At rmeril kajak cuybil kapaj swutz Ryos
51
1 Siwl Taꞌ, elk kꞌajabuꞌ sweꞌj.Stzajscunuꞌ yi wil tan yi banl talmaꞌuꞌ.
2 Tcyꞌajlenuꞌ yi yab ajtzaꞌkl yi cyꞌaꞌn waꞌn.
Xitcunuꞌ cyakil yi impaj intxꞌokꞌbeꞌnaꞌtz.
3 Wajcaw, na el intxum tetz yi in jun chin wiꞌtz pajol caꞌwl swutzuꞌ.
Nin qui na el yi wil te incꞌuꞌl.
4 Ja injuch wil swutzuꞌ Taꞌ.
Na ja imban yi eꞌchk takleꞌn yi qui na pekꞌuꞌ teꞌj.
Nin baꞌn atit yi kol takꞌuꞌ incaws.
Na yi na takꞌuꞌ caws jun, qui na xubsijuꞌ teꞌj.
5 Taꞌ, na el intxum tetz yi in jun juchul il jetz yi witzꞌleꞌnix.
Na te yi atin tzaj le wankil intxuꞌ, cyꞌaꞌn nin yi ilcꞌol waꞌn.
6 Poro yi teruꞌ Taꞌ, na tzatzinuꞌ scyeꞌj yi eꞌ yi skoj cuꞌn te cyalmaꞌ.
Nin ja takꞌuꞌ katxumuꞌn tan kabnol yi eꞌchk takleꞌn balaj.
7 Chin xansajuꞌ tan hisopoa, bantz stzajeꞌn yi wil.
Xtxꞌajeꞌuꞌ te walmaꞌ nin skojaxk chi taneꞌn nokꞌ yi chin stum nin.
8 Takꞌuꞌ junt tir yi tzatzin swetz, na na waj yil chintzatzin, ptzun jajk chin cawsajuꞌ.
9 Quiꞌk tzꞌocuꞌ tan xtxumleꞌn yi wil.
Stzajscunuꞌ cyakil yi impaj.
10 Wajcaw, lok xtxꞌixpujuꞌ wajtzaꞌkl.
Na na waj yil jal jun acꞌaj wajtzaꞌkl yi jicyuch teꞌj.
11 Quiꞌk chin jatxlenuꞌ teꞌjuꞌ.
Nin quiꞌk tcyꞌajlenuꞌ yi espíritu Sant sweꞌj.
12 Ma na ẍchajeꞌuꞌ swetz yi ẍeꞌnk chintzatzin junt tir, yi ẍeꞌnk tzꞌel intxum tetz yi ja chinclax.
Chin ẍchꞌeyajuꞌ tan yi banl talmaꞌuꞌ.
13 Na yi wajbil iꞌtz tan inxconeꞌn tan chichusleꞌn yi eꞌ pajol caꞌwluꞌ, bantz chixomeꞌn te yi teruꞌ tajbiluꞌ.
14 Taꞌ, quiꞌt takꞌuꞌ junt tir amaꞌl swetz tan woqueꞌn tetz biyol nak.
Nin kol tzꞌocuꞌ tan wuchꞌeyeꞌn, swakꞌeꞌ inkꞌajsbil teruꞌ, nin tzintxoleꞌ yi balajiluꞌ.
15 Wajcaw, ẍchajeꞌuꞌ puntil swetz tan wukꞌol inkꞌajsbil swutzuꞌ.
Na na waj chimbitzin tan takꞌleꞌn kꞌejuꞌ.
16 Na na el intxum tetz yi qui na tajuꞌ eꞌchk oy, nka eꞌchk txꞌixwatz yi na kapat swutzuꞌ.
List wutaneꞌn tan takꞌleꞌn eꞌchk oyaꞌtz teruꞌ, poro na el intxum tetz yi qui na pekꞌuꞌ teꞌj.
17 Poro yi teruꞌ tajbiluꞌ iꞌtz yi nink kabisun tan kil, nin yil kocsaj kib juy swutzuꞌ.
Na na cuyuꞌ chipaj yi eꞌ yi nternin na chibisun tan quil, nin yi na chokꞌ tan paj.
18 Wajcaw, elk kꞌajabuꞌ te Sión yi tanumuꞌ.
Tan banl talmaꞌuꞌ elk kꞌajabuꞌ skeꞌj.
Takꞌuꞌ amaꞌl tan bnixeꞌn junt tir yi tapij solteꞌj yi tnum Jerusalén.
19 Na ko na kabisun tan kil, jun cuꞌn stzatzinkuꞌ te yi koy tu eꞌchk katxꞌixwatz yil kapat swutzuꞌ.
Tzatzinkuꞌ te eꞌchk katxꞌixwatzaꞌtz yi na kapat swutzuꞌ.
Nin tzatzinkuꞌ te eꞌchk neꞌẍ wacẍ yi na chiquim kaꞌn tetz koy.