Xtxꞌaconk kareyil tan porer Kataj
20
1 Lok tbit Kataj yi stziꞌuꞌ, te yi atuꞌ tul sotzaj cꞌuꞌlal.Lok tzꞌoc yi kaRyosil, yi Ryosil Jacow tan colcheꞌnuꞌ.
2 Choꞌnk saj ẍchꞌeybil teruꞌ le amaꞌl yi wiꞌnin xanil.
Choꞌnk saj wi Sión kale najleꞌt Ryos.
3 Lok tzꞌul txꞌakx tcꞌuꞌl iꞌ cyakil yi oy yi ja wiꞌt takꞌuꞌ tetz.
Lok tzatzin te cyakil xtxꞌixwatzuꞌ yi ja pat-xij tanuꞌ.
4 Lok takꞌ iꞌ yi tajbil talmaꞌuꞌ.
Lok jamelan cyakil yi na tajuꞌ sbanuꞌ.
5 Yil txꞌaconuꞌ kaẍchꞌink tan yi tzatziꞌn yi atoꞌ cuꞌnt.
Kachajeꞌ eꞌchk kabander tan takꞌleꞌn kꞌej yi kaRyosil.
Lok takꞌ Kataj cyakil yi na tzanuꞌ tan jakleꞌn tetz.
6 Na kocsaj yi tzꞌocopon Kataj tan colcheꞌn yi kareyil, yi txaꞌijt taꞌn.
Nin na kocsaj yi stkꞌeꞌ iꞌ yi ẍchꞌeybil tetz.
Choꞌn lsaj taꞌn le tetz najbil yi at tcyaꞌj, yi wiꞌnin xanil.
Nin na kocsaj yi xtxꞌaconk iꞌ scyeꞌj yi eꞌ contr tan yi tetz porer.
7 At eꞌ yi choꞌn kꞌuklij chicꞌuꞌl te chicareꞌt tetz oyintziꞌ.
Nin at eꞌ yi choꞌn kꞌuklij chicꞌuꞌl te chichej.
Poro yi oꞌ ketz choꞌn kꞌuklij kacꞌuꞌl te Kataj, yi kaRyosil.
8 Yi eꞌaꞌtz, cupon nukpuj quikan, nin chicupon trimp, na quiꞌt jal chiwalor.
Tircuꞌn ẍchisotzok cyeraꞌtz.
Ma yi oꞌ ketz, iẍnin txicl choꞌ.
Nin iẍnin benak kukan ttxꞌotxꞌ.
9 Iluꞌ Kataj, lok tbituꞌ yi katziꞌ kakul, yil koꞌc tan jakleꞌn ẍchꞌeybil tetz yi kareyil.