Chin colpeꞌuꞌ ẍchikꞌab yi eꞌ mal nak
43
1 Siwl Taꞌ, chin maꞌlajuꞌ bantz tiloluꞌ yi quiꞌc impaltil.Xomok wiꞌuꞌ sweꞌj, na quiꞌc wil.
Chin colpeꞌuꞌ ẍchikꞌab yi eꞌ mal nak, yi eꞌ yi chin laꞌj nin eꞌ.
2 Na yi iluꞌ teruꞌ, iluꞌ inRyosil, iluꞌ colol wetz.
¿Mbi tzuntz yi nchincyaj tiloluꞌ?
¿Mbi tzuntz yi na takꞌuꞌ amaꞌl tan imbisuneꞌn?
¿Mbi tzuntz na takꞌuꞌ amaꞌl scyetz incontr tan imbuchleꞌn?
3 Ẍchajeꞌuꞌ yi bintzi swetz.
Ẍchajeꞌuꞌ swetz bantz inxomeꞌn te yi balaj beꞌ, yi na opon kale atit yi wiꞌwtz yi chin xan nin, kale najleꞌtuꞌ.
4 Ko yaꞌtz tulejuꞌ, nocopon tzuntz swutz yi patbil katxꞌixwatz.
Swakꞌeꞌ inkꞌajsbil swutzuꞌ tan arpa.
Na ntin iluꞌ Taꞌ, na akꞌon tzatzin swetz.
5 Chaꞌstzun te,
¿mbi xac tzincabej incꞌuꞌl?
¿Mbi xac na chimbisun?
Baꞌn tcuꞌn kꞌukek incꞌuꞌl te wetz inRyosil.
Swakꞌeꞌ inkꞌajsbil tetz.
Na iꞌ inRyosil, nin iꞌ yi colol wetz.