Cyakil eꞌchk txꞌuml na ẍchaj yi kꞌej tu balajil Ryos
19
1 Cyakil yi at tcyaꞌj na ẍchaj yi kꞌej Ryos.Cyakil yi wutz cyaꞌj na jilon te yi balajil yi takꞌun iꞌ.
2 Cyakil nin kꞌej na cyal yi balajil Ryos.
Cyakil nin akꞌbal na chichaj yi tajtzaꞌkl iꞌ.
3 Quiꞌc jun jilwutz yol najk xcon cyaꞌn.
Quiꞌc jun yol na cyal, nin qui na kubit wiꞌ jun.
4 Poro yi xtxolbil yi na chichaj ilijt cyaꞌn cyakil wunak beneꞌn tziꞌn wi munt, jalen te yi najbil yi kꞌej.
5 Ej nin yi kꞌej chin tzatzin cuꞌn na el tan xoꞌn, chi na ban jun aj txꞌaconl, nka chi na ban jun yaj yi inak cuꞌn moꞌc txkel.
6 Choꞌn na jeꞌul teleꞌn tziꞌn.
Ej nin na xon jalen yil tzꞌopon toqueꞌn tziꞌn.
Quiꞌc nin jun eꞌchk takleꞌn yi najk tew tib swutz yi stzꞌaꞌal.
7 Nchaꞌtz yi ẍchusuꞌn Kataj, chin tzꞌak nak cuꞌn.
Na takꞌ acꞌaj itzꞌajbil sketz.
Nchaꞌtz yi caꞌwl Kataj, baꞌn kꞌukeꞌ kacꞌuꞌl teꞌj.
Nin yi eꞌ yi quiꞌc chichusuꞌn, sjalok cyajtzaꞌkl taꞌn.
8 Quiꞌc muꞌẍ paltil yi yol Kataj.
Nin na takꞌ tzatzin tetz ketz.
Chin tzꞌak nak cuꞌn yi eꞌchk caꞌwlaꞌtz.
Nin na el pacx wutz kajtzaꞌkl taꞌn.
9 Chumbalaj nin kol kek ẍchiꞌ yi yol Kataj, na quil sotz teraꞌtz.
Chin jicyuch nin teꞌj yi eꞌchk caꞌwlaꞌtz.
10 Mas tcuꞌn balaj swutz yi oro, nka yi pwok.
Ej nin mas tcuꞌn chiꞌ swutz yi cabil wunak txuc.
11 Na xcon tan makleꞌn kawutz.
Ej nin sjamelank, kol kaban taneꞌn.
12 Taꞌ, at loꞌ wil yi qui na chinnachon teꞌj.
Poro cuyuꞌ impaj.
13 Ej nin ko na wocsaj wib nim, xit cuꞌnuꞌ yi jun wajtzaꞌklaꞌtz.
Quil takꞌuꞌ amaꞌl te jun ajtzaꞌklaꞌtz tan impoꞌtzeꞌn.
Na ko yaꞌtz sbanuꞌ Taꞌ, nocopon tzuntz tetz jun yaj yi tzꞌaknak cuꞌn.
Nin nelepon liwr tkꞌab yi jun yab ajtzaꞌklaꞌtz.
14 Wajcaw, lok tzatzinuꞌ te yi eꞌchk yol yi na el le intziꞌ.
Lok tzatzinuꞌ te yi mbi na icyꞌ tincꞌuꞌl.
Max cꞌuꞌluꞌ Wajcaw, na iluꞌ lokꞌol wetz, nin iluꞌ colpinl wetz.