Quiꞌc na takꞌ scyetz yi eꞌ mal nak yi na cyocsaj quib nim tu cyajtzaꞌkl
52
1 Eꞌuꞌ bajxom, mbi xac na cyocsaj quibuꞌ nim tu yi eꞌchk takleꞌn cachiꞌ yi na chibanuꞌ scyeꞌj wunak.Na yi ketz kaRyosil at mas tetz ẍchamil swutz alchok ajcawil, nin quinin bajsbeꞌn tetz yi banl talmaꞌ iꞌ skeꞌj.
2 Na yi eꞌ cyeruꞌ ntin na chitzanuꞌ tan xtxumleꞌn eꞌchk takleꞌn cachiꞌ.
Nchaꞌtz chin cyajbil ninuꞌ ẍchaqꞌueꞌn eꞌchk yol.
Nin chin xoꞌwbil nin yi eꞌchk yol yi na el tzaj le chitziꞌuꞌ.
Choꞌn cunin chijilonuꞌ chi taneꞌn jun cchiluꞌ yi chin aꞌ nin wiꞌ.
3 Mas tcuꞌn na chipekꞌuꞌ tan banleꞌn yi eꞌchk takleꞌn cachiꞌ, swutz yi eꞌchk takleꞌn balaj.
Nin mas balaj tcuꞌn yi laꞌjil ẍchiwutzuꞌ swutz yi bintzi.
4 Yi eꞌchk yol yi na chiyoluꞌ ntin na xcyeꞌ tan chixiteꞌn yi eꞌ wunak, na chin laꞌj nin eꞌuꞌ.
5 Poro Ryos tzꞌakꞌon chicawsuꞌ tetz ben kꞌej ben sak.
Na chijeponuꞌ bukꞌij taneꞌn nin ẍcheꞌlk cunuꞌ swutz.
6 Cyakil yi eꞌ yi choꞌn kꞌuklij chicꞌuꞌl te Ryos, squileꞌ cyakil yi xtxolbilaꞌtz, nin ẍchixobok taꞌn.
Poro ẍchitzeꞌenk scyeꞌj yi eꞌ mal nakaꞌtz, nin scyaleꞌ:
7 “Ilwokeꞌ nin, yi mbi mbajij scyeꞌj yi eꞌ mal nakaꞌtz.
Yi cyetz, qui nkꞌukeꞌ chicꞌuꞌl te Ryos.
Ma na choꞌn nkꞌukeꞌ chicꞌuꞌl te yi cyetz chimeꞌbiꞌl.
Nin qui na quil cyen yi juchleꞌn il.”
8 Ma in wetz, choꞌn cuꞌn wutaneꞌn xe caꞌl Ryos chi taneꞌn jun wiꞌ oliw yi chumbalaj nin, na ilenin choꞌn kꞌuklij wetz incꞌuꞌl te Ryos.
9 Wajcaw, ilenin swakꞌeꞌ inkꞌajsbil teruꞌ.
Nin chintyoẍink teruꞌ tan yi eꞌchk takleꞌn yi ja bnix tanuꞌ sweꞌj.
Nin nchaꞌtz ilenin skꞌukek incꞌuꞌl teꞌjuꞌ, na chumbalaj nin iluꞌ, nin quinin bajsbeꞌn tetz yi banl talmaꞌuꞌ.