Yi kaRyosil iꞌ yi mero balaj pujul xtisyaꞌ yi qui na je kꞌab twiꞌ jun
50
1 Je yol yi Kataj yi wiꞌtz Ryos.Na ja cheꞌ baj ẍchakol cyakil wunak yi najlcheꞌ beneꞌn tziꞌn wi munt.
Ja cheꞌ baj ẍchakol cyakil yi eꞌ yi ateꞌ teleꞌn tziꞌn tu cyakil yi eꞌ yi ateꞌ toqueꞌn tziꞌn tan maꞌleꞌn cyajtzaꞌkl.
2 Choꞌn at iꞌ le yi wiꞌwtz Sión yi chin yubeꞌn nin.
Nin chin litzꞌun nin yi pakꞌpuchal iꞌ.
3 Yil tzꞌul iꞌ tan cawuꞌn nkꞌeꞌtz ewun cuꞌn tzꞌul, ma na bajxij jun chin wutzileꞌn kꞌakꞌ swutz.
Nin solteꞌj iꞌ choꞌn cunin taneꞌn chi na ban salchcam.
4 Chuꞌl molol cyakil wunak tan cyoqueꞌn tetz stiwil yil tzꞌoc iꞌ tan takꞌleꞌn caws yi tetz tanum.
Chuꞌl cyakil yi eꞌ yi ateꞌ tcyaꞌj, tu cyakil eꞌ yi ateꞌ wuxtxꞌotxꞌ tan tilweꞌn yi mbi sbajok te yi tetz tanum.
5 Ej nin je yol iꞌeꞌj:
“Molwokeꞌ cyakil yi eꞌ yi kꞌuklij chicꞌuꞌl sweꞌj, yi eꞌ yi chisuknak chiyol yi chixomok sweꞌj, nin yi ja xcon chitxꞌixwatz tetz quiwel chiyol,” stzun Ryos.
6 Nin cyakil yi eꞌ yi ateꞌ tcyaꞌj scyaleꞌ, yi iꞌ yi mero balaj pujul xtisyaꞌ yi qui na je kꞌab twiꞌ jun.
7 Nchaꞌtz na tal iꞌ:
“Bitwok tzaj yi axwok xonl Israel, axwok intanum.
Katxꞌajeꞌ teꞌj cyakil yi itil, na yi in wetz, in iRyosil.
8 Qui na chintzan tan talcheꞌn tzitetz, yi quiꞌc xac cyakil yi eꞌchk itxꞌixwatz yi na ipatwok swetz, nka yi quiꞌc xak cyakil yi eꞌchk oy yi na itakꞌwok swetz.
Baꞌn atit tircuꞌn.
9 Poro yi mero bintzi iꞌtz yi qui tajweꞌn swetz.
Qui tajweꞌn tan injakol jun neꞌẍ wacẍ nka jun cneruꞌ tzitetz, na wetz cuꞌn cyakil txuc.
10 Wetz cyakil jilwutz txuc yi at beneꞌn tziꞌn wi munt.
Wetz cyakil smaron txuc tu yi eꞌ txuc tetz awnaꞌn.
11 Wetz cyakil jilwutz txuc yi na chixicyꞌin tcyaꞌj.
Nchaꞌtz yi eꞌ yi na chixon wuxtxꞌotxꞌ.
12 Yi nak waj baj jun wetz waꞌn te yi eꞌ txucaꞌtz qui tajweꞌn tan injakol tzitetz, na wetz cyakil yi at wuxtxꞌotxꞌ.
13 ¿Na pe tzun baj yi eꞌchk ẍchiꞌbel yi wacẍ waꞌn yi na itoywok swetz?
Nka ¿na pe tzun baj yi ẍchꞌel yi eꞌchk chiw waꞌn, yi na ibiywok tetz itxꞌixwatz? Quiꞌ.
14 Mas balaj yi nink cxtyoẍinwok swetz yi in yi wiꞌtz Ajcaw, swutz yil tzitakꞌ jun cꞌoloj itxꞌixwatz.
Mas balaj yi nink cxeꞌlwok cuꞌn te iyol yi isuknak swetz.
15 Nin yil cxoꞌcwok swutz il, baꞌn tzun tzijakwok ẍchꞌeybil itetz swetz.
Na list atineꞌt tan ichꞌeyeꞌn, bantz itoqueꞌn tan takꞌleꞌn inkꞌej,” stzun Kataj bantz.
16 Poro nchaꞌtz staleꞌ iꞌ-tz scyetz yi eꞌ juchul il:
“¿Mbi xac na ital yi xomquix te incaꞌwl, nin qui na ibanwok taneꞌn?
Na na italwok yi tajweꞌn chixom wunak te yi wetz inchusuꞌn, poro yi axwok itetz qui na cxomwok teꞌj.
17 Chumbalaj nin axwok taneꞌntz, poro iwutz tuꞌ, iplaj tuꞌ.
Na ja cyaj cyen itilol inchusuꞌn. Nin quiꞌt na cxomwok teꞌj.
18 Na ilenin axwok alkꞌom, nin axwok aj xnaꞌninl.
19 Chin laꞌj nin axwok, nin chin txumul yol nin axwok.
20 Yi axwok itetz na cuꞌ ichem tan chiyolcheꞌn yi eꞌ wunak.
Nin nchaꞌtz, pe ik yi mero ititzꞌun, na cxoꞌcwok tan xtxumleꞌn yol teꞌj, nin tan yolcheꞌn iꞌ.
21 Yaꞌstzun na ibanwoktz.
Poro i taneꞌn tziwutzwok, yi quil wakꞌ icaws tan cyakil yi mbi na iban.
Poro nkꞌeꞌtz niꞌcuꞌn in chi axwok itetz.
Ma na jun cuꞌn, swakꞌeꞌ icaws.
Chin clar cunin na chintzan tan talcheꞌn yi yolaꞌseꞌj tzitetz.
22 ”Or tzitilwok, quil tzꞌel inyol te icꞌuꞌl.
Na kol tzitilwok cyen inchusuꞌn, swakꞌeꞌ icaws.
Nin cyaꞌl jun tzꞌocopon tan icolcheꞌn.
23 Na yi eꞌ yi na cyakꞌ inkꞌej, yaꞌstzun yi eꞌ yi na chityoẍin swetz.
Nin yi eꞌ yi na chiban taneꞌn incaꞌwl, yaꞌstzun yi eꞌ yi nocopon tan chicolpeꞌn,” stzun Ryos bantz.