Cyakil nin kꞌej xomij kaRyosil skeꞌj
46
1 KaRyosil, iꞌ colol ketz.Nin iꞌ na akꞌon kachamil.
Nin list nin iꞌ tan kuchꞌeyeꞌn, yi na ultzaj eꞌchk sotzaj cꞌuꞌlal skawutz.
2 Chaꞌstzun te quil kaxob, mpe nink ẍchuc tib cyakil yi munt, nin mpe nink tzꞌicyꞌ yi eꞌchk wutz xe mar.
3 Mpe nink jincan yi mar, nka nink ẍchekꞌeꞌn tib yi pakꞌbil mar, quil kaxob.
Nchaꞌtz mpe nink ẍchuc tib yi eꞌchk wutz,a quil kaxob.
4 Na at jun tzanlaꞌ yi na takꞌ tzatzin tetz yi tnum tetz Ryos.
Choꞌn at le luwar yi chin xan nin kale najleꞌt iꞌ.
5 Stzꞌaꞌtok yi wiꞌtz Ajcaw le jun tnumaꞌtz.
Nin quiꞌt xit tetz ben kꞌej ben sak.
Na yil tzꞌul skil taneꞌn, tzꞌocopon iꞌ tan quichꞌeyeꞌn yi eꞌ aj tnumaꞌtz.
6 Cyakil yi eꞌ nación ẍchixobok, nin wiꞌnin ẍchilucneꞌ.
Na ẍchixobok yil quibitnin yil jilon tzaj Kataj.
Nin chelepon cuꞌn swutz, yil quibit yol iꞌ.
7 Na yi kaRyosil xomij skeꞌj, yi Ryos yi cyaꞌl na xcyeꞌ quen teꞌj, iꞌ yi Ryosil kamam Jacow, iteꞌn nin iꞌ colol ketz jaluꞌ.
8 Or bin cyeruꞌ chisajkuꞌ tan xmayeꞌn cyakil yi eꞌchk takleꞌn balaj, yi ja bnix tan Kataj tzoneꞌj wuxtxꞌotxꞌ.
Jun cuꞌn chelepon yabuꞌ teꞌj.
9 Na ja xcyeꞌ tan makleꞌn eꞌchk oyintziꞌ beneꞌn tziꞌn wi munt.
Ja xcyeꞌ scyeꞌj yi eꞌ contr, na wakꞌuꞌn cuꞌn nsaj chiflech tu chilans taꞌn.
Nin ja oc kꞌaꞌkl cyakil yi chicareꞌt, yi na xcon cyaꞌn tetz oyintziꞌ.
10 Ma jaluꞌ, je yol iꞌeꞌj: “Makwok itib te oyintziꞌ sweꞌj.
Tajweꞌn tan itocsal yi i inaꞌtz in Ryos.
Nin yi i inaꞌtz in Ajcaw squibaj cyakil yi eꞌchk nación.
Wetz cuꞌn cyakil yi amaꞌl beneꞌn tziꞌn wi munt,” stzun iꞌ.
11 Na xomij yi Kataj Jehová skeꞌj, yi jun yi cyaꞌl na xcyeꞌ quen teꞌj.
Na iteꞌn nin Ryosil Jacowaꞌtz, iꞌ colol ketz jaluꞌ.