Mzaa xaa dixkix lo Dios nel msekwen xaa xaa lo yalyizh
Salm kwaan nzholl xaa gorna nle nzhul xaa yidoo cheen Dios. Salm kwaan mkee David.
30
Xaa Tubka Nak,
gol na lo lu nel mloo lu na
nu namlaat lu na lo re xaa nayii ne na,
zee xizhno xaa na.
2 Xtios na,
Xaa Tubka Nak,
ngunii na lo lu nu msekwen lu na.
3 Xaa Tubka Nak,
mloo lu na leen baa cheen yalgut,
mle lu mban na nu namlaat lu nget na.
4 Bill gu xaa nali nak lo Xaa Tubka Nak
nu bill gu lo xaa nambey nak.
5 Tub rataka nded yalnayii lo xaa,
per lee yalnkela cheen xaa tira nak;
chelee na gon na dubse yaal,
lee garziil kano na yalnix.
6 Leezha wen na nu nle na xgab:
“Nik stub welt naralt nii na.”
7 Nel lu,
Xaa Tubka Nak,
mle wen lo na
nu mzo nye lu na modxa nye nak yi;
per mkaxlaan lu lo na,
zee mzheb doo na.
8 Xaa Tubka Nak,
lo lu nii na
nu lo lu Xaa Nabeyy,
kale na xgab naz leen lextoo na:
9 ¿Cho kwaan le lu gan chelee na yet na?
¡Nik tub kwaan nalet lu gan wii lu lo na leen baa!
¿Che nel gool yide lo lu?
¿Nu che nel zaa yide kwent kwaan wli cheen lu?
10 Xaa Tubka Nak,
kenzha nu blesla lu ne lu na,
Xaa Tubka Nak,
ble yud na.
11 Mkiib lu re yalnales nu mle lu zee mkanii na;
mkiib lu ler kwaan nzhak xaa nkaach ntagol yenn na
nu msegak lu na ler kwaan nzhak xaa nchelya.
12 Kwaanzee gol na lo lu kwaan yalnix cheen na nu nyent mod nagolt na lo lu.
¡Xtios na,
Xaa Tubka Nak,
tubka gol na lo lu nu za na dixkix lo lu!