Kakꞌeꞌ kakꞌajsbil na ja txꞌacon kareyil
21
1 Iluꞌ Kataj, wiꞌnin na tzatzin yi ketz kareyil, na iluꞌ mmakꞌon tzaj ẍchamil.Wiꞌnin na tzatzin na ja txꞌacon tan poreruꞌ.
2 Cyakil yi mmeꞌl talmaꞌ iꞌ teꞌj, ja wiꞌt takꞌuꞌ tetz.
Quiꞌc nin jun takleꞌn yi njak iꞌ teruꞌ yi quiꞌk ntakꞌuꞌ tetz.
3 Ja takꞌuꞌ cyakil yi banl talmaꞌuꞌ tibaj.
Nin ja je tkꞌoluꞌ jun coron twiꞌ yi oro cuꞌn.
4 Ja jakꞌ iꞌ stzꞌajbil teruꞌ, nin ja takꞌuꞌ tetz.
Ja takꞌuꞌ tetz iꞌ tetz ben kꞌej ben sak.
5 Ntyoẍ teruꞌ tan xtxaxl talmaꞌuꞌ yi at tibaj.
Na ja jal wiꞌnin kꞌej yi ketz kareyil.
Nin ja jal ẍchamil, na iꞌ yi wiꞌtz ajcaw.
6 Ja takꞌuꞌ banluꞌ tibaj tetz ben kꞌej ben sak.
Nin wiꞌnin na tzatzin iꞌ, na ilenin atuꞌ teꞌj.
7 Poro yi iluꞌ teruꞌ, iluꞌ kareyil, choꞌn kꞌuklij cꞌuꞌluꞌ teꞌj Kataj.
Quil tzꞌel majij yi caꞌwl tkꞌabuꞌ, na choꞌn kꞌuklij cꞌuꞌluꞌ te yi junaꞌtz yi taw yi tcyaꞌj tu yi wuxtxꞌotxꞌ.
8 Xtxꞌaconkuꞌ scyeꞌj cyakil yi contruꞌ, na yi iluꞌ teruꞌ iluꞌ yi wiꞌtz ajcaw.
Scawunkuꞌ scyeꞌj cyakil yi eꞌ yi na chiꞌch chicꞌuꞌl teꞌjuꞌ.
9 Ej nin yil tzꞌul tzajuꞌ tan pujleꞌn xtisyaꞌ,
ẍchitzꞌeꞌok cyakil yi eꞌ contruꞌ, tan jun chin wutzileꞌn kꞌakꞌ.
Na yi jun kꞌakꞌaꞌtz choꞌn tzꞌul kojol Kataj tcyaꞌj, tan chitzꞌeꞌseꞌn tircuꞌn.
10 Nchaꞌtz cyakil yi chinitxaꞌ, yi ateꞌ beneꞌn tziꞌn wuxtxꞌotxꞌ, chisotzok.
Nin nchaꞌtz ẍchibneꞌ chixonl, tircuꞌn chisotzok.
11 Peloꞌk choꞌc tan joyleꞌn puntil tan banleꞌn mal teruꞌ, nka tan xtxumleꞌn eꞌchk takleꞌn tan telseꞌn kꞌejuꞌ, quil chixcyeꞌ.
12 Yil xcon yi cꞌoxbiluꞌ tan chibiyleꞌn, ẍchoꞌjkok swutzuꞌ.
13 Wajcaw, skakꞌeꞌ kakꞌajsbil teruꞌ, na wiꞌnin poreruꞌ.
Skabitzink swutzuꞌ, na ja kil yi ẍchamiluꞌ.