Tan Kataj nkaxcyeweꞌt scyeꞌj kacontr
44
1 Ma jaluꞌ kaRyosil, ja kubit yi mbi cuꞌn banakuꞌ tenẍchan.Ja kubit scyetz yi eꞌ kamam kateꞌ, yi mbi banakuꞌ te yi ateꞌ tzaj cyetz.
2 Na iluꞌ mmakꞌon chicaws yi eꞌ mal nak.
Nin iluꞌ eꞌ lajun len swutz yi cyetz chiluwar, nin ja takꞌuꞌ scyetz yi eꞌ kamam kateꞌ.
3 Na iluꞌ akꞌon amaꞌl scyetz kamam kateꞌ tan cyetzal yi eꞌchk amaꞌlaꞌtz.
Na yi eꞌ cyetz, quinin kloꞌ eꞌ xcyeꞌ cyetz tan cyetz chispar cun tuꞌ.
Ma na tan yi teruꞌ poreruꞌ, nin tan yi ẍchamiluꞌ nchixcyeweꞌt.
Na ja xomuꞌ scyeꞌj tul yi oyintziꞌ tan tuꞌ yi mpekꞌuꞌ scyeꞌj.
4 Iluꞌ kaReyil, iluꞌ kaRyosil, na el katxum tetz yi iluꞌ mmakꞌon amaꞌl scyetz kamam kateꞌ tan chixcyeweꞌn te chicontr.
5 Nchaꞌtz mbanuꞌ skeꞌj ketz, na tan iluꞌ nkaxcyeweꞌt scyeꞌj yi eꞌ ketz kacontr.
Nin tan tuꞌ yi xomijuꞌ skeꞌj, junawes ncheꞌl cuꞌn yi eꞌ kacontr kaꞌn swutz.
6 Chaꞌstzun te, yi in wetz, qui na kꞌukeꞌ incꞌuꞌl te yi eꞌchk inmaꞌcl, chi taneꞌn yi cꞌoxbil inflech nka chi taneꞌn weri inspar.
7 Na iluꞌ nkacolon ẍchikꞌab yi eꞌ kacontr.
Ej nin tan iluꞌ ja el chitxꞌix yi eꞌ kacontraꞌtz kaꞌn.
8 Chaꞌstzun te, ilenin skakꞌeꞌ kꞌejuꞌ.
Nin skakꞌeꞌ kakꞌajsbil swutzuꞌ sbneꞌ opon tunintz.
9 Poro lastum, ja keꞌl te cꞌuꞌluꞌ Taꞌ, na ja takꞌuꞌ amaꞌl tan teleꞌn katxꞌix.
Nin quiꞌt na xomuꞌ skeꞌj yi na keꞌl tan oyintziꞌ.
10 Ja takꞌuꞌ amaꞌl scyetz kacontr tan chixcyeweꞌn skeꞌj, na ja keꞌl ojk ẍchiwutz.
Nin ja ben chicyꞌal cyakil yi eꞌchk kameꞌbiꞌl.
11 Ja takꞌuꞌ amaꞌl scyetz kacontr tan kabiyleꞌn, chi na ban jun tal cneruꞌ yi na ben tkꞌab biyol tetz.
Nin ja takꞌuꞌ amaꞌl tan keleꞌn xit beneꞌn tziꞌn ẍchixoꞌl yi eꞌ awer nak.
12 Ja koꞌ ben cꞌayiluꞌ.
Chin warat nin nkabeneꞌt cꞌayiluꞌ.
Quiꞌc nin muꞌẍ tal kaxac, na quiꞌc nxtxicbaj teruꞌ, yi mben cꞌayiluꞌ oꞌ.
13 Ja koꞌc tetz chiyolbeꞌtz cyakil wunak.
Nin nchaꞌtz yi eꞌ kawisin ja chitzeꞌen skeꞌj.
14 Na ja takꞌuꞌ amaꞌl scyetz yi eꞌ awer nak tan cyoqueꞌn tan kayolcheꞌn.
Ej nin yi na choꞌc tan kayolcheꞌn, na chitzeꞌen skeꞌj.
15 Quiꞌc nin jun tkuj yi quiꞌk na katxꞌixwij.
Chin txꞌixwil nin kawutz.
16 Poro iꞌtz tan chipaj yi eꞌ kacontraꞌtz, yi na chitzan tan kabuchleꞌn nin tan kayolcheꞌn.
17 Yaꞌstzun kutaneꞌn ẍchikꞌab.
Poro nkꞌeꞌtz tan paj yi jajk eluꞌ te kacꞌuꞌl, nka jajk kapaj caꞌwluꞌ.
18 Na quiꞌc na katxum tan cyajeꞌn cyen kiloluꞌ.
Nin quiꞌc na katxum tan kapajol yi caꞌwluꞌ.
19 Poro yi iluꞌ teruꞌ ja takꞌuꞌ amaꞌl tan keleꞌn cuꞌn swutz.
Ja takꞌuꞌ amaꞌl tan toqueꞌn kaluwar tetz jun amaꞌl yi tzꞌinunin tuꞌ, kale wutz quent yi quimichil skeꞌj.
20 Ma jaluꞌ Taꞌ, yi nink meꞌluꞌ te kacꞌuꞌl
nin yi nink nkajoy junt ketz kaRyosil yi apart, ja kloꞌ tiluꞌ.
21 Ja kloꞌ tiluꞌ, na yi iluꞌ teruꞌ, na tiluꞌ cyakil yi mbi na icyꞌ tkacꞌuꞌl.
22 Poro cyakil yi eꞌchk takleꞌnaꞌtz yi ja ul skawutz, iꞌtz tan paj yi xomchoꞌ teꞌjuꞌ.
Cyakil nin kꞌej wiꞌnin kaquimeꞌn.
Choꞌn cuꞌn na kuꞌlij chi na ban jun tal cneruꞌ yi na ben tkꞌab biyol tetz.
23 Ma jaluꞌ Taꞌ, quiꞌt takꞌuꞌ mas amaꞌl te yi eꞌchk takleꞌnaꞌtz, ma na elk kꞌajabuꞌ skeꞌj.
Quil keꞌl te cꞌuꞌluꞌ tetz ben kꞌej ben sak.
24 Quil koꞌ til cyenuꞌ. Quil tew tibuꞌ skawutz.
Quil koꞌ til cyenuꞌ kachuc, na chin qꞌuixcꞌuj nin atoꞌt.
25 Junawes ja keꞌl cuꞌn swutz, na ja wiꞌt koꞌc jakꞌ chicaꞌwl yi eꞌ kacontr.
Nin quiꞌc nin muꞌẍ kaxac taneꞌn ẍchiwutz.
26 Sajk binuꞌ tan kuchꞌeyeꞌn.
Koꞌ coleꞌuꞌ tan yi banl talmaꞌuꞌ.