẍchꞌeybil wetz teruꞌ.
Poro qui na stzaꞌwejuꞌ.
Wech, na qui na nujeꞌ tan jakleꞌn ẍchꞌeybil wetz teruꞌ.
3 Poro yi iluꞌ teruꞌ Taꞌ, skawutz yi oꞌ xonl Israel chin tzꞌaknak cuninuꞌ.
Iluꞌ cawl ketz.
Nin iluꞌ yi jun yi na katzan tan cꞌuꞌlajeꞌn.
4 Choꞌn nkꞌukeꞌ chicꞌuꞌl yi eꞌ kamam kateꞌ teꞌjuꞌ.
Nin iluꞌ ocnak tan chicolpeꞌn.
5 El chitziꞌ teruꞌ, chaꞌstzun te chiclaxeꞌn tanuꞌ.
Nternin kꞌukeꞌ chicꞌuꞌl teꞌjuꞌ, nin jun cuꞌn ja el kꞌabuꞌ te yoluꞌ.
6 Ma ẍchiwutz wunak, yi in wetz niꞌcuꞌn in tu jun amluꞌ.
In tuꞌ chitzeꞌlbeꞌtz.
7 Na cyakil yi eꞌ yi na quil in wutz, na choꞌc tan xbajtziꞌiꞌn sweꞌj.
Na chucan len chiwiꞌ nin na cyaltz:
8 “Ja tabnaj tibx tkꞌab yi Ryosil.
Poro iẍkaj tzꞌeleponkx liwr taꞌn.
Wiꞌnin na pekꞌx teꞌj tajcawil.
Poro iẍkaj sclaxoka taꞌn,” cheꞌch.
9 Poro iluꞌ Taꞌ iluꞌ nnoꞌcsan twankil intxuꞌ tan wuleꞌn tzoneꞌj wuskil.
Nin iluꞌ nchinchꞌuysan, jetz yi intxutxuneꞌn te intxuꞌ.
10 Te yi ntaxk nitzꞌij, sken noꞌc wetz tetz qꞌuicyꞌbeꞌtzuꞌ.
Te yi atin tzaj twankil intxuꞌ, iluꞌ inRyosil.
11 Chaꞌstzun te Taꞌ, quil sjatxlen tibuꞌ sweꞌj.
Na txant tan tuleꞌn jun chin sotz cꞌuꞌlal tzinwutz.
Nin quiꞌc jun atk tan wuchꞌeyeꞌn.
12 Yi eꞌ incontr ja wiꞌt chin baj chisutal.
Niꞌcuꞌn quitaneꞌn chi taneꞌn mam tor.
Chin xoꞌwbil nin chiwutz, chi quitaneꞌn yi eꞌ smaron wacẍ yi ateꞌ wi Basán.
13 Nchaꞌtz niꞌcuꞌn quitaneꞌn chi quitaneꞌn balum yi na chiẍchꞌin.
Jakij chin chitziꞌ cyaꞌn.
Jalt cuntunin tan chisajeꞌn wokpuj tinwiꞌ.
14 Ja neꞌl num ẍchikꞌab yi eꞌ incontraꞌtz.
Nchaꞌtz taneꞌn walmaꞌ, niꞌcuꞌn taneꞌn tu xcab yi tzan teleꞌn num.
Nin ja el kꞌok cyakil imbakil.
15 Nchaꞌtz taneꞌn intziꞌ, ja wiꞌt skej chi taneꞌn jun piẍ xcꞌoꞌn txꞌotxꞌ.
Nin yi wakꞌ ja ajeꞌn wutz injaꞌj.
Na txant cun tuꞌ tan inquimeꞌn.
16 Na sutiꞌn chin cyakꞌun jun cꞌoloj incontr, chi na chiban txꞌiꞌ.
Sutiꞌn chin cyakꞌun jun cꞌoloj mal nak.
Nin ja wiꞌt kopxij yi inkꞌab tu wukan cyaꞌn.
17 Lajluch cuꞌn cyakil yi imbakil na quiꞌct nin in.
Nin jalt nin in na chitzan eꞌ incontraꞌtz tan inxmayeꞌn.
18 Ej nin ja choꞌc tan txꞌiluꞌn te beꞌch wetz,b tan quilol naꞌl camban tetz.
19 Poro yi iluꞌ teruꞌ Wajcaw, quil chin tilcyenuꞌ.
Na iluꞌ akꞌol inwalor. Ulk chanuꞌ tan wuchꞌeyeꞌn.
20 Chin coleꞌuꞌ, tan qui inquimeꞌn tan spar.
Chin coleꞌuꞌ tan qui inquimeꞌn cyakꞌun yi eꞌ chin txꞌiꞌaꞌtz.
21 Chin coleꞌuꞌ tan qui imbajeꞌn cyakꞌun yi eꞌ balum.
Chin coleꞌuꞌ tan qui inloꞌoneꞌn takꞌun cyucꞌ yi eꞌ mam tor, yi chin xoꞌwbil nin chiwutz.
22 Taꞌ, swaleꞌ yi stziblaluꞌ scyetz yi eꞌ tal witzꞌun.
Chimbitzink ẍchiwutz yi eꞌ nim juy tan takꞌleꞌn inkꞌajsbil swutzuꞌ.
23 Nchaꞌtz cyakil yi eꞌuꞌ yi na cyekuꞌ ẍchiꞌ Kataj, cyakꞌeꞌuꞌ chikꞌajsbiluꞌ tetz.
Cyakil yi eꞌuꞌ xonl Israel, cyakꞌeꞌuꞌ kꞌej iꞌ, nin cyekeꞌuꞌ ẍchiꞌ Kataj.
24 Na cyakil yi eꞌ yi na sotz chicꞌuꞌl, qui na cheꞌl te cꞌuꞌl iꞌ.
Qui na tew tib iꞌ ẍchiwutz.
Ma na ilenin na cheꞌ stzaꞌwej yi mbi cuꞌn tajweꞌn scyetz.
25 Ẍchiwutz cunin yi eꞌ nim juy yil wakꞌ kꞌejuꞌ.
Nchaꞌtz ẍchiwutz cunin yi eꞌ nim juy, yil tzꞌel inkꞌab te yi sukiꞌnt waꞌn teruꞌ.
26 Snojk chicꞌuꞌl yi eꞌ yi quiꞌc ateꞌ cuꞌnt.
Nin yi eꞌ yi na chitzan tan joyleꞌnuꞌ, scyakꞌeꞌ chikꞌajsbil teruꞌ.
Nin ẍchinajank wiꞌnin tiemp tanuꞌ.
27 Cyakil yi eꞌ wunak beneꞌn tziꞌn wi munt, tzꞌelepon chitxum tetz Kataj.
Nin te yi tiempaꞌtz, ẍchimejek, nin chocpon tan takꞌleꞌn kꞌej iꞌ.
28 Na yi ketz Kataj iꞌ yi wiꞌtz Ajcaw.
Nin scawunk iꞌ scyeꞌj cyakil wunak beneꞌn tziꞌn wi munt.
29 Cyakil yi eꞌ ric chocopon tan cꞌuꞌlajeꞌn iꞌ.
Nin cyakil yi eꞌ yi txꞌaklij quimichil ẍchiwutz ẍchimejek swutz iꞌ.
Nchaꞌtz cyakil yi eꞌ yi quil chixcyeꞌ tan claxeꞌn cyalmaꞌ ẍchimejek swutz iꞌ.
30 Cyakil yi eꞌ wunak yi xomcheꞌ tzaj,
ẍchibneꞌ chimunl swutz.
Nin ẍchitxoleꞌ yi balajil Kataj scyetz chinitxaꞌ tu chimamaj sbneꞌ opon tunintz.
31 Nin yi chinitxaꞌ tu chimamaj,
ẍchitxoleꞌ scyetz yi cyetz chinitxaꞌ tu chimamaj yi balajil Kataj nin cyakil yi bnixnak taꞌn.