Kwaan ngunii tub xaa gol
71
Xaa Tubka Nak,
nebse lo lu ngwii na,
¡Nalaat lu roo xkalnto na!
2 ¡Le yud na nu bloo na lo yalnales nel nali nak lu!
Kenzha kwaan nii na nu le yud na.
3 Nel lu nak ke kwaan nsaaw na
nu lu nak kwenta yoo ndok pa nkaxlaan na;
nel lu mxaal xaa le yud na nu mloo na
nu nel lu nak ke kwaan nsaaw na nu yalngezh cheen na.
4 Xtios na,
bloo na lozhya re xaa nakap,
lo re xaa nanalit nle nu lo re xaa naxinn,
5 nel lu,
Xaa Nabeyy,
Xaa Tubka Nak,
nak xaa kambaz na,
nel axta mad na nebse lo lu ngwii na,
6 Axta gorna zeraka gal na,
lu nak xaa mkanap na
nu leezha nzhooka na lextoo xnaa na,
lu mle zee ngol na.
Kwaanzee tubka gol na lo lu.
7 Zyen doo xaa ndedyall ne na,
nel lu nak xaa nkanap na,
xaa nye nak.
8 Dubse zhe nzholl na lo lu
nu dubse zhe nii na re kwaan gro cheen lu.
9 Nalaat lu na gorna gak na xaa gol;
nalaat lu na gorna lux jwers cheen na,
10 nel re xaa nayii ne na,
tubka nii nawent na,
nzhaal re xaa nu nle xaa xgab gut xaa na.
11 Nu mbezh xaa:
“Dios mlaa xaa;
renal be xaa nu zen be xaa,
nel nyent cho le yud xaa.”
12 ¡Xtios na,
nabachit lu lo na,
Xtios na,
le prad,
te le yud na!
13 ¡Nzhekla na ton re xaa nayii ne na
nu lux re xaa nu gak nachan re xaa,
re xaa nzhekla luux na!
14 Per lee na tubka kwaz lu
nu masra gol na lo lu.
15 Kwaan roo na nii na wli kwaan mle lu,
nu dubse zhe yé na lee lu nali nak,
nu nzaa lu yalnaban,
nel zyen doo kwaan mle lu zee nyent mod lab na reya.
16 Xaa Tubka Nak,
Xaa Nabeyy,
yé na re kwaan gro,
kwaan mle lu;
¡yé na ke nebse lu nak xaa nali nak!
17 Dios,
mseed lu na leezha mad na
nu axta nal seetaka nza na kwent re kwaan gro kwaan mle lu.
18 Nixa gorna gak na xaa gox nu na rus yich yek na,
Dios,
nalaat lu na,
nel za na kwent cheen yalnabeyy cheen lu,
lo re xaa nara nzexen nu lo re xaa nara gal.
19 Dios,
lee xtizh lu kwaan wli nzhin axta yiba
nu re kwaan mle lu gro doo nak;
Dios,
¿Cho nak kwenta lu?
20 Lu,
mted na zyen doo yalzi nu yalnales,
lu,
koo na pa mas nech lo yizhyo zee ban na stuba.
21 Telise naro le lu na
nu le lu gak nix lextoo na stuba.
22 Xtios na,
Xaa Nzhul lo Israel,
gol na lo yalnali cheen lu kwaan bagwel kwaan nkano chii yib,
gol na lo lu,
kwaan bagwel kwaan nkano chiibchop yib,
nel lu nak xaa nambey cheen Israel.
23 Nix doo gak na,
gorna gol na lo lu,
nel lu mloo na lo yalgut.
24 Dubse zhe za na kwent nali nak lu,
nel mton re xaa,
mlake xaa kwaan yalnto,
re xaa kwaan nzhekla gut na.