Nebse lo Xaa Tubka Nak ngwii na
Salm kwaan mkee David, nu mzaa xaaya lo xaa nabeyy lo re xaa nzholl.
31
Xaa Tubka Nak,
nebse lo lu ngwii na.
¡Nalaat lu roo xkalnto na!
¡Le yud na nu bloo na lo yalnales,
nel nali nak lu!
2 Kenzha kwaan nii na
nu le yud na nu bloo na.
Nel lu nak ke kwaan nsaaw na
¡nu lu nak yalngezh cheen na!
3 ¡Lu nak ke kwaan nsaaw na!
Lu nak kwenta yoo ndok pa nkaxlaan na;
be na nu bzeno na,
sbaa lee re myet nii wen le lu.
4 ¡Bloo na leen yex kwaan mkee xaa,
nel lu nak xaa nkanap na.
5 Lo lu za na yalnaban cheen na,
¡Bloo na,
Xaa Tubka Nak,
Dios xaa nak kwaan wli!
6 Nayii na ne na re xaa ngwii lo re maj kwaan nanont;
per lee na gol nebse lo Xaa Tubka Nak.
7 Lee yalnles cheen lu nyaadno yalnix lo na,
lu ngwii lo yalnales cheen na
nu nlabeyy lu re yalzi kwaan ndeed na.
8 Namzaat lu na lo re xaa nayii ne na
¡nu mzo lu nii na pa wen nak!
9 Xaa Tubka Nak,
blesla lu ne lu na,
nel nales nzhak na,
nel kaluux yalne garlo na nu lextoo na
¡nu dub cho na!
10 ¡Nayetra na lo yalne,
nu nazhintra na re liin kwaan nzhaal ban na!
Lee yalnales luux yalngezh cheen na
¡nu lee na nzeyak naguuzh doo!
11 Kwent cheen re xaa nayii ne na,
zee nxizhno xaa na nel nanont na lo xaa,
nu masra lo re xaa nzho gax garli na,
nel nak na xaa nzheb re xaa ne.
¡Nu nxonn xaa lo na,
gorna ne xaa lo na leen naz!
12 Tira myenlazh xaa na,
kwenta tub xaa ngut.
Nak na kwenta tub yann kwaan ngok byog.
13 Nzhon na nzhedizh xlaan re xaa na:
“¡Dubse pa nzho yalnacheb!”
Nu tubka nzhaal xaa nu nii nawent xaa na,
¡nu nle xaa xgab xomod gut xaa na!
14 Per lee na,
Xaa Tubka Nak,
nebse lo lu ngwii na
nu nii na:
“¡Lu nak Xtios na!”
15 Lee re mbizh kwaan ban na nzho lozhya lu;
¡Loo na lo re xaa nayii ne na nu lo re xaa nrenal na!
16 Ble kwaan wen lo na,
xaa nak xmos lu
nu le yud na kwaan yalnkela cheen lu.
17 Xaa Tubka Nak,
nalaat lu roo xkalnto na,
nel nguniila naya lo lu.
¡Laa roo xkalnto re xaa nakap nak,
zee zheta gak xaa paro nzho re xaa leen baa!
18 Nu zheta gak re xaa nkade,
nel nawent nii xaa re xaa nali nak,
nxizhno xaa xaa nu nto xaa yalxwa.
19 Aka naro nak yalwen cheen lu,
nlu luya lo re xaa nzheb ne lu
nu nlu luya,
lo re xaa kambaz lu,
delant lo re xinn xaa yizhyo.
20 Nu nkaxlaan lu xaa paro nzo lu
nu ngoo lu xaa lo re xgab kwaan nkano re xaa nakap,
zee ngozhaw lu xaa leen li lu
nu nkanap lu xaa lo re xaa nii nawent.
21 Wen doo nak,
Xaa Tubka Nak,
nel mlu xaa gro doo yalnkela cheen xaa lo na,
gorna nales doo nzhak na.
22 Gorna nanetra na cho kwaan ngle na,
zee nzhé na:
“Tira myenlazh xaa na”;
per gorna mbin lu ngunii na,
zee mbin lu xtizh na.
23 Kela gu Xaa Tubka Nak,
rese xaa nali nak,
nel Xaa Tubka Nak nkanap re xaa nali nak;
per lee re xaa nto yalxwa yazo xaa kwaan nzhaal yizo xaa.
24 Ble nix gu lextoo gu,
nu nye bzo gu,
rese gu xaa ngwii lo,
Xaa Tubka Nak.