Ryos, iꞌ yi wiꞌtz ajcaw beneꞌn tziꞌn wi munt
47
1 Ma jaluꞌ, cyakil axwok yi atix beneꞌn tziꞌn wi munt, kaẍpokꞌloj kakꞌab tan takꞌleꞌn kakꞌajsbil tetz Ryos.Tzatzin cuꞌn kaẍchꞌink tan takꞌleꞌn kꞌej iꞌ.
2 Na yi ketz Kataj cyaꞌl jun na xcyeꞌ quen teꞌj.
Chin xoꞌwbil nin yi tetz porer, na iꞌ yi wiꞌtz ajcaw beneꞌn tziꞌn wi munt.
3 Ja xcyeꞌ iꞌ tan chixiteꞌn cuꞌn cyakil yi eꞌ nación yi ja chuꞌl tan oyintziꞌ skeꞌj.
Nin ja takꞌ iꞌ amaꞌl sketz tan kacawuneꞌn squibaj.
4 Iꞌ ntxaꞌoneꞌn yi ketz kaꞌamaꞌl tan jaleꞌn kakꞌej, yi oꞌ xonl kꞌajtzun kamam Jacow.
Na wiꞌnin na pekꞌ iꞌ skeꞌj.
5 Ma jaluꞌ tzan jeꞌmponeꞌn tan cꞌoleweꞌn tibaj yi tetz cꞌolchbil kale tzꞌoqueꞌt tan cawuꞌn.
Tzatzin cuꞌn na chiẍchin wunak, nin na tzan eꞌchk chun tan takꞌleꞌn kꞌej iꞌ.
6 Kakꞌeꞌ bin kakꞌajsbil tetz, na iꞌ kareyil.
7 Kakꞌeꞌ kakꞌajsbil swutz iꞌ, na iꞌ yi wiꞌtz ajcaw tibaj cyakil yi eꞌchk amaꞌl beneꞌn tziꞌn.
8 Yi kaRyosil iꞌ yi wiꞌtz ajcaw tibaj cyakil nación.
Nin ja cꞌoleꞌ wi ẍchem yi chin xan nin.
9 Cyakil chibajxom yi eꞌchk naciónaꞌtz, scyuchꞌ yi eꞌ wunak yi at chikꞌej, ja chuꞌl swutz Kataj, nin ja choꞌc tajlal yi tanum Ryos, yi Ryosil kamam Abraham.
Na yi Kataj Ryos iꞌ yi wiꞌtz Ajcaw squibaj cyakil ajcaw yi ateꞌ wi munt.