Ja takꞌ Ryos banl tibaj yi kareyil
45
1 At wiꞌnin eꞌchk balaj yol yi na tijin te walmaꞌ, tan walol tetz yi kareyil.Nin cyakil yi yol yi swaleꞌ, niꞌcuꞌn chi na ban jun yaj, tan stzꞌibeꞌn eꞌchk balaj ajtzaꞌkl.
Ma jaluꞌ swaleꞌ bin yi eꞌchk balaj yolaꞌtz tetz yi kareyil.
2 Iluꞌ kareyil, quiꞌc nin junt yaj yi niꞌcuꞌnk chi taneꞌnuꞌ, ẍchixoꞌl cyakil wunak beneꞌn tziꞌn.
Nin chumbalaj nin eꞌchk yol yi na taluꞌ.
Chaꞌstzun te ja takꞌ Ryos banl tibuꞌ tetz ben kꞌej ben sak.
3 Wekeꞌ bin tibuꞌ. Cꞌaleꞌ quenuꞌ yi sparuꞌ xe cꞌuꞌluꞌ.
Na chin cham nin iluꞌ, nin at kꞌejuꞌ.
4 Na na jal kꞌejuꞌ yi na txꞌaconuꞌ scyeꞌj contruꞌ.
Na yi na ocuꞌ tan oyintziꞌ, na tzanuꞌ tan colcheꞌn yi mero bintzi, nin baꞌn atit cyakil yi na banuꞌ.
5 Cyakil yi eꞌ wunak yi ateꞌ beneꞌn tziꞌn, na choꞌc jakꞌ caꞌwluꞌ, nin na cyek ẍchiꞌuꞌ, na yi na xconsajuꞌ yi maꞌcluꞌ tetz oyintziꞌ, na cheꞌl cuꞌn yi eꞌ contruꞌ swutz.
6 Iluꞌ Kataj, at cawl tkꞌabuꞌ tetz ben kꞌej ben sak.
Nin chin tzꞌaknak cunin na cawunuꞌ.
7 Na yi iluꞌ teruꞌ, na xom wiꞌuꞌ te yi eꞌchk takleꞌn balaj, nin qui na pekꞌuꞌ te eꞌchk takleꞌn cachiꞌ.
Chaꞌstzun te ja jeꞌ xtxaꞌol Ryos iluꞌ.
Nin ja takꞌ iꞌ mas teruꞌ banluꞌ swutz alchok ajcaw beneꞌn tziꞌn.
8 Nin cyakil kꞌej chin cꞌoꞌc nin teꞌjuꞌ, tan eꞌchk balaj perfum, chi taneꞌn mirra, áloe tu canel.
Nin cyakil nin kꞌej na tzan eꞌchk kbetz xe yi caꞌluꞌ, kale na cawuneꞌtuꞌ, yi wekij tan eꞌchk balaj takleꞌn chi taneꞌn marfil.
9 Ẍchixoꞌl yi eꞌ xnaꞌn yi xomcheꞌ teꞌjuꞌ ateꞌ balaj xun.
Nin cꞌolchij yi reina xlajuꞌ.
Chin yubeꞌn nin iꞌ, tan eꞌchk balaj uwaj yi chin oro cuꞌn.
10 Ma jaluꞌ iluꞌ jun cꞌoloj reina, tbit tzajuꞌ cobox inyol yi swaleꞌ teruꞌ:
Cheꞌlken yi eꞌ taj xtxuꞌuꞌ te cꞌuꞌluꞌ.
Nchaꞌtz cheꞌlken yi eꞌ tanumuꞌ te cꞌuꞌluꞌ.
11 Na tan yi balajiluꞌ wiꞌnin na pekꞌ kareyil teꞌjuꞌ.
Tajweꞌn bin yil tbituꞌ yi tetz caꞌwl.
12 Nin yi eꞌ meꞌl yi rey cwent Tiro, scyuchꞌ yi eꞌ ric, chuꞌl swutzuꞌ tan toyeꞌn eꞌchk balaj oy teruꞌ, na yi cyajbil, iꞌtz yi nink tzꞌel kꞌajabuꞌ scyeꞌj.
13 Eꞌuꞌ katanum, quilninuꞌ yi reina tzꞌucuꞌleꞌj.
Chin yubeꞌn nin iꞌ, na wekoꞌn tib, nin oro cuꞌn at te yi beꞌch tetz.
14 Chin wekoꞌn nin tib, na choꞌn tzꞌocopon swutz yi rey.
Nin xomcheꞌ yi eꞌ mas xun tan takꞌleꞌn iꞌ.
15 Wiꞌnin chitzatzineꞌn.
Na chitzatzin na chocopon swutz yi rey.
16 Iluꞌ kareyil tbitzajuꞌ:
Cyakil yi eꞌ cyꞌajluꞌ scyuchꞌ yi eꞌ mamajuꞌ, chocopon tetz ajcaw chi banakeꞌ yi eꞌ mam cyenuꞌ sajleꞌn, nin ẍchicawunk beneꞌn tziꞌn.
17 Tzinjoyeꞌ puntil tan cyoqueꞌn cyakil wunak tan naꞌwseꞌn yi biꞌuꞌ sbneꞌ opon tunintz.
Na tajweꞌn cyakꞌol wunak kꞌejuꞌ ben kꞌej ben sak.