At wiꞌnin kꞌej yi amaꞌl yi na biꞌaj Sión, na yaꞌstzun yi tnum yi txaꞌijt tan Ryos
48
1 At wiꞌnin kꞌej Kataj.Chaꞌstzun te tajweꞌn tan kakꞌol kꞌej iꞌ.
Kakꞌeꞌ kꞌej iꞌ le amaꞌl yi txaꞌijt taꞌn, yi wiꞌwtz yi chin xan nin.
2 Chumbalaj nin yi wiꞌwtz Sión yi at lijeꞌn kale najleꞌt Kataj.
Nin yi jun amaꞌlaꞌtz, ja jal kꞌej ẍchiwutz cyakil wunak beneꞌn tziꞌn.
Nin wiꞌnin na chitzatzin teꞌj, na choꞌn najlij yi wiꞌtz rey tul.
3 Yi kaRyosil choꞌn at le tetz caꞌl yi at Jerusalén.
Nin baꞌn kopon tan coloꞌn ib swutz.
4 Na yi eꞌ ajcaw lakak tnum, jeꞌnak chimolol quib tan oyintziꞌ teꞌj.
5 Poro yi quilol yi jun balaj tnumaꞌtz, nin eꞌ xobtz, nin eꞌ el ojk.
6 Wiꞌnin chixobeꞌn yi cyeleꞌn ojk.
Wiꞌnin il ateꞌ cuꞌnt tan xoꞌw.
Choꞌn cuꞌn quitaneꞌn chi na ilin jun xnaꞌn yi ntaxk ul yos tuchꞌ.
7 Ja cheꞌl xit chi na ban chibarc yi eꞌ aj Tarsis yi na oc bowl jun chin cyekꞌekꞌ scyeꞌj.
8 Ja kubit cyakil yi eꞌchk takleꞌn balaj yi bnixnak tan kaRyosil, yi Kataj yi cyaꞌl jun na xcyeꞌ quen teꞌj.
Poro yi jaluꞌ ja kil tan kawutz, yi bintzinin at yi tetz porer tan colcheꞌn yi tnum Jerusalén.
Nin jun cuꞌn quil xit tetz ben kꞌej ben sak.
9 Chaꞌstzun te iluꞌ kaRyosil, te yi atoꞌ xe yi teruꞌ caꞌluꞌ, na koꞌc tan xtxumleꞌn cyakil yi banl talmaꞌuꞌ.
10 Nin cyakil wunak beneꞌn tziꞌn na chitzan tan takꞌleꞌn kꞌejuꞌ, na at wiꞌnin kꞌejuꞌ.
Ej nin yi na ocuꞌ tan pujleꞌn xtisyaꞌ chin tzꞌaknak cuꞌn na tulejuꞌ.
11 Cyakil yi eꞌ yi ateꞌ le wiꞌwtz Sión na chitzatzin.
Nchaꞌtz cyakil yi eꞌ yi ateꞌ lakak eꞌchk tnum cwent Judá, na chitzatzin len.
12 Ma jaluꞌ or cyeruꞌ.
Chixonkuꞌ solteꞌj yi tapij yi at te yi tnum Sión.
Cyajleꞌuꞌ yi jun cꞌoloj torre yi at, yi na xcon cyakꞌun yi sanlar tan colcheꞌn yi tnum.
13 Chixmayninuꞌ yi jun chin balaj tapij yi at solteꞌj yi amaꞌl, tu yi eꞌchk balaj caꞌl yi at.
Baꞌn tzun cyaluꞌ scyetz cyakil chinitxajiluꞌ sbneꞌ opon tunintz.
14 Baꞌn chitxoluꞌ scyetz yi yaꞌstzun taneꞌn yi ketz kaRyosil, nin yi sbajxok iꞌ skawutz, sbneꞌ opon tunintz.