Quiꞌc ltakꞌ ko choꞌn lkꞌukeꞌ kacꞌuꞌl te pwok
49
1 Quibit tzajuꞌ cyakil yi eꞌuꞌ yi ateꞌuꞌ beneꞌn tziꞌn wi munt.2 Nin yi xtxolbil yi swaleꞌ, iꞌtz cyetz ric nin iꞌtz cyetz yi tal prow meꞌbaꞌ.
Quiꞌc na ban yi ko at kꞌej jun nka quiꞌ.
3 Swaleꞌ cobox xtxolbil scyeruꞌ yi at xeꞌ, yi at qꞌuixbel tan teleꞌn katxum tetz.
4 Chinumekuꞌ. Quibiteꞌuꞌ inyol, na xconk eꞌchk elsawutzil waꞌn tan lajluchaxeꞌn ẍchiwutzuꞌ.
Nchaꞌtz xomok kbetz te kulil yi inyol.
5 Quil chinxob yil tzꞌul eꞌchk cꞌalaj tiemp tzinwutz.
Ej nin quil chinxob yil choꞌc incontr tan joyleꞌn puntil tan inloꞌoneꞌn.
Mpe nink baj chisutil quib sweꞌj.
6 Na yi eꞌ incontraꞌtz, choꞌn kꞌuklij cyetz chicꞌuꞌl te yi cyetz chimeꞌbiꞌl, na na cyocsaj quib nim te yi at scyuchꞌ.
7 Poro quil xcyeꞌ yi chimeꞌbiꞌl tan chicolpeꞌn.
Na quiꞌc rmeril tan xconeꞌn pwok tan ẍchojleꞌn quil swutz Ryos.
8 Na quil xcyeꞌ pwok tan lokꞌcheꞌn stzꞌajbil jun yaj.
9 Nin quil xcyeꞌ pwok tan beneꞌn ẍkon tiemp jun yaj, nka tan claxeꞌn tkꞌab quimichil.
10 Na quiꞌc nin jun yi quiꞌk na quim, ma na tircuꞌn na kaquim len.
Quiꞌc na ban yi ko iꞌtz jun yaj yi at wiꞌnin tajtzaꞌkl, nka iꞌtz jun tal prow yi quiꞌc tajtzaꞌkl.
Tircuꞌn na kaquim. Nin cyakil yi eꞌ yi at chimeꞌbiꞌl, choꞌn na cyaj cyen chimeꞌbiꞌl tkꞌab junt.
11 Mpe nink cuꞌ biꞌ jun yaj te jalaj txꞌotxꞌ, nkꞌeꞌtz tetz.
Na yi mero tetz najbil iꞌtz yi camposant, nin choꞌn lcyaj iꞌ-tz le jun najbilaꞌtz, tetz ben kꞌej ben sak.
12 Poro yi mero bintzi iꞌtz:
Yi quiꞌc nin jun yaj yi quiꞌk quim, na tircuꞌn skaquimok.
Quiꞌc na ban mpe chin ric nink oꞌ, skaquimok len chi na chiban yi eꞌ txuc.
13 Ej nin yaꞌstzun sbajok scyeꞌj yi eꞌ yi choꞌn kꞌuklij chicꞌuꞌl te chichamil.
Ej nin yaꞌstzun sbajok scyeꞌj yi eꞌ yi choꞌn kꞌuklij chicꞌuꞌl te chinimel.
14 Na yi na ul quimichil ẍchiwutz yi eꞌaꞌtz, chixomok teꞌj chi na chixom yi eꞌ cneruꞌ te chipstor.
Ma yi eꞌ balaj nak, chitxꞌaconk scyeꞌj yil tzꞌul skil.a
Ma yi eꞌ ricaꞌtz kꞌaynakt chiwankil tcamposant.
Na yi cyetz chinajbil iꞌtz yi camposant.
15 Poro yi in wetz, tzꞌocopon Wajcaw, yi inRyosil, tan incolcheꞌn tan qui inquimeꞌn junawes.
Nin nnaꞌjeꞌn te iꞌ, tetz ben kꞌej ben sak.
16 Qui bin chibisunuꞌ yi na quiluꞌ yi at eꞌ yi wiꞌnin jaleꞌn chipuꞌk, nin yi wiꞌnin jaleꞌn chimeꞌbiꞌl.
17 Na yi eꞌaꞌtz yi at wiꞌnin chimeꞌbiꞌl, quiꞌc muꞌẍ tal nink tzꞌaj cyaꞌn yil chiquim.
Mpe ik chipuꞌk nka chimeꞌbiꞌl.
18 Mpe nink chitzatzin te chipuꞌk te yi cobox kꞌej yi ateꞌ tzoneꞌj wuxtxꞌotxꞌ, quiꞌc ltakꞌ.
Mpe nink cyakꞌ wunak chikꞌej tan paj yi eꞌ ric, quiꞌc ltakꞌ scyetz yil chiquim.
19 Na tzꞌopon jun kꞌej yi ẍchiquimok, nin quiꞌt quil wutz kꞌej sbneꞌ opon tunintz.
20 Poro yi mero bintzi iꞌtz, yi quiꞌc nin jun yaj yi quiꞌk quim, ma na tircuꞌn skaquimok.
Quiꞌc na ban mpe wiꞌnin kakꞌej, skaquimok len chi na chiban yi eꞌ txuc.